ஹோவர்போர்டு மூலம் அதிக தூரம் பறந்து புதிய கின்னஸ் சாதனை!!

ஹோவர்போர்டு

கால்களில் கட்டிக் கொண்டு பறந்து செல்லும் எந்திரம் பொருத்தப்பட்ட பலகை போன்ற சாதனத்தையே ஹோவர்போர்டு என்று அழைக்கின்றனர்.

கின்னஸ் சாதனை

இதற்கு முன்னர் ஹோவர்போர்டு மூலமாக 162 அடி தூரம் மட்டுமே பயணித்தது சாதனையாக இருந்தது. இப்போது அலெக்ஸான்டரு டுரு சுமார் 905 அடி 2 இன்ச் தூரம் வரை ஹோவர்போர்டு மூலமாக பறந்து புதிய கின்னஸ் சாதனை படைத்துள்ளார்.

பாதுகாப்பு...

இந்த ஹோவர்போர்டு தரை, தண்ணீர் என எந்த விதமான நில அமைப்புகளிலிருந்தும் பறக்க முடியும். ஆனால், கீழே விழுந்தால் பாதிப்பு ஏற்படக்கூடாது என்பதற்காக, கனடா நாட்டின் கியூபெக் என்ற இடத்தில் உள்ள ஓரியூ ஏரியின் மீது பறந்து சாதனை படைத்திருக்கிறார் அலெக்ஸாண்டரு.

எந்திர கட்டுப்பாடு

இந்த ஹோவர்போர்டின் கீழ் பக்கமாக 4 புரொப்பல்லர்கள் பொருத்தப்பட்டிருக்கின்றன. இந்த புரொப்பல்லர்களின் உந்துசக்தியின் மூலமாக, அந்த ஹோவர்போர்டு மேலே எழும்பி பறக்கிறது. இதனை கால்கள் மூலமாகவே கட்டுப்படுத்த வேண்டும்.

உயரம்

ஓரியூ ஏரியின் மீது 16 அடி உயரத்தில் தனது ஹோவர்போர்டில் அலெக்ஸாண்டரு பறந்தார். ஆனால், சோதனைகளின்போது இதைவிட அதி உயரமாக பறக்கக்கூடிய வல்லமையை இந்த பறக்கும் பலகை கொண்டிருப்பதாக கூறியுள்ளார்.

கால்களில் றெக்கை

அவசரமாக செல்வோரை காலில் றெக்கை கட்டி பறந்து போகிறான் பார் என்று கூறுவதுண்டு. அதுபோன்றவர்களுக்கு இந்த ஹோவர்போர்டு எனும் பறக்கும் பலகை மிகச்சிறந்த போக்குவரத்து சாதனமாக இருக்கும்.

பெருமிதம்

"அதிக தொலைவு ஹோவர்போர்டில் பறந்து சாதனை படைத்திருப்பதன் பெரும் ஊக்கத்தையும், நம்பிக்கையையும் அளிக்கிறது. எதிர்கால போக்குவரத்து முறையில் இந்த பறக்கும் பலகை புரட்சிகர சாதனமாகவும், ஒரு அடித்தளமிடும் சாதனையாகவும் இதனை கருதுகிறேன்," என்று அலெக்ஸாண்டரு பெருமிதம் தெரிவித்துள்ளார்.

வீடியோ

கின்னஸ் உலக சாதனை வலைப்பூ வெளியிட்டிருக்கும் வீடியோவை காணலாம்.