ஷோரூம் வளாகத்திற்குள் காட்சிதந்த பிஎஸ்6 இசுஸு டி-மேக்ஸ் பிக்அப்-ட்ரக்!! படங்கள் வெளியீடு!

தற்போது அறிமுகப்படுத்தப்பட்டிருக்கும் புதிய தலைமுறை டி-மேக்ஸ் பிக்அப் ட்ரக்குகள் ஜப்பான் சந்தையில் 2019ல் அறிமுகப்படுத்தப்பட்டவை ஆகும். முந்தைய தலைமுறையில் இருந்து இதன் வெளிப்புற தோற்றத்தில் பெரிய அளவில் எந்த மாற்றமும் இல்லை.

மிகவும் சிறிய அளவிலான காஸ்மெட்டிக் மாற்றங்கள் மட்டுமே கொண்டுவரப்பட்டுள்ளன. முன்பக்க ஹெட்லைட், அகலமான க்ரில், செவ்வக வடிவிலான டெயில்லைட்களின் வடிவம் அப்படியே வழங்கப்பட்டுள்ளது. புதியது எதுவென்று பார்த்தால் ஹை-லேண்டர் வேரியண்ட் தான்.

இசுஸு டி-மேக்ஸ் வாகனத்தின் வரிசையில் விலை குறைவான வேரியண்ட்டாக இது கொண்டுவரப்பட்டுள்ளது. விலை குறைவான வேரியண்ட்டாக இருப்பினும் இரட்டை முன்பக்க காற்றுப்பைகள் இதில் வழங்கப்பட்டுள்ளன.

இதனுடன் டி-மேக்ஸ் ஹை-லேண்டரில் ஐசோஃபிக்ஸ் குழந்தைகளுக்கான இருக்கை ஹேங்கர், ரிவர்ஸ் பார்க்கிங் சென்சார்ஸ், இபிடி உடன் ஏபிஎஸ், 6 வழிகளில் மேனுவலாக அட்ஜெஸ்ட் செய்துக்கொள்ளக்கூடிய ஓட்டுனர் இருக்கை, பின் இருக்கை பயணிகளுக்கும் மேனுவல் ஏசி மற்றும் வீல் கவர்கள் உடன் 16 இன்ச்சில் இரும்பு சக்கரங்கள் முதலியவையும் பொருத்தப்படுகின்றன.

சற்று விலை அதிகம் கொண்ட வி-கிராஸில் இருந்து ஹை-லேண்டரை வேறுப்படுத்தும் பாகங்களுள் இரும்பு சக்கரங்களை முக்கியமானவைகளாக சொல்லலாம். இசட் & இசட் பிரெஸ்டிஜ் என்கிற இரு விதமான ட்ரிம் நிலைகளில் டி-மேக்ஸ் விற்பனை செய்யப்பட்டு வருகிறது.

வழங்கப்படும் வசதிகள் இசட் மற்றும் இசட் பிரெஸ்டிஜ் ட்ரிம்களில் வித்தியாசப்படுகின்றன. பிஎஸ்6 தரத்திற்கு மேம்படுத்தப்பட்ட 2021 இசுஸு டி-மேக்ஸில் 1.9 லிட்டர், டர்போசார்ஜ்டு, இன்லைன்-4 சிலிண்டர் என்ஜின் பொருத்தப்படுகிறது.

அதிகப்பட்சமாக 163 பிஎஸ் மற்றும் 360 என்எம் டார்க் திறனை வெளிப்படுத்தக்கூடிய இந்த டீசல் என்ஜின் உடன் 6-ஸ்பீடு மேனுவல் 6-ஸ்பீடு ஆட்டோமேட்டிக் என்ற ட்ரான்ஸ்மிஷன் தேர்வுகள் கொடுக்கப்படுகின்றன.

மேலும் இவற்றுடன் 2-சக்கர ட்ரைவ் மற்றும் 4-சக்கர ட்ரைவ் தேர்விலும் இந்த பிக்அப் ட்ரக் வாகனம் கிடைக்கிறது. ஆனால் மேனுவல்-2சக்கர ட்ரைவ் தேர்வில் மட்டுமே கிடைக்கும் டி-மேக்ஸ் ஹை-லேண்டரின் விலை ரூ.16.98 லட்சமாக உள்ளது.

வி-கிராஸின் இசட் ட்ரிம்-இன் விலை மேனுவல்-2சக்கர ட்ரைவ் தேர்வுடன் ரூ.19.98 லட்சமாகவும், மேனுவல்-4சக்கர ட்ரைவ் தேர்வுடன் ரூ.20.98 லட்சமாகவும் நிர்ணயிக்கப்பட்டுள்ளது. ஆட்டோமேட்டிக் ட்ரான்ஸ்மிஷன் -4சக்கர ட்ரைவ் தேர்வுடன் மட்டுமே கிடைக்கும் டி-மேக்ஸ் வி-க்ராஸ் இசட்-பிரெஸ்டிஜின் விலை ரூ.24.49 லட்சமாக உள்ளது.