2021 ஹோண்டா எச்ஆர்-வி எஸ்யூவி காருக்கான ஆக்ஸஸரீகள் வெளியீடு!! ஜப்பானில் ஏப்ரலில் அறிமுகமாகிறது...

ஜப்பானை சேர்ந்த ஹோண்டா நிறுவனம் சமீபத்தில்தான் புதிய தலைமுறை எச்ஆர்-வி காரை உலகளவில் வாடிக்கையாளர்களின் பார்வைக்கு கொண்டுவந்தது. வெஸல் என்ற பெயரில் இந்த நடுத்தர அளவு எஸ்யூவி கார் வருகிற ஏப்ரல் மாதத்தில் முதலாவதாக ஜப்பானில் நாட்டில் அறிமுகப்படுத்தப்படவுள்ளது.

அதற்கு முன்னதாக தான் தற்போது இந்த க்ராஸ்ஓவருக்கான ஆக்ஸஸரீகள் அர்பன் ஸ்டைல் மற்றும் கேஷுவல் ஸ்டைல் என்ற இரு விதமான பெயர்களில் அதிகாரப்பூர்வமாக வெளியிடப்பட்டுள்ளன. இதில் அர்பன் ஸ்டைல் தொகுப்பில் திருத்தியமைக்கப்பட்ட முன்பக்க மற்றும் பின்பக்க பம்பர் கார்னிஷ் அடங்குகின்றன.

இந்த கார்னிஷ் ஆக்ஸஸரீ, பம்பர்களின் அகலத்தை அதிகரிக்கும் வகையில் க்ரோம் ட்ரிம்-ஆக வழங்கப்படும். இவற்றுடன் இந்த ஆக்ஸஸரீ தொகுப்பில் பம்பர்களுக்கு தாழ்வான ஸ்கிர்ட்டையும் வாடிக்கையாளர் பெறலாம்.

மேலும் எச்ஆர்-வி காரில் வழங்கப்பட்டுள்ள மல்டி-ஸ்லாட் டிசைனிலான க்ரில்லிற்கு பதிலாக இந்த ஆக்ஸஸரீ தொகுப்பை வாங்குவதன் மூலம் எண்கோண வடிவிலான மெஷ் க்ரில்-ஐ பெறலாம். அதேபோல் பின்பக்கத்தில் எக்ஸாஸ்ட் குழாய் க்ரோமில் வடிவமைக்கப்பட்டு வழங்கப்படும்.

இவற்றுடன் பக்கவாட்டின் அடிப்பகுதியில் கார்னிஷ் மற்றும் மேற்கூரையில் பொருத்தப்பட்ட ஸ்பாய்லரையும் பின்பக்கத்தில் இந்த ஆக்ஸஸரீ தொகுப்பில் வாங்கலாம். கேஷூவல் ஸ்டைல் தொகுப்பில் கேஷுவலான தோற்றத்திற்காக காரை சுற்றிலும் வழங்கப்படும் கண்ணை கவரும் க்ரோமிற்கு மாற்றாக காப்பர் பாகங்கள் வழங்கப்படும்.

இந்த ஆக்ஸஸரீ தொகுப்பில் பெரும்பான்மையான பாகங்கள் அர்பன் ஸ்டைல் தொகுப்பில் வழங்கப்படுபவையாக தான் உள்ளன. அதாவது, அதில் க்ரோம் துண்டுகளுடன் வழங்கப்படுபவை இதில் காப்பர் துண்டுகளுடன் வழங்கப்படும் அவ்வளவுதான்.

அவற்றில் இருந்து கூடுதலாக புதிய பக்கவாட்டு கண்ணாடிகளின் மூடிகளை கேஷுவல் ஸ்டைல் தொகுப்பில் பெறலாம். இந்த ஆக்ஸஸரீகளுக்கான விலைகள் குறித்த விபரங்கள் எதுவும் தற்போதைக்கு வெளியிடப்படவில்லை. அவற்றை அடுத்த சில மாதங்களில் எதிர்பார்க்கலாம்.