பசங்களுக்கு இணையாக ராயல் என்ஃபீல்டு பைக் வாங்கிய இளம் ஆர்.ஜே! 27வது பிறந்தநாளில் நடந்த நெகிழ்ச்சி சம்பவம்!

மலையாள பிக் பாஸ் சீசன் 7 நிகழ்ச்சியின் மூலம் ஒட்டுமொத்த ரசிகர்களின் மனங்களையும் கொள்ளையடித்தவர் ஆர்ஜே பின்சி (RJ Bincy). ரேடியோ ஜாக்கி, சோஷியல் மீடியா இன்ஃப்ளூயன்சர், தொகுப்பாளர் என பன்முகத் திறமைகளைக் கொண்ட இவரது குடும்பத்தினரும் இன்ஸ்டாகிராமில் ரசிகர்களுக்கு மிகவும் பரிச்சயமானவர்களே. கடந்த வருடம் தனது 26-வது பிறந்தநாளில் பிரம்மாண்டமான டாடா கர்வ் (Tata Curvv) காரை வாங்கி அனைவரையும் வியப்பில் ஆழ்த்திய பின்சி, தற்போது தனது 27-வது பிறந்தநாளில் மற்றொரு கனவையும் நனவாக்கியுள்ளார். அது என்ன தெரியுமா?

தனது 26-வது பிறந்தநாளுக்கு கார் வாங்கிய போதே, அடுத்த பிறந்தநாளுக்கு என்ன ஸ்பெஷல் என்று ரசிகர்கள் அவரிடம் தொடர்ந்து கேட்டு வந்துள்ளனர். இதற்குப் பதிலளிக்கும் விதமாக பின்சி தனது இன்ஸ்டாகிராம் பக்கத்தில் ஒரு நெகிழ்ச்சியான பதிவைப் பகிர்ந்துள்ளார். தனது அப்பா, அம்மாவிற்கு ஜாலியாக ஊர் சுற்ற ஒரு பைக் வேண்டும் என்பதும், தங்கை மரியாவுக்கு கெத்தாக சுற்ற ஒரு பைக் வேண்டும் என்பதும் நீண்ட நாள் ஆசையாக இருந்துள்ளது.

இதற்குப் பின்னால் ஒரு சுவாரசியமான ஃப்ளாஷ்பேக்கும் இருக்கிறது. கடந்த 2018ஆம் ஆண்டில் பின்சி முதன்முதலில் புல்லட் பைக் ஓட்டப் பழகிய போது, பலர் அவரைக் கிண்டல் செய்துள்ளனர். சிலர் வண்டி தர மறுத்து ஒதுக்கியுள்ளனர். அன்று தனக்கு நேர்ந்த அவமானத்திற்குப் பதிலடி கொடுக்கும் விதமாக, ஒரு புல்லட் பைக் வாங்க வேண்டும் என்கிற வைராக்கியம் அவரிடம் இருந்துள்ளது.

இப்போது அதற்கெல்லாம் சேர்த்து ஒரே மாஸான பதிலடியாக, தனது கார் கேரேஜிற்கு புதிய துணையாக ராயல் என்ஃபீல்டின் ஸ்டைலிஷான 'ஹண்டர் 350' (Royal Enfield Hunter 350) பைக்கை வாங்கியுள்ளார் பின்சி. புதிய பைக் டெலிவரி எடுக்க குடும்பத்தோடு ஷோரூமிற்குச் சென்ற பின்சியின் புகைப்படங்களும் வீடியோக்களும் தற்சமயம் இணையத்தில் செம வைரலாகி வருகின்றன.

வண்டியை ஸ்டார்ட் செய்து ஷோரூமில் இருந்து வெளியே எடுத்தது அவரது தங்கை மரியா தான். ஆனால், வண்டியை எடுக்கும் போது கால் எட்டாமல் பைக் லேசாகச் சாய்ந்து மரியா தடுமாறிய காட்சிகள் நெட்டிசன்களிடம் சிக்கி, தற்போது இன்ஸ்டாகிராமில் சிரிப்பலையை ஏற்படுத்தி வருகிறது. எது எப்படியோ, இப்போது பின்சியின் குடும்பம் இந்த புதிய ஹண்டர் பைக்கில் மகிழ்ச்சியாக வலம் வந்து கொண்டிருக்கிறது.

ராயல் என்ஃபீல்டு நிறுவனத்தின் மிகக் குறைந்த விலையிலான மாடல் என்பது மட்டுமல்லாமல், பைக் ஓட்ட விரும்பும் பெண்களின் விருப்பமாகவும் ஹண்டர் 350 உருவெடுத்துள்ளது. இதன் குறைந்த எடை, தரைமட்டத்தில் இருந்து குறைவான உயரத்தில் ரைடர் சீட் ஆகியவை பெண்களை எளிதில் கவருகின்றன. கிளாசிக் பாரம்பரியத்துடன் நவீன வடிவமைப்பும் தொழில்நுட்பமும் கலந்த ஒரு அசத்தலான கலவையாக ஹண்டர் 350 உள்ளது.

தற்கால இளைஞர்களுக்கு ஏற்றவாறு 17 இன்ச் அலாய் சக்கரங்களுடன் வந்த முதல் ராயல் என்ஃபீல்டு பைக் இது என்பது குறிப்பிடத்தக்கது. ராயல் என்ஃபீல்டு நிறுவனத்தின் புகழ்பெற்ற புதிய 'ஜே பிளாட்ஃபார்ம்' (J-Platform) அடிப்படையில் ஹண்டர் 350 உருவாக்கப்பட்டுள்ளது. இதன் தொழில்நுட்ப அம்சங்களை கீழே உள்ள அட்டவணையில் காணலாம்.

டிரைவ்ஸ்பார்க் கருத்து: இந்தியாவில் பலர் ஏற்றுக்கொண்ட நவீன கால ராயல் என்ஃபீல்டு பைக்காக ஹண்டர் 350 விளங்குகிறது. இத்தகைய குறைந்த எடையில், அதிக செயல்திறன் கொண்ட ராயல் என்ஃபீல்டு ஹண்டர் 350 பைக், இப்போது ஆர்ஜே பின்சியின் வீட்டில் புதிய உறுப்பினராக இணைந்து ரசிகர்களின் பாராட்டுகளைப் பெற்று வருகிறது.