என்னங்க சொல்றீங்க, ரூ.65,000 தான் விலையா... 100கிமீ-க்கு மேல் ஓட்டினாலும் சார்ஜ் கவலை வேண்டாம்!!

இந்தியாவில், நகர்ப்புறப் பயணிகளுக்காக, வசதியான மற்றும் திறமையான பயணத்தை வழங்கும் நோக்கில், நியூமரோஸ் மோட்டார்ஸ் (Numeros Motor) அதன் 'என்-ஃபர்ஸ்ட்' (n-First) என்கிற பெயரில் புதிய எலெக்ட்ரிக் ஸ்கூட்டரை சமீபத்தில் அறிமுகப்படுத்தியதை பற்றி கேள்விப்பட்டு இருப்பீர்கள் என நினைக்கிறேன். அன்றாடப் பயணத்திற்கு ஏற்ற எலெக்ட்ரிக் ஸ்கூட்டராக குறைவான விலையில் என்-ஃபர்ஸ்ட் அறிமுகம் செய்யப்பட்டுள்ளது.

இந்த எலெக்ட்ரிக் ஸ்கூட்டரின் முக்கிய அம்சங்களாக, எடை குறைவான இலகுரக வடிவமைப்பு, ஸ்டைலான தோற்றம் மற்றும் நகரப் பயன்பாட்டிற்காக வடிவமைக்கப்பட்ட ஸ்மார்ட் தொழிற்நுட்ப அம்சங்கள் ஆகியவை இடம்பெற்றுள்ளன. இந்த ஸ்கூட்டர், பெண்களுக்கு ஏற்றதாகவும், நடைமுறை மற்றும் மலிவு விலையில் எலெக்ட்ரிக் வாகனம் வாங்க விரும்புவோருக்காகவும் வடிவமைக்கப்பட்டுள்ளது.

இதன் எளிதான ஹேண்ட்லிங் மற்றும் வசதிகள், தற்போதைய எலெக்ட்ரிக் ஸ்கூட்டர் பிரிவில் ஒரு வலுவான போட்டியாளராக என்-ஃபர்ஸ்ட்டை மாற்றுகின்றன. நவீன தோற்றம் மற்றும் மேம்பட்ட அம்சங்களுடன், இந்திய நகரங்களில் அன்றாடப் பயணத்தின் தேவைகளைப் பூர்த்தி செய்யும் வகையில், இதன் வடிவமைப்பு மற்றும் செயல்திறன் உள்ளது. இத்தகைய நியூமரோஸ் என்-ஃபர்ஸ்ட் எலெக்ட்ரிக் ஸ்கூட்டர் ஆனது வடிவமைப்பு, செயல்திறன், தொழிற்நுட்ப அம்சங்கள் மற்றும் விகைகளில் எந்த அளவிற்கு உள்ளது என்பதை பற்றி இனி இந்த தொகுப்பில் விரிவாகப் பார்க்கலாம்.

நியூமரோஸ் என்-ஃபர்ஸ்ட் அறிமுகம் – வடிவமைப்பு மற்றும் ஸ்டைலிங்

நியூமரோஸ் என்-ஃபர்ஸ்ட், நேர்த்தியான மற்றும் சிறிய உடலைக் கொண்டுள்ளது. இது நகர போக்குவரத்தில் எளிதாக ஹேண்ட்லிங் செய்ய உதவுகிறது. ஸ்கூட்டரின் குறைவான எடை, நெரிசலான பகுதிகளில் நிறுத்துவதற்கும் ஓட்டுவதற்கும் உதவுகிறது. உடலில் கூர்மையான கோடுகள் மற்றும் நவீன கிராபிக்ஸ் வடிவமைப்புடன், இது ஒரு புதுமையான சிட்டி ஸ்கூட்டர் தோற்றத்தை அளிக்கிறது.

முன்பகுதியில், ஸ்டைலான எல்இடி ஹெட்லைட் மற்றும் இண்டிகேட்டர்கள் பொருத்தப்பட்டுள்ளன. இவை பிரகாசமான ஒளியை அதிகரித்து பாதுகாப்பை உறுதி செய்கின்றன. பல்வேறு வண்ணங்களில் என்-ஃபர்ஸ்ட் எலெக்ட்ரிக் ஸ்கூட்டர் கிடைக்கிறது. இதன் மூலம், வாடிக்கையாளர்கள் தங்கள் விருப்பத்திற்கு ஏற்ற தோற்றத்தைத் தேர்வு செய்யலாம். இதன் ஒட்டுமொத்த தோற்றம், இன்றைய நகரச் சூழலுக்குப் பொருத்தமானதாகவும், இளைஞர்களைக் கவரும் வகையிலும் உள்ளது.

ஓட்டுநர் மற்றும் பின்னால் அமர்ந்து செல்பவருக்கும் வசதியாக இருக்கை வடிவமைக்கப்பட்டுள்ளது. அன்றாடப் பயன்பாட்டிற்கு ஏற்றவாறு, போதுமான கால் வைக்கும் இடமும், இருக்கையின் கீழ் ஹெல்மெட் அல்லது பை போன்ற அத்தியாவசியப் பொருட்களை வைக்க ஸ்டோரேஜ் பகுதியும் உள்ளது. ஹேண்டில்பார் நன்கு உயரத்தில் வழங்கப்பட்டுள்ளதால், நீண்ட தூரம் பயணிக்கும்போதும் ஓட்டுநர்கள் சரியான நிலையில் அமர உதவுகிறது.

நியூமரோஸ் என்-ஃபர்ஸ்ட் அறிமுகம் – என்ஜின் மற்றும் செயல்திறன்

என்-ஃபர்ஸ்ட் எலெக்ட்ரிக் ஸ்கூட்டர், 2.5 கிலோவாட்ஸ் எலெக்ட்ரிக் மோட்டாரால் இயக்கப்படுகிறது. இது மென்மையான மற்றும் அமைதியான வேகத்தை வழங்குகிறது. நகர்ப்புறச் சூழலுக்கேற்ப இதன் செயல்திறன் வடிவமைக்கப்பட்டுள்ளது. இதன் அதிகபட்ச வேகம் மணிக்கு 70 கி.மீ ஆகும். இந்த ஸ்கூட்டர், அதிக திறன் கொண்ட பேட்டரியைப் பயன்படுத்துகிறது.

இது, ஸ்கூட்டரை ஓட்டும் முறை மற்றும் சூழலைப் பொறுத்து ஒருமுறை சார்ஜ் செய்தால் அதிகப்பட்சமாக 109 கிமீ வரை ஸ்கூட்டரை இயக்கி செல்லும். பேட்டரியை முழுமையாக சார்ஜ் செய்ய சுமார் 6 முதல் 8 மணி நேரம் ஆகும். இது பெரும்பாலான பயனர்களுக்கு இரவில் சார்ஜ் செய்வதை வசதியாக மாற்றுகிறது. இதன்மூலம், தேவைக்கேற்ப அதிக செயல்திறன் அல்லது நீண்ட தூர பயணங்களுக்கு இந்த எலெக்ட்ரிக் ஸ்கூட்டரை பயன்படுத்தலாம்.

நியூமரோஸ் என்-ஃபர்ஸ்ட் அறிமுகம் – ரைடிங் அனுபவம்

16 இன்ச் சக்கரங்கள் கொண்ட இந்த எலெக்ட்ரிக் ஸ்கூட்டர், சிறிய சக்கரங்கள் கொண்ட ஸ்கூட்டர்களைக் காட்டிலும் மேம்பட்ட பயண அனுபவத்தைத் தருகிறது. மேடுபள்ளமான சாலைகளிலும், வேகமான பயணத்தின்போதும் கூடுதல் நிலைத்தன்மையை இது உறுதி செய்கிறது. 109கிமீ வரையிலான ரேஞ்சை கொண்டுள்ளதால், தினசரி நகரப் பயணங்களுக்கு இது மிகவும் பயனுள்ளதாக இருக்கும்.

அடிக்கடி சார்ஜ் செய்ய வேண்டிய கவலை இதில் இல்லை. இதன் வடிவமைப்பும் கட்டமைப்பும் வாகனத்தின் நிலைத்தன்மைக்கு முக்கியத்துவம் அளிக்கிறது. பின்னால் ஒருவர் அமர்ந்து பயணம் செய்யும்போதும், வழக்கமான 12 அல்லது 14 இன்ச் சக்கரங்கள் கொண்ட ஸ்கூட்டர்களைக் காட்டிலும் இது அதிக சௌகரியத்தை வழங்குகிறது. இந்த ஸ்கூட்டரின் அதிகபட்ச வேகம் மணிக்கு 70 கிமீ ஆக இருந்தாலும், அதிவேகப் பயணங்களுக்கு என்-ஃபர்ஸ்ட் உகந்ததல்ல.

நெடுஞ்சாலைகளில் அடிக்கடி பயணம் செய்பவர்களுக்கு அல்லது முந்திச் செல்ல விரும்புபவர்களுக்கு இதன் செயல்படுதிறன் சற்று குறைவாகத் தோன்றலாம். அதேபோல், நிஜ உலக நடைமுறைப் பயன்பாட்டில், பேட்டரி வரம்பு நியூமரோஸ் நிறுவனம் அறிவிக்கும் IDC ரேஞ்சை (109கிமீ) விடக் குறைவாகவே கிடைக்கும். குறிப்பாக, பின்னால் பயணி ஒருவர் அமரும்போது அல்லது அதிக பளுவுடன் செல்லும்போது இந்த வித்தியாசம் மேலும் அதிகரிக்கும்.

எந்தவொரு வாகனத்திலும் பயண அனுபவம் ஆனது வாகனத்தின் சஸ்பென்ஷன் அமைப்பு மற்றும் வாகனத்தின் எடை ஆகியவற்றைப் பொறுத்தது ஆகும். அந்த வகையில், இந்த என்-ஃபர்ஸ்ட் எலெக்ட்ரிக் ஸ்கூட்டரில் வேகம் மற்றும் பளுவுக்கு ஏற்ப பயணத்தில் உறுதியோ அல்லது குலுக்கலோ ஏற்படலாம். நகரப் பயணங்களுக்கும், குறுகிய புறநகர் பயணங்களுக்கும் இது மிகவும் பொருத்தமானது.

தினசரி நகரப் பகுதிகளிலும், ஓரளவு புறநகர்ப் பகுதிகளிலும் பயணிப்பவர்களுக்கு இதன் பேட்டரி வரம்பும், சக்கர அளவும் பெரிய பலமாக இருக்கும். பின்னால் பயணி ஒருவரை அழைத்துச் செல்லும்போதும் அல்லது குறைந்த எடை கொண்ட பொருட்களை ஏற்றிச் செல்லும்போதும், பெரிய சக்கரங்களும், மேம்பட்ட நிலைத்தன்மையும் உதவியாக இருக்கும்.

நியூமரோஸ் என்-ஃபர்ஸ்ட் அறிமுகம் - பாதுகாப்பு அம்சங்கள்

நியூமரோஸ் என்-ஃபர்ஸ்ட், வேகம், பேட்டரி நிலை, செல்லும் தூரம் மற்றும் பயணத் தகவல்களைக் காட்டும் டிஜிட்டல் இன்ஸ்ட்ருமென்ட் கிளஸ்டர் திரை உடன் வந்துள்ளது. பயனர்கள், யுஎஸ்பி சார்ஜிங் மற்றும் சாவியில்லா ஸ்டார்ட் போன்ற அம்சங்களைப் பெறுகிறார்கள். ஸ்கூட்டர் மொபைல் செயலி உடன் இணைக்கக்கூடியதாக உள்ளது. இதன் மூலம், வாகனத்தின் நிலையை கண்காணிக்கவும், அறிவிப்புகளைப் பெறவும் முடியும்.

ஒருங்கிணைந்த பிரேக்கிங் சிஸ்டம் (CBS) மற்றும் டியூப்லெஸ் டயர்கள் போன்ற அம்சங்கள் பாதுகாப்பை உறுதி செய்கின்றன. இவை சிறந்த பிடிமானத்தையும், நிலைத்தன்மையையும் வழங்குகின்றன. ஸ்கூட்டரின் எல்இடி விளக்குகள் இரவில் மற்றும் மோசமான வானிலையில் சிறந்த ஒளி பிரகாசத்தை உறுதி செய்கின்றன. இவற்றுடன், ஸ்டாண்ட் உடன் ஸ்கூட்டரை ஓட்டினால் அதுகுறித்து எச்சரிப்பதற்காக சென்சார் மற்றும் திருட்டு எதிர்ப்பு அலாரம் ஆகியவற்றையும் என்-ஃபர்ஸ்ட் கொண்டுள்ளது. இது வாகனம் நிறுத்தி வைக்கப்பட்டிருக்கும்போதும் பாதுகாப்பை உறுதி செய்கிறது.

நியூமரோஸ் என்-ஃபர்ஸ்ட் அறிமுகம் – வகைகள் மற்றும் விலை

நியூமரோஸ் என்-ஃபர்ஸ்ட், இரண்டு வேரியண்ட்களில் கிடைக்கிறது. ஒன்று, 2.5 kW மோட்டார் கொண்டது, மற்றொன்று 3 kW மோட்டார் கொண்டது. இரண்டு வேரியண்ட்களும், பல்வேறு பயனர் தேவைகளுக்கு ஏற்றவாறு, வெவ்வேறு செயல்திறன் மற்றும் ரேஞ்ச் அளவுகளை வழங்குகின்றன.

நியூமரோஸ் என்-ஃபர்ஸ்ட் அறிமுகம் – கிடைக்கும் தன்மை மற்றும் போட்டியாளர்கள்

நியூமரோஸ் என்-ஃபர்ஸ்ட், தற்போது முக்கிய இந்திய நகரங்களில் அங்கீகரிக்கப்பட்ட டீலர்ஷிப் ஷோரூம்களில் கிடைக்கிறது. முன்பதிவுகள் தொடங்கப்பட்டுவிட்டன. முன்பதிவு செய்த தேதியில் இருந்து 2 முதல் 3 வாரங்களுக்குள் ஸ்கூட்டர் டெலிவரி செய்யப்படும் என எதிர்பார்க்கப்படுகிறது. இந்த ஸ்கூட்டர், ஓலா எஸ்1 ஏர் (Ola S1 Air), ஹீரோ எலக்ட்ரிக் ஆப்டிமா (Hero Electric Optima) மற்றும் டிவிஎஸ் ஐ-க்யூப் (TVS i-Qube) போன்ற எலெக்ட்ரிக் ஸ்கூட்டர்களுடன் மலிவு விலையிலான எலெக்ட்ரிக் ஸ்கூட்டர் பிரிவில் போட்டியிடுகிறது.

டிரைவ்ஸ்பார்க் கருத்து

ஸ்டைல், வசதி மற்றும் நடைமுறை அம்சங்களின் கலவையுடன், அன்றாடப் பயன்பாட்டிற்காக நம்பகமான மற்றும் மலிவு விலையில் எலெக்ட்ரிக் ஸ்கூட்டரைத் தேடும் நகர்ப்புறப் பயணிகளை புதிய நியூமரோஸ் என்-ஃபர்ஸ்ட் கவரக்கூடும். இந்த ஸ்கூட்டரின் விலை ரூ.65,000இல் இருந்து தொடங்குகிறது. இது பல பிரீமியம் ஸ்கூட்டர்களுடன் ஒப்பிடும்போது மிகவும் போட்டித்தன்மை வாய்ந்ததாகும்.