ஆடி எஸ்5 ஸ்போர்ட்பேக் இந்தியாவில் விற்பனைக்கு வரும் தேதி அதிகாரப்பூர்வமாக அறிவிப்பு... எப்போனு தெரியுமா?

ஆடி நிறுவனம் தனது செடான் ரக காரான, எஸ்5 ஸ்போர்ட்பேக் இந்திய சந்தையில் எப்போது விற்பனைக்கு அறிமுகம் செய்யப்படும்? என்பது குறித்த அதிகாரப்பூர்வ தகவலை வெளியிட்டுள்ளது. இதன்படி ஆடி எஸ்5 ஸ்போர்ட்பேக், இந்திய சந்தையில் வரும் மார்ச் 22ம் தேதி விற்பனைக்கு அறிமுகம் செய்யப்படவுள்ளது. ஆடி நிறுவனம் எஸ்5 ஸ்போர்ட்பேக் காரை இந்தியாவில் விற்பனை செய்ய சிபியூ வழியை தேர்ந்து எடுத்துள்ளது.

அதாவது முழுவதும் கட்டமைக்கப்பட்ட நிலையில், இந்தியாவிற்கு இறக்குமதி செய்யப்பட்டு ஆடி எஸ்5 ஸ்போர்ட்பேக் கார் விற்பனை செய்யப்படும். ஆனால் இந்த காருக்கான முன்பதிவு இன்னும் அதிகாரப்பூர்வமாக தொடங்கப்படவில்லை. அதே சமயம் விற்பனைக்கு அறிமுகம் செய்யப்பட்டவுடன் டெலிவரி பணிகள் தொடங்கும் என எதிர்பார்க்கப்படுகிறது.

ஆடி நிறுவனம் கடந்த ஆண்டு க்யூ2 எஸ்யூவி காரை விற்பனைக்கு அறிமுகம் செய்தது. அந்த நிகழ்ச்சியின் கடைசியில்தான், ஆடி எஸ்5 ஸ்போர்ட்பேக் இந்தியாவில் விற்பனைக்கு அறிமுகம் செய்யப்படுவது அதிகாரப்பூர்வமாக உறுதி செய்யப்பட்டது. அதை தொடர்ந்து எஸ்5 ஸ்போர்ட்பேக் காருக்கு ஆடி நிறுவனம் பல்வேறு டீசர்களை வெளியிட்டு வந்தது.

அத்துடன் ஆடி நிறுவனத்தின் அதிகாரப்பூர்வ இணையதள பக்கத்தில், எஸ்5 ஸ்போர்ட்பேக் கார் பட்டியலும் இடப்பட்டது. இதன் மூலம் விலை தவிர்த்து, அந்த கார் குறித்த பல்வேறு தகவல்களும் தெரியவந்தன. டிசைனை பொறுத்த வரை, ஒருங்கிணைந்த எல்இடி பகல் நேர விளக்குகள் உடன் எல்இடி ஹெட்லேம்ப்களை ஆடி எஸ்5 ஸ்போர்ட்பேக் பெற்றுள்ளது.

மேலும் எஸ்5 பேட்ஜ் உடன் க்ரில் அமைப்பு, 19 இன்ச் அலாய் வீல்கள் மற்றும் பின் பகுதியில் எல்இடி டெயில்லைட்கள் ஆகியவையும் ஆடி எஸ்5 ஸ்போர்ட்பேக் காரில் வழங்கப்பட்டுள்ளன. இதேபோல் இன்டீரியரை பொறுத்த வரையிலும், மிகவும் பிரீமியமான கேபினை ஆடி எஸ்5 ஸ்போர்ட்பேக் கார் பெற்றுள்ளது.

விர்ச்சூவல் காக்பிட், பெரிய டச்ஸ்க்ரீன் இன்போடெயின்மெண்ட் சிஸ்டம், வயர்லெஸ் சார்ஜிங், ஆட்டோமேட்டிக் க்ளைமேட் கண்ட்ரோல் மற்றும் பல்வேறு கட்டுப்பாடுகளுக்கான கண்ட்ரோல்கள் உடன் தட்டையான அடிப்பாகம் கொண்ட ஸ்டியரிங் வீல் ஆகிய வசதிகள் ஆடி எஸ்5 ஸ்போர்ட்பேக் காரில் வழங்கப்பட்டுள்ளன.

அதே சமயம் இந்த காரில், 3.0 லிட்டர் வி6 டிஎஃப்எஸ்ஐ பெட்ரோல் இன்ஜின் தேர்வு ஸ்டாண்டர்டாக வழங்கப்படுகிறது. இந்த இன்ஜின் அதிகபட்சமாக 349 பிஎச்பி பவரையும், 500 என்எம் டார்க் திறனையும் உருவாக்க கூடியது. இந்த இன்ஜினுடன் 8 ஸ்பீடு ஆட்டோமேட்டிக் டிரான்ஸ்மிஷன் தேர்வு ஸ்டாண்டர்டாக வழங்கப்படுகிறது.

இன்ஜின் சக்தியானது, 'க்வாட்ரோ' தொழில்நுட்பம் மூலம் நான்கு சக்கரங்களுக்கும் செலுத்தப்படும். எஸ்5 ஸ்போர்ட்பேக் கார், பூஜ்ஜியத்தில் இருந்து மணிக்கு 100 கிலோ மீட்டர்கள் என்ற வேகத்தை வெறும் 4.7 வினாடிகளில் எட்டி விடும் என ஆடி நிறுவனம் தெரிவித்துள்ளது. சொகுசு கார் பிரியர்கள் மத்தியில் ஆடி எஸ்5 ஸ்போர்ட்பேக் பெரும் எதிர்பார்ப்பை ஏற்படுத்தியுள்ளது.