அதிர்ஷ்டம் இல்லாத பெண்ணின் அவசியமான கண்டுபிடிப்பு... கார் விண்டுஷீல்டு வைப்பர்கள் எப்படி உருவானது?

கார்கள் இல்லாத உலகத்தை உங்களால் கற்பனை செய்து பார்க்க முடியுமா? நிச்சயமாக முடியவே முடியாது. அதேபோல் விண்டுஷீல்டு வைப்பர்கள் (Windshield Wipers) இல்லாத கார்களை கற்பனை செய்து பார்ப்பதும் மிகவும் கடினம். நிழலின் அருமை வெயிலில்தான் தெரியும் என்பது போல, மழை வரும் நேரங்களில்தான் விண்டுஷீல்டு வைப்பர்களின் அருமை புரியும்.

இன்றைய நவீன கால கார்களின் முக்கிய பாகங்களில் ஒன்றாக விளங்கும் விண்டுஷீல்டு வைப்பர்கள் எப்படி உருவானது? யாரால் கண்டுபிடிக்கப்பட்டது? என நீங்கள் என்றாவது யோசித்தது உண்டா? விண்டுஷீல்டு வைப்பர்கள் உருவான கதை மிகவும் சுவாரஸ்யமானது. இந்த கதை கடந்த 1866ம் ஆண்டு பிப்ரவரி 19ம் தேதியில் இருந்து தொடங்குகிறது.

விண்டுஷீல்டு வைப்பர்களை கண்டறிந்த மேரி ஆண்டர்சன் (Mary Anderson), அமெரிக்காவின் அலபாமா மாகாணத்தில் அன்றைய தினம்தான் பிறந்தார். அடிப்படையிலேயே புதிய கண்டுபிடிப்புகளின் மீது ஆர்வம் கொண்டவராக மேரி ஆண்டர்சன் இருந்தார். இதன் விளைவாக உருவானதுதான் இன்றைய நவீன கால கார்களின் விண்டுஷீல்டு வைப்பர்கள்.

கடந்த 1902ம் ஆண்டு நியூயார்க் நகருக்கு மேரி ஆண்டர்சன் சென்றிருந்தார். அங்கு டிராம் (Tram) ஒன்றில் அவர் பயணித்தார். அது பனிப்பொழிவு மிகவும் அதிகமாக இருந்த சமயம். இதனால் ட்ராமின் முன் பக்க கண்ணாடியில் பனி படர்ந்து கொண்டே இருந்தது. எனவே டிரைவர் அடிக்கடி ட்ராமை நிறுத்தி பனியை துடைத்து கொண்டிருந்தார்.

பனியை துடைப்பதற்காக ஒவ்வொரு முறையும் அவர் ஜன்னலுக்கு வெளியே தலையை நீட்ட வேண்டியதாக இருந்தது. ஆனால் அவ்வாறு துடைத்தும் கூட, அவை முழுவதும் சுத்தமாகவில்லை. அத்துடன் இதனால் கால விரயமும் ஏற்பட்டது. இதனை பார்த்த மேரி ஆண்டர்சன் இந்த பிரச்னை தீர்வு கண்டுபிடித்தாக வேண்டும் என்று விரும்பினார்.

பின்பு அலபாமா திரும்பிய மேரி ஆண்டர்சன், புது டிவைஸ் ஒன்றை கண்டுபிடித்தார். ரப்பரால் செய்யப்பட்ட பிளேடு போன்ற அமைப்பு விண்டுஷீல்டில் அங்கும் இங்கும் சென்று பனி, மழை நீரை துடைக்கும் வகையில் இந்த டிவைஸ் உருவாக்கப்பட்டிருந்தது. இதனை டிராமுக்கு உள்ளே இருந்தபடியே டிரைவர்கள் லிவர் மூலமாக இயக்க முடியும்.

இதுதான் இன்றைய நவீன கால விண்டுஷீல்டு வைப்பர்களுக்கு அடிப்படை. ஆனால் தொழில்நுட்பம் வளர்ச்சி அடையாத அன்றைய கால கட்டத்தில், மேரி ஆண்டர்சனின் கண்டுபிடிப்பை மக்கள் ஏற்றுக்கொள்ளவில்லை. ஒருவித சந்தேக கண் கொண்டே பார்த்தனர். இது டிரைவர்களின் கவனத்தை சிதறடித்து விடும் என அவர்கள் கூறினர். இருந்தபோதும் மேரி ஆண்டர்சன் மனம் தளரவில்லை.

இந்த கண்டுபிடிப்பிற்கு காப்புரிமை கேட்டு, கடந்த 1903ம் ஆண்டு ஜூன் 18ம் தேதி அவர் விண்ணப்பித்தார். இதன்பின் 1903ம் ஆண்டு நவம்பர் 10ம் தேதி, அமெரிக்க காப்புரிமை அலுவலகம் இந்த விண்டோ க்ளீனிங் டிவைஸிற்கு காப்புரிமை வழங்கியது. ஆனால் அந்த சமயத்தில் எந்தவொரு நிறுவனமும் மேரி ஆண்டர்சனின் ஐடியாவை ஏற்றுக்கொள்ளவில்லை.

யாரிடம் இருந்தும் ஆதரவு கிடைக்காததால், மேரி ஆண்டர்சன் இம்முறை சற்றே மனம் தளர்ந்து போனார். இதன்பின் கடந்த 1920ம் ஆண்டு அவரது காப்புரிமை காலாவதியானது. ஆனால் அந்த சமயத்தில்தான் ஆட்டோமொபைல்கள் வானளவிய வளர்ச்சியை பெற தொடங்கின. எனவே விண்டுஷீல்டு வைப்பர்களுக்கான தேவையும் உயர்ந்தது.

அதாவது மேரி ஆண்டர்சனின் காப்புரிமை காலாவதியான சமயத்தில்தான், விண்டுஷீல்டு வைப்பர்கள் அங்கீகாரம் பெற தொடங்கியிருந்தன. கேடிலாக்தான் (Cadillac) இந்த வைப்பர்களை அனைத்து கார் மாடல்களிலும் அறிமுகம் செய்த முதல் கார் உற்பத்தியாளர் (1922ம் ஆண்டில்). இதன்பின் அனைத்து நிறுவனங்களும் இதையே பின்பற்ற தொடங்கி விட்டன.

ஆரம்பத்தில் மேரி ஆண்டர்சனின் கண்டுபிடிப்பில் முதலீடு செய்ய யாருமே முன்வரவில்லை. ஆனால் இன்று அவரது கண்டுபிடிப்பு இல்லாத கார்களே கிடையாது. உண்மையில் ஹென்ரி ஃபோர்டு கார்களை உற்பத்தி செய்ய தொடங்குவதற்கு முன்னதாகவே, மேரி ஆண்டர்சன் விண்டுஷீல்டு வைப்பர்களுக்கான காப்புரிமைக்கு விண்ணப்பித்து விட்டார்.

ஆனால் இந்த கண்டுபிடிப்பில் இருந்து தனது வாழ்நாள் முழுவதும் மேரி ஆண்டர்சன் எந்தவித பொருளாதார பலன்களையும் துரதிருஷ்டவசமாக அறுவடை செய்யவில்லை. ஆம், அவர் தனது கண்டுபிடிப்பின் மூலம் கொஞ்சம் கூட பணம் சம்பாதிக்கவில்லை. ஆனால் ஆட்டோமொபைல் வரலாற்றில் அவரது பெயர் என்றென்றும் நிலைத்திருக்கும்.

அதே சமயம் கார்களில் விண்டுஷீல்டு வைப்பர்கள் பயன்படுத்தப்படுவதை மேரி ஆண்டர்சன் எப்படியோ தன் வாழ்நாளில் பார்த்து விட்டார் என்பது குறிப்பிடத்தக்கது. பல்வேறு போராட்டங்களை சந்தித்த மேரி ஆண்டர்சன் கடந்த 1953ம் ஆண்டு ஜூன் 27ம் தேதி இவ்வுலகை விட்டு பிரிந்தார்.

விண்ட்ஷீல்டு கண்டுபிடிச்சு தந்துட்டாங்க, ஓகே, அதை எப்படி பராமரிக்கிறது?, இதோ சில எளிய வழிகளை உங்களுக்காக பிரத்யேகமாக இதேபதிவில் கீழே தொகுத்து வழங்கியுள்ளோம். வாருங்கள் காணலாம்.

என்னதான் கார் ஓட்டுவதில் கை தேர்ந்தவராக இருந்தாலும் தெளிவான் பார்வை திறன் வழங்காத விண்ட்ஷீல்டு இல்லை என்றால் காரை இயக்குவது மிக மிக கடினம். எனவேதான் காரின் எஞ்ஜின் மற்றும் தொழில்நுட்ப கருவிகள்மீது செலுத்துவதைப் போன்ற அதிக பராமரிப்பினை விண்ட்ஷீல்டுகள் மீதும் செலுத்த வேண்டும் என வாகன துறை வல்லுநர்கள் அறிவுறுத்துகின்றனர்.

விண்ட் ஷீல்டுகள் தெளிவான பார்வை வழங்குவதோடு நிறுத்திக் கொள்ளாமல் காற்றில் பறந்து வரும் தூசி மற்றும் சிறிய கற்களில் ஆகியவற்றில் நம்மையும், நம் கண்களையும் பாதுகாக்கும் கருவியாக செயல்படுகின்றது. ஆகையால், இவற்றைத் தனிக் கவனம் கொண்டு பராமரிப்பது சிறந்த பலனையே நமக்கு வழங்கும். சரி, எப்படி காரின் விண்ட்ஷீல்டை பாதுகாப்பது?, வாங்க இதற்கான பதிலைக் கீழே காணலாம்.

தண்ணீரை விரட்டும் பூச்சு:

விண்ட்ஷீல்டில் சிறு இடையூறு இருந்தாலும் தெளிவான பார்வை திறனைப் பெறுவதில் சிக்கல் ஏற்படும். இதற்கு மிக சிறந்த உதாரணம் மழைக் காலம். மழை துளி விண்ட்ஷீல்டின் மீது விழும்போது அது அப்படியே துளி துளியாக தேங்கி நிற்கும். இதனால், வெளிப்புறத்தைப் பார்ப்பதில் லேசான சிக்கல் ஏற்படும்.

குறிப்பாக, எதிர்புறத்தில் அதிக வெளிச்சம் கொண்ட ஒளி விண்ட்ஷீல்டு மீது விழும்போது பார்வை திறனே துளியளவும் இருக்காது. இதனைப் போக்கும் விதமான பூச்சு தற்போது சந்தையில் பயன்பாட்டில் இருக்கின்றது.

இது, உங்களின் காரின் விண்ட்ஷீல்டை தாமரை இலை போல் மாற்றிவிடும். அதாவது, ஒரு துளி நீர் விழுந்தாலும் அதை தங்க விடாமல் உடனடியாக வழுக்கி ஓட செய்து விடும். இதனை ஆங்கிலத்தில் வாட்டர் ரெபெல்லண்ட் கோட்டிங் (Water repellent coating) என குறிப்பிடுவர். கார் சர்வீஸ் மையங்கள் இந்த கோட்டிங்கை குறைந்த கட்டணத்தில் வழங்கி வருகின்றன.

பழைய வைப்பர்களை தூக்கி எறியுங்கள்:

பழைய வைப்பர்களைத் தொடர்ச்சியாக பயன்படுத்துவதன் மூலம் விண்ட்ஷீல்டுகள் அதிக பாதிப்பைச் சந்திக்கின்றன. பொதுவாக, நாம் பயன்படுத்தும் வாகனங்கள் மழையை மட்டுமின்றி அதிக வெயில், பனி போன்ற அனைத்து கால சூழ்நிலைகளையும் சந்திக்கின்றன. ஆகையால், வைப்பர் மென்மை தன்மை நாளடைவில் பாதிப்பைச் சந்திக்கும்.

அதாவது, அதிக வெயிலால் அதன் நெகிழும் தன்மை பாதிப்படையும். இதன் விளைவாக அதிக இருக்கமான தன்மைக்கு மாறி ஸ்கிராட்ச்களை ஏற்படுத்த தொடங்கிவிடும். தொடர்ச்சியாக அதே வைப்பரை பயன்படுத்துவதனால் முதலில் விண்ட்ஷீல்டு ஸ்கிராட்சும், பின்னர், அதன் தெளிவான பார்வைத் தன்மையும் மழுங்கும்.

கடைசியாக, ஹைபீம் மற்றும் அதிக மழை நேரங்களில் வாகனத்தை பயன்படுத்துவது என்பதே சாத்தியமில்லாத செயலாக மாற்றிவிடும். இறுதியில் விபத்தை இது நகர்த்திவிடும். ஆகையால், வைப்பர்கள் பழுதடைந்தோ அல்லது பழையதாகவோ தென்பட்டால் அதை உடனடியாக மாற்றிவிடுங்கள்.

இடைவெளி நிச்சயம் தேவை

உங்களின் காருக்கு முன்னால் பெரிய உருவமோ அல்லது சிறிய உருவம் கொண்ட வாகனமோ எந்த மாதிரியான வாகனம் சென்றுக் கொண்டிருந்தாலும் சற்று இடைவெளிவிட்டு பயணியுங்கள். ஏனெனில், வாகனங்களின் பின் பக்க டயர்களில் சிக்கில் சிறிய கற்கள் அதிக வேகமாக பறந்து வர நேரிடும். இது காரின் விண்ட்ஷீல்டை மிக எளிதில் பாதிக்க செய்யும். ஆகையால், பிற வாகனங்களிடம் இருந்து சற்று இடைவெளிவிட்டு பயணிப்பது பயணத்தையும், விண்ட்ஷீல்டையும் பாதுகாக்க உதவும்.

கை விரல் அல்லது பேப்பரை பயன்டுத்துங்கள்

காரின் முன்பக்க கண்ணாடிகளில் சில நேரங்களில் எளிதில் நீங்காத வகையிலான கரைகள் இடம்பெறலாம். அவற்றை அகற்றை கூர்மையான எந்திரங்களைப் பயன்படுத்துவதற்கு பதிலாக கை விரல் அல்லது பேப்பரை பயன்படுத்துவது சிறந்தது. கூர்மையான பொருளைக் கொண்டு கரையை அகற்றும்போது நம்மை அறியாமலே சிறிய கீறல்களை உருவாக்க நேரிடும்.

நிழலை தேடுங்கள்

வெயில் மிகக் கடுமையாக சுட்டெரித்து வருவதால் விண்ட்ஷீல்டு மிக எளிதில் பாதிப்படைய வாய்ப்புகள் உண்டு. இதனைத் தவிர்க்க காரை நிழல் நிறைந்த பகுதியில் நிறுத்துவதே மிக சிறந்தது. இது காரின் புதுப்பொலிவைக் காக்கவும் உதவும். இதுமட்டுன்றி, ஏசி ஆன் செய்யாமலே கேபினை கூலாக வைத்திருக்க உதவும். இதுபோன்ற பல்வேறு நன்மைகளை வெயில் அல்லாத பகுதியில் காரை நிறுத்துவதன் மூலம் பெற முடியும்.