32 லட்ச ரூபாய்க்கு ஃபேன்ஸி நம்பரை ஏலம் கேட்ட நபர்... கடைசியில் செய்த காரியத்தை பார்த்து ஆர்டிஓ ஆடிப்போய்ட்டாரு

இந்தியாவில் கொரோனா வைரஸ் ஊரடங்கு அமலுக்கு வந்த பின்னர் ஏராளமான தனியார் நிறுவனங்கள் கடும் நஷ்டத்தை சந்திக்க வேண்டிய சூழல் ஏற்பட்டது. அத்துடன் பொதுமக்கள் பலருக்கும் வருமானம் குறைந்தது. தனியார் நிறுவனங்கள் மற்றும் பொதுமக்கள் என்றில்லாமல் அரசாங்கமும் வருவாய் இழப்பை சந்திக்க வேண்டிய நெருக்கடிக்கு தள்ளப்பட்டது.

குறிப்பாக ஆர்டிஓ அலுவலகங்கள் மூலம் கிடைக்க வேண்டிய வருவாய் வெகுவாக குறைந்தது. புதிய வாகன பதிவு, ஃபேன்ஸி பதிவு எண்கள் ஏலம் உள்ளிட்ட பல்வேறு பணிகள் மூலம் ஆர்டிஓ அலுவலகங்கள் வருவாய் ஈட்டுகின்றன. ஆனால் ஊரடங்கு தீவிரமாக இருந்த காலகட்டத்தில் இந்த பணிகள் தடைபட்டதால், ஆர்டிஓ அலுவலகங்களுக்கு வருவாய் குறைந்தது.

இதில், குஜராத் மாநிலம் அகமதாபாத் ஆர்டிஓ அலுவலகமும் ஒன்று. இந்தியாவில் கொரோனா வைரஸ் பிரச்னை ஏற்படுவதற்கு முன்பு, வாகனங்களுக்கான ஃபேன்ஸி பதிவு எண்களை ஏலம் விடுவதன் மூலம் அகமதாபாத் ஆர்டிஓ அலுவலகம் கோடிக்கணக்கில் வருமானம் ஈட்டி வந்தது. ஆனால் கொரோனா பிரச்னைக்கு பின்பு, வருமானம் பல லட்ச ரூபாய் குறைந்து விட்டது.

ஆனால் இப்படிப்பட்ட நெருக்கடியான சமயத்திலும் கூட, தங்களது வாகனத்திற்கு தங்களுக்கு பிடித்தமான பதிவு எண்ணை பெறுவதற்கு பல லட்சக்கணக்கான ரூபாயை செலவழிக்கும் நபர்களும் இருக்கவே செய்கின்றனர். இந்த வகையில் அகமதாபாத்தை சேர்ந்த ஒருவர் தன்னுடைய வாகனத்திற்கு பதிவு எண் பெறுவதற்கு 32 லட்ச ரூபாய்க்கு ஏலம் கேட்டுள்ளார்.

தனக்கு விருப்பமான பதிவு எண்ணை பெறுவதற்காக அவர் இவ்வளவு பெரிய தொகைக்கு ஏலம் கேட்டார். ஆனால் அவர் யார்? என்பது தெரியவரவில்லை. எனினும் சரியான நேரத்தில் அவர் பணத்தை செலுத்தவில்லை. எனவே அவரது ஏலத்தை ஆர்டிஓ ரத்து செய்து விட்டார். இதுகுறித்து ஆர்டிஓ அலுவலக அதிகாரிகள் கூறுகையில், ''அகமதாபாத்தை சேர்ந்த ஒருவர் புதிய கார் ஒன்றை வாங்கியுள்ளார்.

அந்த காருக்கு தனக்கு விருப்பமான பதிவு எண்ணை பெறுவதற்கு அவர் விண்ணப்பித்தார். அந்த எண்ணை பெறுவதற்காக அவர் 32 லட்ச ரூபாய்க்கு ஏலம் கேட்டார். எனவே அந்த விண்ணப்பதாரருக்கு அந்த எண்ணை நாங்கள் ஒதுக்கினோம். ஆனால் அவர் சரியான நேரத்தில் பணத்தை செலுத்த தவறியதால், அவரது ஏலத்தை ரத்து செய்துள்ளோம்'' என்றனர்.

அகமதாபாத் ஆர்டிஓ அலுவலகத்தில் கடந்த நவம்பர் மாதம் 11,600 புதிய வாகனங்கள் பதிவு செய்யப்பட்டுள்ளன. இதில், 3,022 வாகனங்களின் உரிமையாளர்கள் தங்களுக்கு விருப்பமான பதிவு எண் கேட்டு விண்ணப்பித்துள்ளனர். எனவே கடந்த நவம்பர் மாதத்தில் மட்டும் ஃபேன்ஸி பதிவு எண் ஏலம் மூலமாக அகமதாபாத் ஆர்டிஓ அலுவலகத்திற்கு 1.09 கோடி ரூபாய் வருமானமாக கிடைத்துள்ளது.

இதுவே கடைசி மூன்று மாத கால அளவில் பார்த்தால் (செப்டம்பர், அக்டோபர், நவம்பர்), ஃபேன்ஸி பதிவு எண் ஏலம் மூலமாக 2.36 கோடி ரூபாய் வருமானமாக கிடைத்துள்ளது. கொரோனா வைரஸ் பிரச்னையால் ஏற்பட்ட கடும் பொருளாதார நெருக்கடிகளுக்கு மத்தியிலும் இவ்வளவு பெரிய தொகைகளுக்கு ஃபேன்ஸி பதிவு எண்கள் ஏலம் எடுக்கப்படுவது வியப்பை ஏற்படுத்தியுள்ளது.

Note: Images used are for representational purpose only.