5 ஆண்டுகளில் 50% மதிப்பு கூட இருக்காது... 10 லட்ச ரூபாயில் புதுசா கார் வாங்குறதை விட இதுதான் எப்பவும் பெஸ்ட்!!

இந்தியாவில் ரூ.10 லட்சம் முதலீடு செய்யும்போது, புதியதாக கார் வாங்குவதை விட தங்கத்தில் முதலீடு செய்வதே சிறந்த நிதி ஆதாயங்களை வழங்கும். கார் ஒரு மதிப்பிழக்கும் சொத்து என்பதால், அதன் மதிப்பு காலப்போக்கில் குறைகிறது. ஆனால், தங்கம் வரலாற்று ரீதியாக வளர்ந்து, பணவீக்கத்திற்கு எதிரான வலுவான பாதுகாப்பாக நிற்கிறது.

இதனாலேயே, ரூ.10 லட்சம் வைத்துள்ளீர்கள்... அதில் புத்தம் புதிய கார் வாங்குவதா அல்லது தங்கம் வாங்குவதா என குழம்புபவர்களுக்கு, மேம்பட்ட நிதி வருமானத்திற்கு ரூ.10 லட்சத்தை தங்கத்தில் முதலீடு செய்ய பரிந்துரைக்கப்படுகிறது. அத்தியாவசிய பயன்பாடு மற்றும் சொகுசான வாழ்க்கையை கார் அளித்தாலும், அது செல்வத்தை சேர்க்கும் சொத்து அல்ல.

தங்கம் நீண்ட காலமாக கணிசமான வளர்ச்சி கண்டு, பணவீக்கம் மற்றும் பொருளாதார நிச்சயமற்ற சூழல்களிலும் அதன் மதிப்பை பாதுகாத்துக் கொள்கிறது. புதிய காரை ரூ.10 லட்சத்தில் பார்த்து பார்த்து வாங்கினாலும் ஷோரூமில் இருந்து வெளியே எடுத்த உடனேயே அதன் மதிப்பு குறையத் தொடங்கும். முதல் ஆண்டிலேயே ஒரு காரின் மதிப்பில் 20-30% வரை தேய்மானம் ஏற்படலாம்.

ஐந்து ஆண்டுகளில் அது அசல் விலையில் சுமார் 50% மட்டுமே எஞ்சியிருக்கும். எரிபொருள், பராமரிப்பு, காப்பீடு மற்றும் வரிகள் போன்ற தொடர்ச்சியான செலவுகளும் நிதிச் சுமையை அதிகரிக்கும். ஆகையால், கார் ஒரு பயன்பாட்டுச் செலவே தவிர, நிதி முதலீடு அல்ல. தங்கம் அடிப்படையிலேயே வளர்ச்சி பெறும் சொத்தாகும்.

கடந்த பல ஆண்டுகளில் தங்கத்தின் மதிப்பு உயர்ந்து, அதனை வாங்கும் சக்தியை வியக்கத்தக்க வகையில் அதிகரித்துள்ளது. உதாரணமாக, 1990களில் ஒரு கிலோ தங்கம் ஒரு சிறிய காரின் மதிப்பில் இருந்தது. ஆனால், தற்போதைய 2026இல் அதே ஒரு கிலோ தங்கத்தில் ஒரு சொகுசு எஸ்யூவி (Luxury SUV) காரை வாங்குவதே சிரமமாக உள்ளது.

நிதி நிபுணர்கள், 2026ஆம் ஆண்டு இறுதிக்குள் 10 கிராம் தங்கத்தின் விலை ரூ.1.5 லட்சம் முதல் ரூ.1.75 லட்சம் வரை உயரக்கூடும் என கணிக்கின்றனர். உலகளாவிய நிலையற்ற தன்மையும், பாதுகாப்பான முதலீட்டுக்கான தேவையும் இதற்குக் காரணங்கள் ஆகும். சவரன் தங்கப் பத்திரங்கள் (SGBs) அல்லது கோல்ட் இ.டி.எஃப் (Gold ETFs) போன்ற டிஜிட்டல் முதலீடுகள், கார் பராமரிப்பு செலவுகளை விட லாபகரமானவை.

இருப்பினும், இன்றைய கால அன்றாட பயன்பாட்டிற்கு கார் மிகவும் அத்தியாவசியமான ஒன்றாக உள்ளதை மறுக்க முடியாது. இதுதான் பலரது கார் கொள்முதலை நியாயப்படுத்துகிறது. ஆனால், செல்வம் சேர்க்கும் கண்ணோட்டத்தில், இது ஒரு சுமையே. 2026இல் 10 கிராம் தங்கத்தின் விலை ரூ.1.5 லட்சம் என அதிகரிக்கும் சாத்தியம், அடுத்த ஐந்தாண்டுகளில் கார் சந்திக்கும் 50% தேய்மானத்தை விட, ரூ.10 லட்சம் முதலீட்டிற்குச் சிறந்த வாய்ப்பை வழங்கிறது.

டிரைவ்ஸ்பார்க் கருத்து: நிதி நிபுணர்கள், மக்களிடம் தங்கத்திற்கென ஒரு சிறிய ஒதுக்கீட்டை (சுமார் 10- 12.5%) பரிந்துரைக்கின்றனர். தங்கம் முதன்மையான முதலீடாக அதிக நிதி வளர்ச்சி அளிக்கக்கூடியதாக இல்லாமல் இருந்தாலும், பொருளாதார நிச்சயமற்ற தன்மைகளுக்கு எதிராக பாதுகாப்பான புகலிடமாகச் செயல்படுகிறது. தங்கம் மீதான முதலீடுகள் உலகளவில் தொடர்ந்து அதிகரித்து வருவதால், அதன் மதிப்பு குறைவதற்கான வாய்ப்புகள் மிகவும் குறைவாகவே உள்ளன.

தங்கத்தில் இருக்கும் சேதாரம், செய்கூலி போன்ற செலவீனங்களை தவிர்த்து, அதனை காட்டிலும் சிறந்த முதலீட்டை எதிர்பார்ப்பவர்களுக்கு, டிஜிட்டல் தங்கம், கோல்ட் ஈடிஎஃப் (Gold ETFs) அல்லது சவரன் தங்கப் பத்திரங்கள் (SGBs) போன்ற ஆப்ஷன்கள் சிறந்தவையாக இருக்கும். அதேநேரம் ஏற்கனவே கூறியதுபோல், இன்றைய மாடர்ன் உலகில், நகர்புறங்களில் கார் இல்லாத வீடே பார்க்க முடியாத அளவிற்கு கார்கள் நம் அன்றாட வாழ்க்கையோடு ஒன்றிப்போய் விட்டன. ஆதலால், உங்களது முதலீடு எதை நோக்கி இருக்க வேண்டும் என்பதை சரியாக யோசித்து தேர்ந்தெடுக்கவும்.