கிராமத்தில் இருந்தாலும் இதில் ஒரு இ-ஸ்கூட்டரை கண்ணை மூடிட்டு வாங்கலாம்! புக் செய்யும்முன் இதை தெரிஞ்சிக்கோங்க!

தமிழ்நாட்டின் கிராமப்புறங்களில் உள்ள பல்வேறு சாலைகள் மற்றும் நிலப்பரப்புகளுக்கு ஏற்ற எலக்ட்ரிக் ஸ்கூட்டர்களைத் தேர்ந்தெடுக்கும்போது, வலுவான சஸ்பென்ஷன் (Suspension), அதிக கிரவுண்ட் கிளியரன்ஸ் (Ground Clearance) மற்றும் நீண்ட தூரம் பயணிக்கும் திறன் ஆகியவற்றை ஆராய்ந்து பார்க்க வேண்டும். மேலும், கிராமப்புறங்களில் கிடைக்கும் உள்ளூர் சார்ஜிங் நெட்வொர்க்கின் தரமும் முக்கியமாக கருத்தில் கொள்ள வேண்டியவை.

ஆம்பியர் மேக்னஸ் இஎக்ஸ் (Ampere Magnus EX) மற்றும் ஒகினாவா பிரைஸ்ப்ரோ (Okinawa PraisePro) போன்ற இ-ஸ்கூட்டர் மாடல்கள் இதற்கான சிறந்த தேர்வுகளாகும். கிராமப்புற பயன்பாட்டிற்கான பரிந்துரைக்கப்பட்ட எலெக்ட்ரிக் ஸ்கூட்டர்கள் (Electric Scooters) இங்கு பட்டியலிடப்பட்டுள்ளன. இவை, பல்வேறு சாலை நிலைமைகளை சமாளிக்கக்கூடிய நீண்ட தூர பயணத் திறன் மற்றும் உறுதியான சஸ்பென்ஷன் அமைப்புகளுக்காக அறியப்படுகின்றன.

ஆம்பியர் மேக்னஸ் இ.எக்ஸ் (Ampere Magnus EX): இந்த எலெக்ட்ரிக் ஸ்கூட்டர் வலிமையான கட்டமைப்புடன் வருகிறது. ஒருமுறை சார்ஜ் செய்தால் உற்பத்தி நிறுவனத்தால் கூறப்படும் 121 கிமீ தூரம் வரை பயணிக்க முடியும். இது கிராமங்களுக்கு இடையேயோ அல்லது அருகிலுள்ள நகரங்களுக்கோ செல்வதற்கு ஏற்றது.

கடினமான சாலைகளில் நிலையான ஹேண்ட்லிங்கிற்காக உருவாக்கப்பட்டுள்ள இதன் வலுவான சஸ்பென்ஷன் அமைப்பு துணைபுரிகிறது. ஆம்பியர் மேக்னஸ் இஎக்ஸ், கையடக்க பேட்டரி பேக் உடன் வருகிறது. இது வெவ்வேறு இடங்களில் சார்ஜ் செய்வதற்கான வசதியை வழங்குகிறது. இதனால் பயனர்கள் சார்ஜிங் நிலையங்களை நாடி அலைய வேண்டிய அவசியம் குறைகிறது.

ஒகினாவா பிரைஸ்ப்ரோ (Okinawa PraisePro): 1 kW பிஎல்டிசி (BLDC) மோட்டார் மற்றும் வலிமையான சேசிஸ் உடன் அசத்தலான செயல்திறனை வழங்கும் இந்த எலெக்ட்ரிக் ஸ்கூட்டரின் முக்கிய சிறப்பம்சமான க்னாப்பி (Knobby) டயர்கள், பல்வேறு சாலைகளில் சிறப்பாக செயல்படுவதாக விமர்சகர்கள் குறிப்பிடுகின்றனர். இது மூன்று விதமான ரைடிங் மோட்களை (ஈக்கோ, ஸ்போர்ட்ஸ், டர்போ) அளிப்பதால், தேவைக்கேற்ப ஸ்கூட்டரின் செயல்திறனை மாற்றியமைக்கலாம்.

இதன் சஸ்பென்ஷன் அமைப்பில் ஹைட்ராலிக் டெலஸ்கோபிக் ஃப்ரண்ட் ஃபோர்க்குகள் மற்றும் இரட்டை டியூப் தொழில்நுட்பத்துடன் கூடிய இரட்டை ரியர் ஷாக் அப்சார்பர்கள் உள்ளன. இவை குண்டும் குழியுமான சாலைகளில் சிறந்த ஷாக் அப்சார்ப்ஷனை வழங்கி, மென்மையான பயணத்தை உறுதி செய்கின்றன. ஈக்கோ ரைடிங் மோடில் இதன் சோதனை செய்யப்பட்ட ரேஞ்ச் (Range) சுமார் 87.5 கிமீ ஆகும். இது தினசரி பயணங்களுக்கும், வேலைகளுக்கும் ஏற்றது.

ரிவர் இண்டி (River Indie): இது ஒரு பெரிய ரக எலெக்ட்ரிக் மேக்ஸி-ஸ்கூட்டர் ஆகும். இதன் அடிப்படையிலான யமஹாவின் இசி-06 எலெக்ட்ரிக் ஸ்கூட்டர் மிக சமீபத்தில்தான் விற்பனைக்கு கொண்டுவரப்பட்டது. 14 இன்ச் சக்கரங்கள் மற்றும் உறுதியான கட்டமைப்புடன் உருவாக்கப்படும் ரிவர் இண்டி ஆனது நகரத்தை மையமாகக் கொண்ட பெரும்பாலான எலெக்ட்ரிக் ஸ்கூட்டர்களை விட, சீரற்ற நிலப்பரப்புகளை திறம்பட கையாள உதவுகிறது.

இதன் நிலையான ஹேண்ட்லிங் மற்றும் சிறந்த கிரவுண்ட் கிளியரன்ஸ் ஆகியவை கிராமப்புற சாலைகளுக்கு அவசியமானவை ஆக உள்ளன. இந்த இ-ஸ்கூட்டர் அதன் விசாலமான ஸ்டோரேஜ் இடத்திற்காகப் பாராட்டப்படுகிறது. பொருட்களை அடிக்கடி எடுத்துச் செல்ல வேண்டியிருக்கும் கிராமப்புற பயன்பாடுகளுக்கு இது ஒரு முக்கிய அம்சமாகும்.

டிரைவ்ஸ்பார்க் கருத்து: கிராமப்புறத்தில் பயன்படுத்துவதற்காக எலெக்ட்ரிக் ஸ்கூட்டரை வாங்கும்போது சில விஷயங்களை முக்கியமாக கவனத்தில் கொள்ள வேண்டியது அவசியமாகிறது. அவையாவன, சஸ்பென்ஷன் அமைப்பு - சீரற்ற சாலைகள், குழிகள் மற்றும் சரளைக் கற்கள் நிறைந்த பரப்புகளை சிரமமின்றி கையாள, வலிமையான சஸ்பென்ஷன் அமைப்பு (டெலஸ்கோபிக் ஃபோர்க்குகள் மற்றும் இரட்டை ஷாக் அப்சார்பர்கள் போன்றவை) மிகவும் முக்கியம்.

கிரவுண்ட் கிளியரன்ஸ் - அதிக கிரவுண்ட் கிளியரன்ஸ், ஸ்கூட்டரின் அடிப்பகுதி சேதமடையாமல் சீரற்ற நிலப்பரப்புகளைக் கடக்க உதவுகிறது. ரேஞ்ச் மற்றும் சார்ஜிங் - நகரங்களை விட கிராமப்புறங்களில் சார்ஜிங் உள்கட்டமைப்பு குறைவாக இருப்பதால், உங்கள் தினசரி பயணத் தேவைகளைப் பூர்த்தி செய்யும் சான்றளிக்கப்பட்ட ரேஞ்சை கொண்ட ஸ்கூட்டரைத் தேர்வு செய்யுங்கள்.

ஆம்பியர் மேக்னஸ் இஎக்ஸ் போன்ற மாடல்களில் கிடைக்கும் கையடக்க அல்லது கழற்றி எடுக்கக்கூடிய பேட்டரிகள், வீட்டிலேயே சார்ஜ் செய்யும் வசதியை வழங்குகின்றன. சேவை நெட்வொர்க் - அனைத்து எலெக்ட்ரிக் வாகன பிராண்டுகளுக்கும் கிராமப்புறங்களில் பரவலான சேவை நெட்வொர்க் இல்லாததால், உங்கள் பகுதியில் அல்லது அதைச் சுற்றியுள்ள பகுதிகளில் பராமரிப்பு மற்றும் பழுதுபார்ப்புகளுக்கான அங்கீகரிக்கப்பட்ட சேவை நெட்வொர்க் உள்ளதா என்பதை உறுதிப்படுத்திக் கொள்ளுங்கள்.

கட்டுமான தரம் - வலிமையான, நீடித்த உடலமைப்பு மற்றும் ட்யூப்லெஸ் டயர்கள் கொண்ட ஸ்கூட்டர், கிராமப்புற பயணங்களின் சவால்களை எதிர்கொள்ள சிறந்ததாக இருக்கும். இந்த அம்சங்களை ஓரளவுக்கு பூர்த்தி செய்யும் மேலே குறிப்பிடப்பட்ட மூன்று எலெக்ட்ரிக் ஸ்கூட்டர்களுள் எங்களது சாய்ஸ் எதுவென்றால், கடைசியாக பார்த்தா ரிவர் இண்டி ஆகும். ஏனெனில், உலகின் முன்னணி 2-வீலர் பிராண்டான யமஹாவின் இந்த இந்திய இவி ஸ்டார்ட்-அப் நிறுவனத்தில் பெரிய தொகையை முதலீடு செய்துள்ளதால், வரும் காலங்களில் ரிவர் மற்றும் யமஹாவின் சார்ஜிங் நெட்வொர்க்குகள் தமிழ்நாட்டிலும் கிராம புறங்கள் வரையில் நீள்வதற்கு வாய்ப்புள்ளது.