மாதத்திற்கு சராசரியாக 1.5 லட்ச கார்களை விற்பனை செய்யக்கூடிய மாருதி-க்கா இந்த நிலைமை? 21.4% வளர்ச்சியுடன் டாடா!

கொரோனா வைரஸ் பரவல் கடந்த சில மாதங்களாக கட்டுக்குள் உள்ளது. இதனால் பெரும்பாலான மாநிலங்களில் ஊரடங்கு என்பதே இல்லை. இருப்பினும் கடந்த செப்டம்பர் மாதத்தில் இந்திய சந்தையில் கார்கள் விற்பனை சுமார் 36.6% குறைந்துள்ளது.

கடந்த 2021 செப்டம்பர் மாதத்தில் 1,85,636 பயணிகள் கார்கள் விற்பனை செய்யப்பட்டுள்ளன. அதுவே கடந்த 2020ஆம் ஆண்டு இதே செப்டம்பரில் கிட்டத்தட்ட 2,92,858 கார்கள் விற்பனை செய்யப்பட்டு இருந்தன. அதேபோல் இதற்கு முந்தைய 2021 ஆகஸ்ட் மாதத்துடனான ஒப்பிடுகையிலும் தற்போதைய விற்பனை எண்ணிக்கை 28.5% குறைவாகும்.

இவ்வாறு இந்தியாவில் கார்கள் விற்பனை பெரிய அளவில் குறைந்திருப்பதற்கு காரணம், இந்தியாவின் முன்னணி ஆட்டோமொபைல் நிறுவனமான மாருதி சுஸுகியின் விற்பனை கடந்த மாதத்தில் வழக்கத்தை காட்டிலும் பாதிக்குமேல் குறைந்துள்ளது. குறைக்கடத்திகளின் பற்றாக்குறையால் செப்டம்பரில் கார்கள் தயாரிப்பை சுமார் 60% குறைத்து கொள்ளவுள்ளதாக மாருதி சுஸுகி அறிவித்திருந்தது.

இதனால் இந்த நிறுவனத்தின் கார்களை முன்பதிவு செய்தவர்களுக்கு குறித்த நேரத்தில் டெலிவிரி செய்ய முடியவில்லை. இதன் விளைவாகவே மாருதி சுஸுகி கார்களின் விற்பனை 2020 செப்டம்பரை காட்டிலும் 57.3% குறைந்துள்ளது. 2020 செப்டம்பரில் 1,47,912 மாருதி கார்கள் விற்பனையாகி இருந்த நிலையில், கடந்த மாதத்தில் வெறும் 63,111 கார்களே விற்கப்பட்டுள்ளன.

அதேபோல் மற்றொரு முன்னணி கார் தயாரிப்பு நிறுவனமான ஹூண்டாயின் கார்கள் விற்பனையும் கடந்த மாதத்தில் 34.2% சரிந்துள்ளது. கடந்த செப்டம்பரில் மொத்தம் 33,087 ஹூண்டாய் கார்கள் இந்தியாவிலும், இந்தியாவில் இருந்து வெளிநாடுகளிலும் விற்பனை செய்யப்பட்டுள்ளன. ஆனால் 2020 செப்டம்பரில் 50,313 கார்களை இந்த தென்கொரிய நிறுவனம் விற்பனை செய்திருந்தது.

இந்த இரு முன்னணி நிறுவனங்களின் விற்பனை குறைந்திருந்தாலும், டாடா மோட்டார்ஸின் பயணிகள் கார்கள் விற்பனை 21.4% அதிகரித்துள்ளது. 2020 செப்டம்பரில் 21,200 டாடா கார்கள் விற்பனை செய்யப்பட்டு இருந்தன. ஆனால் கடந்த மாதத்தில் 25,719 டாடா கார்கள் விற்கப்பட்டுள்ளன. இந்த வகையில் டாடா நிறுவனத்தின் கார்கள் விற்பனை 21.4% உயர்ந்துள்ளது.

கார்களை சந்தைப்படுத்துவதில் டாடா மோட்டார்ஸின் செயல்பாடுகள் கடந்த சில மாதங்களாக மிக சிறப்பாக இருந்து வருகிறது. இதுவே இந்த 21.4% வளர்ச்சிக்கு காரணமாகும். அதிலும் குறைக்கடத்திகளின் உலகளாவிய பற்றாக்குறையால் மாருதி சுஸுகி, ஹூண்டாய் போன்ற முன்னணி நிறுவனங்களே ஆட்டம் கண்டுள்ள தற்போதைய சூழலில் டாடாவின் விற்பனை அதிகரித்து இருப்பது தான் இதில் ஹைலைட்டே.

மிகுந்த எதிர்பார்ப்புக்கு மத்தியில் பஞ்ச் மைக்ரோ-எஸ்யூவி மாடல் இன்று (அக்டோபர் 4) வெளியிடப்பட உள்ளதால் டாடா மோட்டார்ஸின் விற்பனை வரும் மாதங்களில் மேலும் அதிகரிக்கும் என கணிக்கப்பட்டுள்ளது. இதற்கடுத்து இந்த லிஸ்ட்டில் நான்காவது மற்றும் ஐந்தாவது இடங்களில் கியா & மஹிந்திரா நிறுவனங்கள் முறையே 14,441 மற்றும் 12,863 யூனிட் கார்களின் விற்பனை உடன் உள்ளது.

2020 செப்டம்பர் மாத விற்பனை உடன் இவை இரண்டின் விற்பனையும் முறையே 22.7% & 12.3% குறைந்துள்ளது. ஆறாவது இடத்தில் ஜப்பானிய கார் தயாரிப்பு நிறுவனமான டொயோட்டா உள்ளது. கடந்த மாதத்தில் 14.4% வளர்ச்சி உடன் 9,284 கார்களை டொயோட்டா நிறுவனம் விற்பனை செய்துள்ளது. இதனுடன் கடந்த மாதத்தில் ஸ்கோடா, நிஸான் மற்றும் ஃபோக்ஸ்வேகன் நிறுவனங்களின் விற்பனையும் 2020 செப்டம்பரை காட்டிலும் அதிகரித்துள்ளதை மேலுள்ள லிஸ்ட்டில் காணலாம்.