Click it and Unblock the Notifications
காரில் போலி பதிவு எண் பலகை பயன்படுத்தினால் என்ன நடக்கும்? மோட்டார் வாகனச் சட்டமும், தண்டனைகளும்!!
அண்மையில் விசிக தலைவர் தொல். திருமாவளவன் 'TN 07 CM 2031' என்ற பதிவு எண் கொண்ட சொகுசு காரில் சென்றது தொடர்பாகச சமூக வலைத்தளங்களில் பெரிய அளவில் விவாதங்கள் எழுந்தன. இந்த குறிப்பிட்ட பதிவு எண்ணை பரிவாஹன் தளத்தில் உள்ள விபரங்களின்படி, அது ஒரு இருசக்கர வாகனத்திற்குரியது எனத் தெரியவந்து கூடுதல் சர்ச்சையை ஏற்படுத்தியது. ஆனால், இது ஒரு திரைப்படத்தின் படப்பிடிப்பிற்காக அந்த காரில் தற்காலிகமாகப் பயன்படுத்தப்பட்ட போலி எண் பலகை என்று பின்னர் விசிக சார்பில் விளக்கமளிக்கப்பட்டு உள்ளது.
இந்தச் சம்பவம் பொதுச் சாலைகளில் தவறான அல்லது போலி பதிவு எண் பலகைகளைப் பயன்படுத்துவது குறித்த சட்ட விழிப்புணர்வை மக்களிடையே ஏற்படுத்தியுள்ளது. இந்தியாவில் தவறான எண் பலகைகளைப் பயன்படுத்துவது எவ்வளவு பெரிய குற்றம், அதற்கு என்னென்ன சட்ட நடைமுறைகள் மற்றும் அபராதங்கள் விதிக்கப்படும் என்பதைப் பற்றி விரிவாகப் பார்ப்போம்.
(Representational Image - AI Generated)
தீவிரமான குற்றம்
மோட்டார் வாகனச் சட்டம் மற்றும் மத்திய மோட்டார் வாகன விதிகள் (CMVR) படி, இந்தியாவில் பதிவு செய்யப்பட்ட ஒவ்வொரு வாகனமும் போக்குவரத்துத் துறை வழங்கிய முறையான பதிவு எண்ணை மட்டுமே கொண்டிருக்க வேண்டும். மற்றொரு வாகனத்தின் பதிவு எண்ணைப் பயன்படுத்துவது அல்லது பதிவு செய்யப்படாத ஒரு போலி எண்ணை உருவாக்கிப் பயன்படுத்துவது சட்டப்படி பெரும் குற்றமாகும்.
இந்தியாவில் அண்மைக்காலமாக உயர் பாதுகாப்பு எண் பலகைகள் (HSRP) கட்டாயமாக்கப்பட்டு வருகின்றன. இந்த HSRP எண் பலகைகளில் லேசர் குறீயீடுகள் மற்றும் பாதுகாப்பு அம்சங்கள் இருப்பதால், இவற்றை எளிதில் மாற்றவோ அல்லது நகலெடுத்து பயன்படுத்தவோ முடியாது.
சட்டப் பிரிவுகள் மற்றும் அபராத விவரங்கள்
இந்திய மோட்டார் வாகனச் சட்டத்தின் கீழ் போலி அல்லது தவறான எண் பலகைகளைப் பயன்படுத்துவோருக்குக் கடுமையான அபராதங்களும் சட்ட நடவடிக்கைகளும் விதிக்கப்படுகின்றன. மோட்டார் வாகனச் சட்டப் பிரிவு 192 (1)ல் குறிப்பிட்டுள்ளவாறு, தவறான அல்லது போலி பதிவு எண் பலகையை பயன்படுத்தி வாகனத்தை இயக்குவது கீழ் குற்றமாகும். முதல் முறை இந்த குற்றத்தில் ஈடுபட்டால் ரூ.5,000 வரை அபராதம் விதிக்கப்படும். மீண்டும் அதே தவறை செய்தால் அபராதத் தொகை ரூ.10,000 வரை விதிக்க சட்டத்தில் வழி உள்ளது.
இந்திய தண்டனைச் சட்டம் (IPC) மற்றும் பாரதிய நியாய சன்ஹிதா (BNS) சட்டத்தின்படி, போலி எண் பலகையை பயன்படுத்துவது வெறும் போக்குவரத்து விதிமீறல் மட்டுமல்ல, மோசடி மற்றும் ஆள்மாறாட்டம் சார்ந்த குற்றப் பிரிவுகளின் கீழும் வரும். போலி ஆவணங்களை உருவாக்கியது மற்றும் அரசாங்க அமைப்புகளை ஏமாற்றியது போன்ற பிரிவுகளின் கீழ் வழக்குப்பதிவு செய்யப்பட்டால், அபராதத்துடன் சேர்த்து சிறைத்தண்டனையும் விதிக்கப்படலாம்.
வாகனம் பறிமுதல்
போலி எண் பலகையுடன் இயங்கும் வாகனங்களைக் கண்டறிந்தால், போக்குவரத்துப் போலீசாரோ அல்லது வட்டாரப் போக்குவரத்து அலுவலரோ (RTO) அந்த வாகனத்தை உடனடியாகப் பறிமுதல் செய்ய முழு அதிகாரம் பெற்றுள்ளனர். வாகனத்தின் சரியான உரிமையாளர், எஞ்சின் எண் மற்றும் சேசி எண் ஆகியவை ஆய்வு செய்யப்பட்டு, உரிய வரி மற்றும் அபராதங்கள் செலுத்தப்பட்ட பிறகே நீதிமன்ற நடைமுறைகள் மூலம் வாகனம் விடுவிக்கப்படும்.
இதர விதிமீறல்கள்
பலர் தங்களது வாகன எண் பலகைகளில் பெயர்கள், தலைவர்களின் உருவங்கள், அல்லது சினிமா பாணியிலான எழுத்துருக்களை பயன்படுத்துகின்றனர். மோட்டார் வாகன விதிகளின்படி, தெளிவற்ற எழுத்துரு, முப்பரிமாண எழுத்துகள் அல்லது எண்களை மறைக்கக்கூடிய வகையில் அமைக்கப்பட்ட எண் பலகைகளுக்கும் ரூ.5,000 வரை அபராதம் விதிக்கப்படுகிறது.
தற்போது செயற்கை நுண்ணறிவு (AI) கொண்ட ANPR கேமராக்கள் பல முக்கிய சாலைகளில் பொருத்தப்பட்டுள்ளதால், விதிகளை மீறும் எண் பலகைகள் தானாகவே கண்டறியப்பட்டு இ செல்லான் மூலம் அபராதம் அனுப்பப்படுகிறது.
விதிவிலக்குகள்
திரைப்படப் படப்பிடிப்பு அல்லது விளம்பரப் படப்பிடிப்புகளுக்காகப் பயன்படுத்தப்படும் வாகனங்களில் தற்காலிகமாகப் போலி எண்கள் மாற்றப்படுவது வழக்கம். ஆனால், அத்தகைய வாகனங்கள் பொதுச் சாலைகளில் இயங்கக் கூடாது. தனியார் வளாகத்திற்குள் அல்லது படப்பிடிப்புத் தளத்திற்குள் மட்டுமே அவற்றைப் பயன்படுத்த அனுமதி உண்டு. பொதுச் சாலைக்கு வாகனம் வரும்போது, அது போக்குவரத்துத் துறையால் அங்கீகரிக்கப்பட்ட அசல் பதிவு எண் பலகையுடனேயே இயங்க வேண்டும்.
கவனிக்க வேண்டியவை
உங்கள் வாகனத்திற்கு அரசு அங்கீகரித்த HSRP எண் பலகையைப் பொருத்துவது அவசியம். எண் பலகை சேதமடைந்தாலோ அல்லது தொலைந்துபோனாலோ, உடனடியாக காவல் நிலையத்தில் புகார் அளித்து, அங்கீகரிக்கப்பட்ட ஆர்டிஓ மையங்கள் மூலம் புதிய HSRP பலகையைப் பெற வேண்டும். தனிப்பட்ட விருப்பத்தின் பேரில் வேறு எண்களையோ அல்லது ஆடம்பர வடிவங்களையோ பயன்படுத்துவது பெரிய அளவிலான சட்டச் சிக்கல்களுக்கும் அபராதங்களுக்கும் வழிவகுக்கும் என்பதால் விழிப்புணர்வுடன் இருப்பது மிகவும் முக்கியம்.
Continue with Google
