E20 பெட்ரோல் போட்ட பிறகு இந்த அறிகுறிகள் இருந்தால் அலட்சியம் செய்யாதீங்க... முதலில் இதை செக் பண்ணுங்க!

இந்தியாவில் எத்தனால் கலப்புடன் கூடிய E20 பெட்ரோல் பயன்பாடு வேகமாக அதிகரித்து வருகிறது. இதற்கிடையே, "E20 பெட்ரோல் போட்ட பிறகு கார் சரியாக ஓடவில்லை", "மைலேஜ் குறைந்துவிட்டது", "எஞ்சின் சப்தம் மாறிவிட்டது" போன்ற சந்தேகங்களை வாகன உரிமையாளர்கள் தொடர்ந்து எழுப்பி வருகின்றனர். சமூக வலைதளங்களிலும் இதுதொடர்பான பல பதிவுகள் பகிரப்பட்டு வருகின்றன.

அதேநேரத்தில், சமீபத்தில் நாடாளுமன்றத்தில் மத்திய அரசு அளித்த பதிலில், E10 பெட்ரோலுக்காக வடிவமைக்கப்பட்ட பழைய வாகனங்களில் E20 பயன்படுத்தும்போது சுமார் 3 முதல் 5 சதவீதம் வரை மைலேஜ் குறைய வாய்ப்புள்ளதாக தெரிவித்தது. அதேசமயம், E20 பெட்ரோல் காரணமாக என்ஜின் சேதமடைகிறது அல்லது வாகனங்கள் பரவலாக பழுதடைகின்றன என்பதற்கான ஆதாரங்கள் அரசிடம் இல்லை என்றும் விளக்கம் அளித்தது. இந்த நிலையில், E20 பயன்படுத்திய பிறகு உங்கள் வாகனத்தில் சில மாற்றங்கள் தெரிந்தால் என்ன செய்ய வேண்டும்? உண்மையில் எதை கவனிக்க வேண்டும்? என்பதை இந்த செய்தியில் பார்க்கலாம்.

முதலில் மைலேஜை சரியாக கணக்கிடுங்கள்

ஒரே ஒரு முறை பெட்ரோல் நிரப்பிய பிறகு மைலேஜ் குறைந்துவிட்டது என்று முடிவு செய்ய வேண்டாம். குறைந்தபட்சம் இரண்டு அல்லது மூன்று முழு டேங்க் பயன்படுத்திய பிறகே உண்மையான வித்தியாசத்தை கணக்கிட முடியும். நகரப் போக்குவரத்து, ஏசி பயன்பாடு, ஓட்டும் முறை, சாலை நிலை போன்ற காரணிகளும் மைலேஜை கணிசமாக பாதிக்கக்கூடும்.

மேலும், பழைய வாகனங்களில் 3 முதல் 5 சதவீத மைலேஜ் குறைய வாய்ப்பு இருப்பதாக மத்திய அரசு குறிப்பிட்டிருப்பது எல்லா வாகனங்களுக்கும் பொருந்தும் என்று கூற முடியாது. வாகனத்தின் எஞ்சின் தொழில்நுட்பம், பராமரிப்பு நிலை மற்றும் பயன்பாட்டு முறையைப் பொறுத்து இந்த வித்தியாசம் மாறுபடலாம். எனவே, மேற்கூறியபடி குறைந்தது இரண்டு அல்லது மூன்று முறை முழுமையாக பெட்ரோல் நிரப்பி, துல்லியமாக கணக்கீடு செய்த பிறகே மைலேஜ் குறித்து முடிவுக்கு வருவது நல்லது.

எஞ்சின் வார்னிங் லைட் எரிந்தால் என்ன செய்ய வேண்டும்?

டாஷ்போர்டில் எஞ்சின் வார்னிங் லைட் (Engine Warning Light) எரிந்தால், அதற்கு E20 பெட்ரோல்தான் காரணம் என்று உடனே முடிவு செய்ய வேண்டாம். சென்சார் கோளாறு, ஸ்பார்க் பிளக் பிரச்சினை, எமிஷன் கட்டுப்பாட்டு அமைப்பு அல்லது வேறு தொழில்நுட்ப கோளாறுகளாலும் இந்த எச்சரிக்கை வரலாம். இந்த எச்சரிக்கை தொடர்ந்து இருந்தால், அங்கீகரிக்கப்பட்ட சர்வீஸ் மையத்தில் வாகனத்தை பரிசோதனை செய்வதே சரியான தீர்வாகும்.

வாகனம் சீராக இயங்கவில்லையா?

வாகனத்தின் எஞ்சின் வழக்கத்தைவிட அதிக நடுக்கத்துடன் (Vibration) இயங்குவது, வேகம் எடுக்க தாமதம் ஏற்படுவது அல்லது ஸ்டார்ட் செய்ய சிரமம் இருந்தால், அதற்கு எரிபொருள் தரம், பழைய ஸ்பார்க் பிளக், அழுக்கான ஏர் ஃபில்டர் அல்லது பராமரிப்பு குறைபாடுகள் போன்றவை காரணமாக இருக்கலாம். எனவே, முதலில் இவற்றை ஒருமுறை பரிசோதனை செய்து சரிசெய்வது அவசியம்.

இவை அனைத்தும் சரியாக இருந்தும், குறிப்பாக E10-க்காக வடிவமைக்கப்பட்ட பழைய வாகனங்களில் மைலேஜ் குறைவு அல்லது செயல்திறன் மாற்றம் தொடர்ந்து இருந்தால், E20 பெட்ரோலும் அதற்கு ஒரு காரணியாக இருக்கலாம். இருப்பினும், அதற்கு E20 மட்டுமே காரணம் என்று முடிவு செய்வதற்கு முன் முழுமையான தொழில்நுட்ப பரிசோதனை மேற்கொள்வது நல்லது.

பெட்ரோல் வாசனை அல்லது கசிவு இருந்தால்...

வாகனத்தை நிறுத்திய பிறகு பெட்ரோல் வாசனை அதிகமாக இருந்தாலோ அல்லது கசிவு இருப்பது போல் தோன்றினாலோ, உடனடியாக எரிபொருள் குழாய்கள், இணைப்புகள் மற்றும் டேங்க் மூடியை பரிசோதிக்க வேண்டும். குறிப்பாக பல ஆண்டுகள் பழமையான வாகனங்களில் ரப்பர் குழாய்கள் (Rubber Hoses) மற்றும் சீல்கள் (Seals) காலப்போக்கில் தேய்மானம் அடைவது இயல்பானது. இதுபோன்ற பிரச்சினைகளை ஆரம்பத்திலேயே கண்டறிந்தால் பெரிய செலவுகளை தவிர்க்க முடியும்.

உங்கள் வாகனம் E20-க்கு இணக்கமானதா?

இது தெரிந்துகொள்ள வேண்டிய மிக முக்கியமான விஷயம். உங்கள் வாகனத்தின் உரிமையாளர் கையேடு (Owner's Manual), உற்பத்தியாளர் இணையதளம் அல்லது அங்கீகரிக்கப்பட்ட டீலர் மூலம் E20 Compatible என்பதை உறுதி செய்துகொள்ளலாம்.

2023 ஏப்ரலுக்குப் பிறகு அறிமுகமான பெரும்பாலான BS6 Phase-2 பெட்ரோல் வாகனங்கள் E20-க்கு இணக்கமாக வடிவமைக்கப்பட்டுள்ளன. இத்தகைய வாகனங்களில் பெரிய தொழில்நுட்ப பிரச்சினைகள் ஏற்பட வாய்ப்பில்லை என்று பல வாகன உற்பத்தியாளர்களும் தெரிவித்துள்ளனர்.

ஆனால், E10 பெட்ரோலுக்காக வடிவமைக்கப்பட்ட சில பழைய வாகனங்களில் நீண்ட கால பயன்பாட்டில் மைலேஜ் குறைவு மட்டுமின்றி, ரப்பர் குழாய்கள், சீல்கள் மற்றும் சில எரிபொருள் அமைப்பு பாகங்களில் கூடுதல் தேய்மானம் ஏற்பட வாய்ப்புள்ளதாக தொழில்நுட்ப ஆய்வுகள் மற்றும் உற்பத்தியாளர்களின் வழிகாட்டுதல்கள் தெரிவிக்கின்றன. எனவே, பழைய வாகனங்களை வழக்கமான இடைவெளியில் பரிசோதனை செய்வது நல்லது. E20 பெட்ரோல் பயன்படுத்தும் முன்பே இத்தகைய பாகங்கள் நல்ல நிலையில் உள்ளனவா என்பதை உறுதி செய்துகொள்வதும் எதிர்கால பிரச்சினைகளைத் தவிர்க்க உதவும்.

வழக்கமான சர்வீஸை தவறவிடாதீர்கள்

ஏர் ஃபில்டர், ஸ்பார்க் பிளக், இன்ஜெக்டர், எஞ்சின் ஆயில் உள்ளிட்ட பராமரிப்பு பணிகள் சரியான நேரத்தில் செய்யப்படாவிட்டாலும் வாகனத்தின் செயல்திறன் குறையலாம். இதுபோன்ற பிரச்சினைகள் பல நேரங்களில் E20 காரணமாக ஏற்பட்டதாக தவறாக புரிந்துகொள்ளப்படலாம். எனவே, வாகனத்தை உற்பத்தியாளர் பரிந்துரைக்கும் இடைவெளியில் சர்வீஸ் செய்வது மிகவும் அவசியம்.

எப்போது சர்வீஸ் மையத்திற்கு செல்ல வேண்டும்?

கீழ்க்கண்ட அறிகுறிகள் தொடர்ந்து இருந்தால், அங்கீகரிக்கப்பட்ட சர்வீஸ் மையத்தில் உடனடியாக பரிசோதனை செய்வது நல்லது.

-எஞ்சின் வார்னிங் லைட் தொடர்ந்து எரிவது
-வாகனம் ஸ்டார்ட் ஆக சிரமப்படுவது
-எஞ்சின் அதிகமாக நடுக்கம் ஏற்படுவது
-திடீரென என்ஜின் பெர்ஃபார்மென்ஸ் குறைவது
-பெட்ரோல் கசிவு அல்லது கடுமையான பெட்ரோல் வாசனை

டிரைவ்ஸ்பார்க் கருத்து

E20 பெட்ரோல் பயன்படுத்திய பிறகு வாகனத்தில் ஏதேனும் மாற்றம் தெரிந்தால், அதற்கு E20 மட்டுமே காரணம் என்று முடிவு செய்வதும் சரியல்ல; E20-க்கு எந்த தொடர்பும் இல்லை என்று முழுமையாக மறுப்பதும் சரியல்ல. குறிப்பாக E20-க்கு இணக்கமான புதிய வாகனங்களில் பெரிய தொழில்நுட்ப பிரச்சினைகள் எதிர்பார்க்கப்படுவதில்லை. ஆனால், E10-க்காக வடிவமைக்கப்பட்ட சில பழைய வாகனங்களில் மைலேஜ் குறைவு அல்லது எரிபொருள் அமைப்பு பாகங்களில் நீண்ட கால தேய்மானம் போன்றவை ஏற்பட வாய்ப்புள்ளது. எனவே, வாகனத்தின் E20 இணக்கத்தன்மை, எரிபொருள் அமைப்பின் நிலை, பராமரிப்பு வரலாறு மற்றும் சர்வீஸ் பதிவுகள் ஆகியவற்றை முதலில் சரிபார்த்த பிறகே எந்த முடிவுக்கும் வருவது சிறந்த அணுகுமுறையாகும்.