மாருதி விட்டாரா பிரெஸ்ஸா பிஎஸ்-6 மாடல் குறித்த புதிய தகவல்கள்!

காம்பேக்ட் எஸ்யூவி மார்க்கெட்டில் மாருதி விட்டாரா பிரெஸ்ஸா எஸ்யூவிதான் முதன்மையான தேர்வாக இருந்து வருகிறது. இந்த நிலையில், பிஎஸ்-6 மாசு உமிழ்வு விதிகள் அமலுக்கு வர இருப்பதால், பிஎஸ்-6 எஞ்சின் தேர்வில் மாருதி விட்டாரா பிரெஸ்ஸா மிக விரைவில் விற்பனைக்கு கொண்டு வரப்பட இருக்கிறது.

தற்போது பயன்படுத்தப்பட்டு வரும் 1.3 லிட்டர் ஃபியட் டீசல் எஞ்சின் பிஎஸ்-6 மாசு உமிழ்வு விதிகள் காரணமாக, பயன்பாட்டில் இருந்து விலக்கப்பட இருக்கிறது. இதையடுத்து, மாருதி விட்டாரா பிரெஸ்ஸா எஸ்யூவியானது பிஎஸ்-6 மாசு உமிழ்வு தரத்திற்கு இணையான 1.5 லிட்டர் பெட்ரோல் எஞ்சின் தேர்வில் வர இருக்கிறது.

ஏற்கனவே, மாருதி எர்டிகா, சியாஸ் கார்களில் பயன்படுத்தப்படும் இந்த பெட்ரோல் எஞ்சின் பிஎஸ்-6 மாசு உமிழ்வு விதிகளுக்கு ஒப்பாக மேம்படுத்தப்பட்டு விட்டாரா பிரெஸ்ஸா எஸ்யூவியில் பயன்படுத்தப்படும்.

தவிரவும், இந்த பெட்ரோல் எஞ்சின் சுஸுகியின் மைல்டு ஹைப்ரிட் சிஸ்டத்துடன் வர இருக்கிறது. அத்துடன், 5 ஸ்பீடு மேனுவல் கியர்பாக்ஸ் அல்லது 4 ஸ்பீடு மேனுவல் கியர்பாக்ஸ் தேர்வுகளில் வர இருக்கிறது.

ஏஎம்டி கியர்பாக்ஸ் தேர்வில் வரும் என்று தகவல்கள் வெளிவந்த நிலையில், தற்போது சாதாரண 4 ஸ்பீடு டார்க் கன்வெர்ட்டர் ஆட்டோமேட்டிக் கியர்பாக்ஸ் தேர்வில் வர இருப்பதாக புதிய தகவல் வெளியாகி இருக்கிறது.

இந்த பெட்ரோல் எஞ்சின் ஸ்டார்ட் - ஸ்டாப் தொழில்நுட்ப வசதியுடன் அறிமுகம் செய்யப்பட இருக்கிறது. இதன்மூலமாக, சிறப்பான எரிபொருள் சிக்கனம் மற்றும் குறைவான மாசு உமிழ்வு திறனை இந்த கார் பெறும்.

புதிதாக அறிமுகம் செய்யப்பட இருக்கும் 1.5 லிட்டர் பெட்ரோல் எஞ்சின் அதிகபட்சமாக 104 பிஎச்பி பவரையும், 138 என்எம் டார்க் திறனையும் வழங்க வல்லதாக இருக்கும். பிஎஸ்-6 மாசு உமிழ்வு தரத்திற்கு இணையானதாக மேம்படுத்தப்படுவதால், பவரை வெளிப்படுத்தும் திறனில் பெரிய வித்தியாசம் இருக்காது.

இந்த நிலையில், மாருதி விட்டாரா பிரெஸ்ஸா எஸ்யூவியில் 1.5 லிட்டர் பெட்ரோல் எஞ்சின் பயன்படுத்தப்பட இருப்பதால், விலையும் கணிசமாக உயர்த்தப்படும். ஏனெனில், 4 மீட்டருக்கும் குறைவான நீளம் கொண்ட கார்களில் 1.2 லிட்டர் பெட்ரோல் எஞ்சின் இருந்தால் மட்டுமே வரிச்சலுகை பெற முடியும்.

பிஎஸ்-6 எஞ்சின் மட்டுமின்றி, வடிவமைப்பில் சிறிய மாற்றங்களும், கூடுதல் வசதிகளும் எதிர்பார்க்கப்படுகிறது. இதனால், போட்டியாளர்களைவிட மதிப்பு மிக்க மாடலாக நிலைநிறுத்துவதற்கான வாய்ப்பு கிடைக்கும்.

அடுத்த மாதம் நடக்க இருக்கும் ஆட்டோ எக்ஸ்போவில் மாருதி விட்டாரா பிரெஸ்ஸா எஸ்யூவியின் பிஎஸ்-6 மாடல் விற்பனைக்கு அறிமுகம் செய்யப்படும் என்று எதிர்பார்க்கப்படுகிறது. ஹூண்டாய் வெனியூ, டாடா நெக்ஸான் உள்ளிட்ட மாடல்களுடன் போட்டி போடும்.

Source: ACI