அட்டகாசமான வசதிகளுடன் மேட்-இன்-இந்தியா இசைக்கிள்... இதோட விலை எவ்ளோ தெரியுமா?

மஹாராஷ்டிரா மாநிலம், புனேவை மையமாகக் கொண்டு இயங்கும் மின் வாகன உற்பத்தி நிறுவனம் இ-மோட்டாராட். இது ஆரம்பநிலை மின் வாகன உற்பத்தி நிறுவனம் ஆகும். இந்த நிறுவனமே தனது இரண்டாம் இ-பைக் ஒன்றை நாட்டில் அறிமுகப்படுத்த தற்போது தயாராகி வருவதாக தகவல்கள் வெளியாகியுள்ளன.

டி-ரெக்ஸ் எனும் இ-பைக்கையே அது விற்பனைக்கு அறிமுகப்படுத்த இருக்கின்றது. இந்த மாதத்தின் இறுதியில் அல்லது முடிவிற்கு பின் இந்த இ-சைக்கிளை அது களமிறக்கிவிடும் என தகவல்கள் தெரிவிக்கின்றன. இந்த நிறுவனத்தின் முதல் அறிமுகம் இஎம்எக்ஸ் ஹார்ட்கோர் டிரெய்ல் இ-பைக்காகும். இதனைத் தொடர்ந்தே தற்போது டி-ரெக்ஸ் அறிமுகம் செய்யப்பட இருக்கின்றது.

தினசரி பயன்பாட்டைக் கருத்தில் கொண்டு இந்த இ-சைக்கிள் உருவாக்கப்பட்டிருக்கின்றது. அவ்வாறு, தினந்தோறும் பயன்படுத்தும்போது சிறுதுளியளவும் களைப்பை ஏற்படுத்தாத வண்ணம் இருக்க வேண்டும் என்பதற்காக பல்வேறு சிறப்பு வசதிகளை இ-சைக்கிளில் தயாரிப்பு நிறுவனம் சேர்த்திருக்கின்றது.

மோனோஷாக் சஸ்பென்ஷன், மிருதுவான இருக்கை வசதி உள்ளிட்டவை வழங்கப்பட்டிருக்கின்றன. இது மிகவும் மோசமான சாலையில்கூட சௌகரியமான பயண அனுபவத்தை வழங்கக் கூடியவை. இந்த சஸ்பென்ஷனை அட்ஜெஸ்ட் செய்துகொள்ள முடியும் என்பது கூடுதல் சிறப்பு.

எனவே இச்சைக்கிளை ஒரு முறை பயன்படுத்தினால் ருசி கண்ட பூனையைப் போல் தினமும் இச்சைக்கிளைப் பயன்படுத்தும் ஆர்வம் ஏற்படும் என கூறப்படுகின்றது. இதன் டாப் ஸ்பீடு மணிக்கு 25 கிமீ வேகம் ஆகும்.

இந்த அதிகபட்ச வேகத்திற்காக 250W திறன் கொண்ட பிரஷ்லெஸ் மின் மோட்டார் பயன்படுத்தப்பட்டிருக்கின்றது. இது 374 வாட்கள் (watts) வரையிலான திறனை வெளிப்படுத்தக் கூடியது. இது 0.5 பிஎஸ் திறனுக்கு சமம் ஆகும். இத்துடன், மிக இலக எடைக் கொண்ட அலுமினியம் ஃபிரேமே இச்சைக்கிளில் பயன்படுத்தப்பட்டிருக்கின்றது.

ஆகையால், இதனைக் கையாள்வது என்பது மிக சுலபமானதாகும். இத்துடன், இச்சைக்கிளின் மின்சார தேவையைப் பூர்த்தி செய்வதற்காக 36V-7.8Ah திறன் கொண்ட பேட்டரி பயன்படுத்தப்பட்டிருக்கின்றது. இதனை ஒரு முறை முழுமையாக சார்ஜ் செய்தால் சுமார் 60 கிமீ தூரம் வரை பயணிக்க முடியும்.

இந்த பேட்டரிகளை எந்த பிளக் பாயிண்டில் வைத்து வேண்டுமானாலும் சார்ஜ் செய்து கொள்ளும் வசதியை இமோட்டாராட் வழங்கியிருக்கின்றது. ஆகையால், சார்ஜ் மையத்தில்தான் சார்ஜ் செய்யவேண்டும் என்ற நிலை தவிர்க்கப்பட்டுள்ளது. ஆகையால்,அலுவலகம் அல்லது வீடுகளையே நமக்கான சார்ஜ் மையமாக மாற்றிக் கொள்ள முடியும்.

இதுதவிர, பேட்டரியின் சார்ஜ் அளவு, வேகம், பெடல் அசிஸ்டின் லெவல், இடைவெளி தூரம் என பலவற்றைக் காண்பிக்கக் கூடிய எல்சிடி திரை, எல்இடி மின் விளக்கு மற்றும் டிஸ்க் பிரேக் உள்ளிட்ட அம்சங்களும் வழங்கப்பட்டிருக்கின்றன. இவற்றுடன் பிரத்யேக வசதியாக 7 ஸ்பீடு கொண்ட ஷிமானோ டிரெயலியர் வன்பொருள் கருவியாக சேர்க்கப்பட்டிருக்கின்றது.

இந்த தனித்துவமான வசதிகளைக் கொண்ட டிரெக்ஸ் இ-பைக்கை ரூ. 45 ஆயிரம் என்ற விலையில் விற்பனைச் செய்ய இமோட்டாராட் திட்டமிட்டிருக்கின்றது. ஆன்லைனில் தற்போது புக்கிங் நடைபெற்று வருகின்றது. அனைத்து வாடிக்கையாளர்களையும் கவரும் நோக்கில் இந்த இ-பைக்கிற்கு பிரத்யேக இஎம்ஐ திட்டத்தையும் அது அறிவித்திருக்கின்றது.