டாடா நெக்ஸான் இவியை விட சிறந்த கார்னா அது பன்ச் இவி தான்! 1.4 லட்ச ரூபா விலையும் கம்மி!

டாடா பன்ச் இவி (Tata Punch EV) ஒரு சிறிய சப்-காம்பாக்ட் எஸ்யூவி (Sub-Compact SUV) ரக கார் ஆகும். அதேசமயம், நெக்ஸான் இவி (Nexon EV) அதைவிட ஒரு படி மேலே, காம்பாக்ட் எஸ்யூவி கார்கள் பிரிவில் நிலைநிறுத்தப்பட்டுள்ளது. அளவைத் தவிர, இந்த இரு எலெக்ட்ரிக் கார்களும் ரேஞ்ச், உபகரணங்கள், செயல்திறன் மற்றும் விலை ஆகியவற்றில் வேறுபடுகின்றன. முழு அம்சங்களுடன் கூடிய பன்ச் இவி எலெக்ட்ரிக் காரின் எம்பவர்டு+ எஸ் (Empowered+ S) வேரியண்ட்டை, நெக்ஸான் இவி கிரீயேட்டிவ் (Creative) உடன் ஒப்பிடும்போது எந்தெந்த விதங்களில் சிறந்தது என்பதை பற்றி இனி இந்த தொகுப்பில் பார்க்கலாம்.

அனைத்துச் சிறப்பம்சங்களுடன் கூடிய சிறிய காரைத் தேர்ந்தெடுப்பதா அல்லது குறைந்த அம்சங்கள் கொண்ட பெரிய நெக்ஸான் இவி-யைத் தேர்ந்தெடுப்பதா? எது சிறந்த தேர்வு என்பதை இங்கே காணலாம். சிறப்பம்சங்கள் அடிப்படையில் பன்ச் இவி எம்பவர்டு+ எஸ் 40kWh பேட்டரியையும், நெக்ஸான் இவி கிரீயேட்டிவ் 45kWh பேட்டரியையும் கொண்டுள்ளது.

இந்த வேரியண்ட்களில் பன்ச் இவி 129 எச்பி மற்றும் 154 என்.எம் டார்க் திறனையும், நெக்ஸான் இவி 144 எச்பி மற்றும் 215 என்.எம் டார்க் திறனையும் உற்பத்தி செய்கின்றன. 0- 100 கிமீ வேகத்தை பன்ச் இவி 9 வினாடிகளில் அடைகிறது; நெக்ஸான் இவி 8.9 வினாடிகளில் எட்டுகிறது. MIDC சான்றளித்த ரேஞ்சைப் பொறுத்தவரை, பன்ச் இவி 464 கிமீ வரையும், நெக்ஸான் இவி 489 கிமீ வரையும் சிங்கிள்-முழு சார்ஜில் செல்லும்.

நிஜ உலகில் முறையே 335-350 கிமீ மற்றும் 350-375 கிமீ ரேஞ்சை எதிர்பார்க்கலாம். இதன்படி பார்க்கையில், நெக்ஸான் இவி-இன் பெரிய பேட்டரி, ஒற்றை சார்ஜில் 25 கிமீ தூரம் கூடுதலாக பயணிக்க அனுமதிக்கிறது. மேலும், நெக்ஸான் இவி-இன் மோட்டார் பன்ச் இவி-யை விட 15எச்பி மற்றும் 61 என்.எம் டார்க் திறன் அளவிற்கு கூடுதல் ஆற்றலை உருவாக்குகிறது.

இருப்பினும், 0-100 கிமீ வேகத்தை அடைவதில் இரண்டிற்கும் இடையேயான வித்தியாசம் மிகக் குறைவு. இதற்கு நெக்ஸான் இவி-இன் அதிக எடை ஒரு காரணமாக இருக்கலாம். பன்ச் இவி-இன் சிறிய பேட்டரி, ஏசி மற்றும் டிசி சார்ஜர்கள் என இரண்டின் மூலமும் வேகமாக சார்ஜ் செய்யப்படுகிறது. ஏசி சார்ஜிங் (10- 100%) பன்ச் இவி-க்கு 3.3kW மூலம் 14.8 மணிநேரமும், 7.2kW மூலம் 5.3 மணிநேரமும் தேவைப்படும்.

நெக்ஸான் இவி-க்கு அதே சார்ஜிங் திறன்கள் மூலம் முறையே 17 மணிநேரம் 36 நிமிடங்களும், 6 மணிநேரம் 36 நிமிடங்களும் ஆகும். டிசி சார்ஜிங் நேரம் (10-80%) பன்ச் இவி-க்கு 65kW மூலம் 30 நிமிடங்களாகவும், நெக்ஸான் இவி-க்கு 60kW மூலம் 40 நிமிடங்களாகவும் இருக்கிறது. டாடா மோட்டார்ஸ் நிறுவனம் பன்ச் இவி-இன் பேட்டரி, மோட்டார் மற்றும் வாகனத்திற்கான உத்தரவாதத்தை நெக்ஸான் இவி-க்கு ஒத்ததாக வழங்குகிறது.

இது பன்ச் இவி போன்ற சிறிய, மலிவு விலையுள்ள காரில் அதிக பாதுகாப்பை உறுதிசெய்கிறது. இந்த இரண்டு கார்களிலும் பேட்டரிக்கு வாழ்நாள் உத்தரவாதமும், வரம்பற்ற கிலோமீட்டர்களும், மோட்டாருக்கு 8 ஆண்டுகள் அல்லது 1,60,000 கிமீ (எது முதலில் வருகிறதோ அது) மற்றும் காருக்கு 3 ஆண்டுகள் அல்லது 1,25,000 கிமீ (எது முதலில் வருகிறதோ அது) உத்தரவாதம் அளிக்கப்படுகிறது. மேலும் தகவலுக்கு, டாடா நிறுவனத்தின் அதிகாரப்பூர்வ இணையத்தள பக்கத்தில் விதிமுறைகள் மற்றும் நிபந்தனைகளைப் சரிப்பார்க்க பரிந்துரைக்கப்படுகிறது.

வெளிப்புற தோற்றத்தை பொறுத்தவரையில், பன்ச் இவி-இல் கார்னரிங் வசதியுடன் கூடிய எல்இடி ஹெட்லைட்கள் உள்ளன, நெக்ஸான் இவி-இல் கார்னரிங் வசதி இல்லை. இரண்டும் எல்இடி டிஆர்எல்-கள் மற்றும் 16-இன்ச் அலாய் சக்கரங்களைக் கொண்டுள்ளன. அதேபோல், மின்சாரம் மூலம் இயங்கும் ORVM-கள், பின்பக்க ஸ்பாய்லர், சுறா துடுப்பு வடிவிலான ஆண்டெனா மற்றும் எல்இடி டெயில்லைட்கள் இரண்டு கார்களிலும் பொதுவானவை.

பன்ச் இவி எலெக்ட்ரிக் காரில் முன்பக்க எல்இடி ஃபாக் விளக்குகள், பின்பக்க வைப்பர் & வாஷர் இருக்கின்றன, அவை நெக்ஸான் இவி எலெக்ட்ரிக் காரில் இல்லை. பின்புற ஒளியூட்டும் பார் (rear light bar) இரண்டிலும் எல்இடி ஆக வருகின்றன. நெக்ஸான் இவி காரின் மிட் வேரியண்ட்கள் ஃபாக் விளக்குகள் மற்றும் பின்பக்க வைப்பர் போன்ற சிலவற்றைக் கொண்டிருக்கவில்லை என்றாலும், பன்ச் இவி காருடன் ஒப்பிடுகையில் சமமாகவே திகழ்கின்றன. நெக்ஸான் இவி காரின் 30kWh கிரீயேட்டிவ்+ வேரியண்ட்டில் அலாய் சக்கரங்கள் இல்லாத நிலையில், கிரீயேட்டிவ் வேரியண்ட்டில் அலாய் சக்கரங்கள் இருப்பது குறிப்பிடத்தக்கது.

உட்புறத்தைப் பொறுத்தவரை, இரு கார்களுக்கும் இடையே தொழிற்நுட்ப அம்சங்களின் வித்தியாசம் இங்கே மிக அதிகம். பன்ச் இவி கார் பெரிய திரைகள், வயர்லெஸ் ஸ்மார்ட்போன் இணைப்பு மற்றும் சார்ஜிங், வெண்டிலேட்டட் முன் இருக்கைகள் மற்றும் சன்ரூஃப் ஆகியவற்றைப் பெறுகிறது. பன்ச் இவி-இல் 10.25 இன்ச் ஓட்டுநர் டிஸ்ப்ளே மற்றும் டச் ஸ்கிரீன் உள்ளன. அதுவே இந்த தொகுப்பில் நாம் பார்க்கும் நெக்ஸான் இவி எலெக்ட்ரிக் காரின் மிட்-வேரியண்ட்டில் 7 இன்ச் டிஸ்ப்ளேக்கள் உள்ளன.

பன்ச் இவி வயர்லெஸ் ஆண்ட்ராய்டு ஆட்டோ மற்றும் ஆப்பிள் கார்ப்ளேவை ஆதரிக்கிறது. ஆனால், நெக்ஸான் இவி வயர்டு இணைப்பையேக் கொண்டுள்ளது. பன்ச் இவி-இல் முன் இருக்கைகளில் யுஎஸ்பி டைப் ஏ, சி போர்ட்கள் மற்றும் பின் இருக்கைகளில் டைப் சி போர்ட் உள்ளன. நெக்ஸான் இவி-இன் மிட் வேரியண்ட்களில் பின் இருக்கை பகுதியில் டைப் சி போர்ட் இல்லை.

பன்ச் இவி-இல் வயர்லெஸ் சார்ஜர், க்ரூஸ் கண்ட்ரோல், காற்று சுத்திகரிப்பான் மற்றும் வெண்டிலேட்டட் முன் இருக்கை அம்சங்கள் உள்ளன. அவை நெக்ஸான் இவி-இல் இல்லை. இரண்டு கார்களிலும் ஸ்டீயரிங் சக்கரத்தில் கண்ட்ரோல்கள், முன் இருக்கைகளை மேனுவலாக சரிசெய்யும் வசதி, ஆட்டோமேட்டிக் கிளைமேட் கண்ட்ரோல், ஈக்கோ, சிட்டி & ஸ்போர்ட் டிரைவ் மோட்கள், பேட்டரி ரீஜெனரேஷன் மோட்கள், நான்கு பவர் விண்டோக்கள் ஆகியவை உள்ளன.

பன்ச் இவி-யில் சிங்கிள்-பேன் சன்ரூஃப், பின்பக்க இருக்கைகளுக்கு மத்தியிலும் சென்டர் ஆர்ம்ரெஸ்ட், பின்பக்க டிஃபாகர் போன்றவையும் உள்ளன. ஆனால், நெக்ஸான் இவி-இன் மிட்-வேரியண்ட்டில் யுஎஸ்பி சார்ஜிங் போர்ட்கள் மற்றும் பின்பக்க சென்டர் ஆர்ம்ரெஸ்ட் போன்ற அடிப்படை விஷயங்கள் கூட இல்லை என்பது அன்றாட பயன்பாட்டில் சிரமத்தை ஏற்படுத்தும்.

அதேபோல், 2026 பிப்ரவரியில் ஒரு மிட்-லைஃப்சைக்கிள் அப்டேட் பெற்ற பிறகும், பன்ச் இவி காரில் இன்னும் பின்பக்க ஏசி வென்ட்கள் இல்லாதது ஆச்சரியமளிக்கிறது. ஏனெனில் இது தவிர்த்து மற்ற அம்சங்கள் அனைத்தும் நிரம்பியுள்ளது. விலையை பொறுத்தவரையில், தற்போதைய நிலவரப்படி, பன்ச் இவி எம்பவர்டு+ எஸ் வேரியண்ட்டின் எக்ஸ்-ஷோரூம் விலை ரூ.12.59 லட்சம். நெக்ஸான் இவி கிரீயேட்டிவ் வேரியண்ட்டின் எக்ஸ்-ஷோரூம் விலை ரூ.13.99 லட்சம். கிட்டத்தட்ட ரூ.1.4 லட்சம் வித்தியாசம் உள்ளது.

டிரைவ்ஸ்பார்க் கருத்து: நாம் பகுப்பாய்வு செய்த அனைத்தையும் கருத்தில் கொண்டால், டாடா பன்ச் இவி எம்பவர்டு+ எஸ் இந்த இரண்டில் மிகவும் நியாயமான தேர்வாக தென்படுகிறது. விலையிலும் நெக்ஸான் இவி கிரீயேட்டிவ் உடன் ஒப்பிடும்போது, பன்ச் எம்பவர்டு+ எஸ் சுமார் ரூ.1.4 லட்சம் குறைவாக உள்ளது. பன்ச் இவி ஒரு சிறிய பேட்டரி மற்றும் குறைந்த ரேஞ்சைக் கொண்டிருந்தாலும், அது வேகமான சார்ஜிங் நேரம் மூலம் அதை ஈடுசெய்கிறது. அதன் சிறிய அளவு நகரத்தில் ஓட்டுவதற்கு எளிதாக உள்ளது. மேலும், பன்ச் இவி காரின் கிரவுண்ட் கிளியரன்ஸ் முன்பு இருந்ததை விட 5 மிமீ அதிகமாக 195மிமீ ஆக இருப்பது நமது சாலைகளுக்கு மிகவும் பொருத்தமானதாக இருக்கும்.