இமயமலை பகுதியில் சோதனையில் 2021 மஹிந்திரா ஸ்கார்பியோ!! அட... அறிமுகம் எப்போ தாங்க?

மஹிந்திரா நிறுவனம் இந்த 2021ஆம் ஆண்டிற்குள்ளாக புதிய தலைமுறை ஸ்கார்பியோவை இந்தியாவில் அறிமுகப்படுத்த தயாராகி வருகிறது. இதன் ஒரு பகுதியாக தற்போது இந்த எஸ்யூவி கார் சோதனை ஓட்டத்தின்போது அடையாளப்படுத்தப்பட்டுள்ளது.

இந்த சோதனை ஓட்டம் காரின் செயல்திறனை சோதிக்கும் வகையில் உயரத்தில் சாலைகளை கொண்ட இமாலய மலை பகுதிகளில் மேற்கொள்ளப்பட்டுள்ளது. இதனால் புதிய ஸ்கார்பியோவில் நிச்சயம் புதிய என்ஜின் தேர்வுகளை எதிர்பார்க்கலாம் என கூறப்படுகிறது.

ஜிக்வீல்ஸ் செய்திதளம் மூலம் கிடைத்துள்ள இது தொடர்பான ஸ்பை படங்களில் சோதனை ஸ்கார்பியோ மாதிரி கார் முழுவதும் மறைப்பால் மறைக்கப்பட்டுள்ளது. இருப்பினும் காரில் கொண்டுவரப்பட்டுள்ள மாற்றங்களை நம்மால் பார்க்க முடிகிறது.

முக்கியமாக காரின் பரிமாண அளவுகள் அனைத்தும் அதிகரிக்கப்பட்டிருப்பதை இங்கு கூற வேண்டும். இதன் காரணமாக உட்புறத்தில் நன்கு விசாலமாக பெரிய அளவில் காலியிடத்தை எதிர்பார்க்கலாம்.

நமக்கு கிடைத்துள்ள ஸ்பை படங்களில் சோதனை ஸ்கார்பியோ முன்பக்கத்தில் அகலமான க்ரில், ஒருங்கிணைக்கப்பட்ட டிஆர்எல்களுடன் ரீஸ்டைலில் எல்இடி ஹெட்லேம்ப்கள் மற்றும் மறுவேலை செய்யப்பட்ட பம்பர்களை கொண்டுள்ளது.

இவற்றுடன் அப்டேட் செய்யப்பட்ட எல்இடி டெயில்லேம்ப்கள், புதிய அலாய் சக்கரங்கள் உள்ளிட்டவற்றையும் புதிய ஸ்கார்பியோ பெற்றுவரும் என எதிர்பார்க்கப்படுகிறது. வெளிபுறத்தை காட்டிலும் உட்புறத்தில்தான் மிக முக்கியமான அப்கிரேட்களை ஸ்கார்பியோவிற்கு மஹிந்திரா நிறுவனம் வழங்கியுள்ளது.

இதில் ஆண்ட்ராய்டு ஆட்டோ, ஆப்பிள் கார்ப்ளே மற்றும் பிராண்டின் இணைப்பு தொழிற்நுட்பத்தை ஏற்கக்கூடிய பெரிய இன்ஃபோடெயின்மெண்ட் சிஸ்டம் போன்றவை அடங்கலாம். அதுமட்டுமில்லாமல் தற்போதைய ஸ்பை படங்கள் 2021 ஸ்கார்பியோ பனோராமிக் சன்ரூஃபையும் பெற்று வரவுள்ளதை உறுதிப்படுத்துகின்றன.

இருப்பினும் இவை அனைத்தை விடவும் புதிய தலைமுறை ஸ்கார்பியோவிற்கு அதன் மூன்றாவது இருக்கை வரிசைதான் அடையாளமாக விளங்கவுள்ளது. இதைதான் வாடிக்கையாளர்களை கவரும் அம்சமாகவும் மஹிந்திரா நிறுவனம் பயன்படுத்தவுள்ளது.

புதிய மஹிந்திரா ஸ்கார்பியோ பெட்ரோல் மற்றும் டீசல் என இரு விதமான என்ஜின் தேர்வுகளில் விற்பனை செய்யப்படும் என தெரிகிறது. அதாவது 2020 மஹிந்திரா தாரில் வழங்கப்பட்டுள்ள 2.2 லிட்டர் ‘எம்ஹாவ்க்' டீசல் என்ஜின் 2021 ஸ்கார்பியோவிற்கும் தொடரப்படலாம்.

அதேபோல் புதிய தலைமுறை தார் ஏற்றுள்ள 2.0 லிட்டர் டி-ஜிடிஐ பெட்ரோல் என்ஜின் தேர்வும் மஹிந்திராவின் இந்த புதிய அறிமுகத்திற்கு வழங்கப்படவுள்ளது. இந்த என்ஜின்களுடன் ஸ்டாண்டர்டாக மேனுவல் கியர்பாக்ஸும், கூடுதல் தேர்வாக ஆட்டோமேட்டிக் கியர்பாக்ஸும் கொடுக்கப்படலாம்.

மஹிந்திரா சமீபத்தில் ‘ஸ்கார்பியோ என்' மற்றும் ஸ்டிங் என்ற இரு பெயர்களை பதிவு செய்து கொண்டுள்ளது. இவை இரண்டும் புதிய தலைமுறை ஸ்கார்பியோவிற்கு பயன்படுத்தப்படும் என தகவல்கள் கூறினாலும், இதுகுறித்த அதிகாரப்பூர்வ அறிவிப்பு எதுவும் தயாரிப்பு நிறுவனத்தில் இருந்து இதுவரை வெளிவரவில்லை.