தம்பி தள்ளிப்போய் விளையாடுங்கப்பா... இந்த இரு பைக்குகளில் ஒன்றை தேர்வு செய்வதுதான் கஷ்டம்!

ஆஸ்திரிய மோட்டார்சைக்கிள் பிராண்டான கேடிஎம் (KTM), விலை குறைவான தனது புதிய எண்ட்ரி-லெவல் ஆர்சி160 (RC160) பைக்கை இந்தியாவில் அறிமுகப்படுத்தியுள்ளது. இந்த மோட்டார்சைக்கிள், அதிக போட்டி நிலவும் 150சிசி பைக்குகள் பிரிவில் களமிறங்கியுள்ளது. இந்த பிரிவில் அதிகம் விற்பனையாகும் யமஹா ஆர்15 (Yamaha R15) பைக் உடன் இது நேரடியாக போட்டியிடுகிறது.

கேடிஎம் ஆர்சி160 பைக், யமஹாவின் நீண்டகால ஆதிக்கத்திற்கு முடிவுகட்டுமா என்ற கேள்வி எழுந்துள்ளது. இரு பைக்குகளையும் விரிவாக ஒப்பிட்டு, அவற்றின் பிரிவில் சிறந்த ஸ்போர்ட்ஸ் பைக் எது என்பதைக் கண்டறிவோம். கேடிஎம் ஆர்சி160 மற்றும் யமஹா ஆர்15எம் (ஆர்15 பைக்குகளிலேயே விலை மற்றும் செயல்திறன் மிக்கது) ஸ்போர்ட்ஸ் பைக்குகளின் வடிவமைப்பு, என்ஜின், பாதுகாப்பு மற்றும் தொழிற்நுட்ப அம்சங்களை இந்த தொகுப்பில் ஒப்பிட்டு பார்க்கலாம்.

வடிவமைப்பு: யமஹா ஆர்15 பல ஆண்டுகளாகப் புதுப்பிக்கப்பட்டு வருகிறது. அதன் சமீபத்திய ஆர்15எம் மாடல், புகழ்பெற்ற ஆர்1 எம் (R1 M) சூப்பர் ஸ்போர்ட் மோட்டார்சைக்கிளின் அடிப்படையில் வடிவமைக்கப்பட்டது. இரு விதமாக செயல்படும் எல்இடி ஹெட்லேம்ப், நேர்த்தியான ஏரோடைனமிக் ஃபேரிங், ஸ்போர்ட்டியான மற்றும் தசைப்பிடிப்புள்ள பாடி டிசைன் மற்றும் எல்இடி பொசிஷன் லைட்களைக் கொண்டுள்ளது.

கேடிஎம் ஆர்சி160 பைக், கேடிஎம் பிராண்டின் தனித்துவமான ஆர்சி-ஸ்டைல் வடிவமைப்பைக் கொண்டுள்ளது. இந்த வடிவமைப்பு, ஆக்ரோஷமான மற்றும் ரேஸ்-பைக் போன்றதான தோற்றத்தை அளிக்கிறது. இதன் ஹைலைட்கள் ஆர்சி200 பைக்கில் இருந்து பெறப்பட்டவை ஆகும். சிறந்த ஹேண்ட்லிங், நிலைத்தன்மை மற்றும் பந்தய களத்திற்கான செயல்திறனை உறுதிசெய்யும் ஏரோடைனமிக் பாடியையும் இது கொண்டுள்ளது.

என்ஜின்: கேடிஎம் ஆர்சி160 பைக்கில் 164.2சிசி DOHC சிங்கிள்-சிலிண்டர் என்ஜின் பொருத்தப்பட்டுள்ளது. இது 9500 ஆர்பிஎம்-இல் 19 பிஎஸ் ஆற்றலையும், 7500 ஆர்பிஎம்-இல் 15.5 என்.எம் டார்க் திறனையும் வழங்குகிறது. யமஹா ஆர்15எம் பைக் 155சிசி SOHC VVA ஒற்றை சிலிண்டர் என்ஜினைக் கொண்டுள்ளது. இது 10,000 ஆர்பிஎம்-இல் 18.4 பிஎஸ் ஆற்றலையும், 7500 ஆர்பிஎம்-இல் 14.2 என்.எம் டார்க் திறனையும் வெளியிடுகிறது.

இரண்டு பைக்குகளும் 6-ஸ்பீடு கியர்பாக்ஸ் மற்றும் லிக்யுடு-கூலிங் சிஸ்டம் உடன் வருகின்றன. ஆர்சி 160 பைக்கின் அதிகபட்ச வேகம் மணிக்கு 118 கிமீ ஆகும். அதேநேரம், ஆர்15எம் மணிக்கு சுமார் 130 கிமீ வேகத்தை எட்டும். குறைந்த என்ஜின் திறன் கொண்டிருந்தாலும், ஆர்15எம் பைக் ஆனது ஆர்சி160-க்கு இணையான இயக்க ஆற்றலை வழங்கி, அதிக டாப் ஸ்பீடையும் தருகிறது.

ஆர்15 பைக்கில் உள்ள VVA (Variable Valve Actuation) தொழில்நுட்பம் சிறந்த எரிபொருள் திறன் மற்றும் நெடுஞ்சாலைகளில் வலுவான செயல்திறனை உறுதி செய்கிறது. அதேபோல், ஆர்சி 160 அதன் சக்தி வெளியீடு எண்களின் அடிப்படையில் போட்டித்தன்மை வாய்ந்த ஆற்றலையும், சிறந்த மைலேஜையும் வழங்கும் என்று எதிர்பார்க்கப்படுகிறது.

பாதுகாப்பு அம்சங்கள் மற்றும் மெக்கானிக்கல் பாகங்கள்: கேடிஎம் ஆர்சி160, ஒரு இலகுரக ட்ரெல்லிஸ் ஃப்ரேமில் உருவாக்கப்படுகிறது. இது சுறுசுறுப்பாகவும் கையாள எளிதாகவும் அமைகிறது. மேலும், இந்த பைக் பெரிய டிஸ்க் பிரேக்குகளைக் கொண்டுள்ளது. இது சிறந்த பிரேக்கிங் செயல்திறனையும், அதிக வேகத்தில் மேம்பட்ட கட்டுப்பாட்டையும் வழங்குகிறது. இதன் 13.75 லிட்டர் பெட்ரோல் டேங்க், நீண்ட நெடுஞ்சாலை பயணங்களுக்கு ஒரு நன்மையாக அமைகிறது.

ஆர்சி160 பைக்கில் 37மிமீ USD ஃபோர்க்குகள், மோனோஷாக் சஸ்பென்ஷன், 320/230மிமீ டிஸ்க் பிரேக்குகள் மற்றும் டூயல் சேனல் ஏபிஎஸ் உள்ளன. யமஹா ஆர்15எம் பைக் டெல்டாபாக்ஸ் சேஸ், USD ஃபோர்க்குகள், இணைக்கப்பட்ட மோனோஷாக், 282/220மிமீ டிஸ்க் பிரேக்குகள் மற்றும் டூயல் சேனல் ஏபிஎஸ் உடன் வருகிறது. இரு பைக்குகளிலும் 17 அங்குல அலாய் சக்கரங்கள் மற்றும் ட்யூப்லெஸ் டயர்கள் பொருத்தப்படுகின்றன.

விலை: கேடிஎம் ஆர்சி 160 பைக்கின் எக்ஸ்-ஷோரூம் விலை ரூ.1,85,000 ஆக நிர்ணயிக்கப்பட்டுள்ளது. இது முன்னதாக யமஹா ஆர்15எம் பைக்கின் விலைக்கு சமமாக இருந்தது. இருப்பினும், யமஹா தனது ஆர்15 பைக்குகள் முழுவதற்கும் சமீபத்தில் ரூ.5,000 விலையைக் குறைத்துள்ளது. தற்போது ஆர்15எம் ரூ.1,81,100 (எக்ஸ்-ஷோரூம்) விலையில் விற்கப்படுகிறது.

டிரைவ்ஸ்பார்க் கருத்து: மார்க்கெட்டில் ஏற்கனவே பிரபலமான யமஹா ஆர்15 பைக்கின் தோற்ற அம்சங்கள் அனைத்தும் அதன் கவர்ச்சியை மேம்படுத்துகின்றன. அதேபோல், கேடிஎம் ஆர்சி160 பைக்கும் மிகவும் ஆக்ரோஷமானதாகவும், உண்மையான ஸ்போர்ட்ஸ் பைக் போலவும் தோற்றமளிக்கிறது. ஆர்சி160 இன்னும் முழுமையாக மதிப்பிடப்படாததால், அதன் உண்மையான செயல்திறன் அதிகமாக இருக்கலாம்.