2 லட்ச ரூபாயில் இந்த அளவுக்கு பவர்ஃபுல்லான பல்சர் பைக்கா!! பஜாஜின் புதிய தயாரிப்பு ஓட்டி பார்க்க சூப்பர்!

பஜாஜ் பல்சர் என்.எஸ் 400இசட் (Bajaj Pulsar NS 400Z) பைக் ரூ.1.92 லட்சம் என்கிற எக்ஸ்-ஷோரூம் விலையில் சமீபத்தில் அறிமுகம் செய்யப்பட்டுள்ளது. 373.3cc திறன் கொண்ட சக்திவாய்ந்த என்ஜின், கவர்ச்சிகரமான வடிவமைப்பு மற்றும் நவீன வசதிகளுடன் 400cc பிரிவில் இந்த புதிய பல்சர் என்.எஸ் பைக் தனித்து விளங்குகிறது.

இந்த பைக்கின் செயல்திறனும், நடைமுறை அம்சங்களும் நகரப் பயணங்களுக்கும், உற்சாகமான பயணங்களுக்கும் ஏற்றதாக உள்ளது. இதன் கம்பீரமான தோற்றமும், அதிநவீன எலக்ட்ரானிக் அம்சங்களும் இதற்கு தனித்துவத்தை சேர்க்கின்றன. பஜாஜ் பல்சர் என்.எஸ் 400இசட் பைக்கை ஓட்டிப் பார்த்ததில், சாலையில் அதன் செயல்பாடு எவ்வாறு உள்ளது என்பதை எங்களால் அறிய முடிந்தது. அதனை பற்றி விரிவாக இனி இந்த தொகுப்பில் பார்க்கலாம்.

பஜாஜ் பல்சர் என்.எஸ் 400இசட் டிசைன் அம்சங்கள்: பல்சர் என்.எஸ்200 பைக்கின் வடிவமைப்பால் ஈர்க்கப்பட்டு, ஒரு கவர்ச்சிகரமான மற்றும் கம்பீரமான தோற்றத்தை பல்சர் என்.எஸ் 400இசட் பைக்கிற்கு பஜாஜ் வழங்கியுள்ளது. இதற்கேற்ப, நவீன மற்றும் ஸ்போர்ட்டியான தோற்றத்திற்காக LED ப்ரொஜெக்டர் ஹெட்லைட்கள் மற்றும் LED DRLகளுடன் மறுவடிவமைப்பு செய்யப்பட்ட முகப்பு பகுதி உடன் புதிய பல்சர் என்.எஸ் 400இசட் பைக் வடிவமைக்கப்பட்டு உள்ளது.

வளைந்த பெட்ரோல் டேங்க், இது ஒரு ஸ்ட்ரீட்ஃபைட்டர் (Streetfighter) ரக பைக் என்பதை காட்டுகிறது. அதே நேரத்தில் காற்று ஓட்டத்துடன் இணைந்து இயங்க ஏதுவாக ஏரோடைனமிக் பேனல்கள் பைக்கின் பக்கவாட்டில் பொருத்தப்பட்டு உள்ளன. அத்துடன், ஸ்போர்ட்டியான தோற்றத்தை அளிக்கும் வகையில் இருக்கைகள் பிரிக்கப்பட்டு உள்ளன.

மேலும் ஸ்டைலான LED விளக்குகளுடன் கூடிய சிறிய டெயில் பகுதி பைக்கின் ஸ்டைலான தோற்றத்தை நிறைவு செய்கிறது. ட்யூப்லெஸ் ரேடியல் டயர்கள் மற்றும் 17-இன்ச் அலாய் சக்கரங்கள் சாலை உடன் பிடிப்பையும், பைக்கின் அழகியலையும் மேம்படுத்துகின்றன. 174 கிலோவில் குறைவான எடை கொண்டிருப்பதால், பவர்ஃபுல்லான என்ஜினை கொண்டிருப்பினும் இந்த பல்சர் பைக் பெரும்பாலான ஓட்டுநர்களுக்கு ஏற்றதாக இருக்கும்.

பஜாஜ் பல்சர் என்.எஸ் 400இசட் டெக்னிக்கல் & மெக்கானிக்கல் அம்சங்கள்: தெளிவான தகவல்களைக் காண்பிப்பதற்காக, இந்த பைக்கில் முழு வண்ண TFT டிஜிட்டல் இன்ஸ்ட்ரூமென்ட் கிளஸ்டர் திரை ஹேண்டில்பாருக்கு மத்தியில் பொருத்தப்பட்டுள்ளது. இது புளூடூத் (Bluetooth) இணைப்பு, பயணத்திற்கான வழிக்காட்டுதல் மற்றும் மொபைல் போன் அழைப்புகள் (Mobile Phone Calls) & குறுஞ்செய்திகளுக்கான அறிவிப்புகளை (Message Notifications) வழங்கக்கூடியதாக உள்ளது.

ரைடரின் சவுகரியத்திற்கு ஏற்ப பைக்கின் ஹேண்டில்பார் வடிவமைக்கப்பட்டுள்ளது. மேலும் இரண்டாக பிரிக்கப்பட்ட இருக்கைகள் நீண்ட தூர பயணங்களுக்கு ஏற்றவாறு நன்றாக டிசைன் செய்யப்பட்டு உள்ளன. யுஎஸ்பி சார்ஜிங் போர்ட் (USB Charging Port) அன்றாட பயன்பாட்டிற்கு மிகவும் வசதியானதாக இருக்கும்.

சஸ்பென்ஷனுக்கு பைக்கின் முன்பகுதியில் 43மிமீ-இல் USD ஃபோர்க்குகளும், பின்பக்கத்தில் அட்ஜெஸ் செய்துக் கொள்ளக்கூடிய மோனோஷாக்கும் வழங்கப்பட்டு உள்ளன. இந்த அமைப்பு ஓட்டுதல் வசதியையும், ஸ்போர்ட்டியான ஹேண்ட்லிங்கையும் சமநிலைப்படுத்துகிறது. பாதுகாப்பு அம்சங்களில் இரட்டை சேனல் ஏபிஎஸ் (Dual-channel ABS) மற்றும் டிஸ்க் பிரேக்குகள் ஆகியவை அடங்குகின்றன.

மேலும், இந்த பைக்கில் டிராக்சன் கண்ட்ரோல் (Traction Control) மற்றும் நான்கு விதமான ரைடிங் மோட்கள் (Riding Modes) உள்ளிட்டவையும் இடம்பெற்றுள்ளன. ரோடு, ஸ்போர்ட், மழை மற்றும் ஆஃப்-ரோடு (off-road) என்பன அந்த நான்கு விதமான ரைடிங் மோட்கள் ஆகும்.

பஜாஜ் பல்சர் என்.எஸ் 400இசட் பரிமாணங்கள்:

பஜாஜ் பல்சர் என்.எஸ் 400இசட் ஓட்டுநர் அனுபவம்: என்.எஸ் 400இசட் பைக்கின் என்ஜின் சீரான சக்தியுடன் சிறந்த செயல்திறனை வழங்குகிறது. இது சுமார் 2.6 வினாடிகளில் 0-60 கிமீ வேகத்தை எட்டுகிறது. இதன் மூலம், இது அதன் பிரிவில் வேகமாகச் செயல்படும் மோட்டார்சைக்கிளாக விளங்குகிறது.

குவிக் ஷிஃப்டர் மற்றும் ஸ்லிப்பர் கிளட்ச் உள்ளிட்டவை கியர்களை எளிமையாக மாற்ற தடையின்றி செயல்படுகின்றன. ஓட்டுதல் சீராகவும், அதே சமயம் சவுகரியமாகவும் உள்ளது. மேலும், மேடு பள்ளங்களை பைக்கின் சஸ்பென்ஷன் செட்-அப் நன்றாக சமாளிக்கிறது. ஏற்கனவே கூறியதுபோல், நிமிர்ந்த இருக்கை பொசிஷன் ஆனது குறுகிய மற்றும் நீண்ட பயணங்களுக்கு ஏற்றதாக உள்ளது.

அதிக வேகத்தில் செல்லும்போதும் நன்கு திடமாக செயல்படுவதுடன், போக்குவரத்தில் சுறுசுறுப்பாகவும் இருப்பதால் பஜாஜ் பல்சர் என்.எஸ் 400இசட் பைக்கின் ஹேண்ட்லிங் ஓட்டுபவருக்கு நம்பிக்கை அளிக்கிறது. பிரேக்குகள் சிறப்பான நிறுத்தும் சக்தியை வழங்குகின்றன, மேலும் டிராக்சன் கன்ட்ரோல் சிஸ்டம் இதற்கு உதவுகிறது.

டிரைவ்ஸ்பார்க் கருத்து: பஜாஜ் பல்சர் என்.எஸ் 400இசட் பைக் அதன் சக்தி, தொழில்நுட்பம் மற்றும் மதிப்பு ஆகியவற்றால் கவனத்தை ஈர்க்கிறது. ஸ்போர்ட்டியான 400cc மோட்டார்சைக்கிளை விரும்புவோருக்கு இது ஒரு சிறந்த தேர்வாக இருக்கும். TFT டிஸ்ப்ளே, புளூடூத் மற்றும் ரைடிங் மோட்கள் போன்ற அம்சங்களுடன், என்.எஸ் 400இசட் அதன் பிரிவில் ஒரு வலுவான போட்டியாளராக உள்ளது. ஒரு திறமையான ஸ்ட்ரீட்ஃபைட்டர் பைக்கை தேடுவோருக்கு, இது ஒரு சிறந்த தேர்வாக இருக்கும்.