4 வீல் டிரைவுடன் கூடிய முதல் ஃபெராரி கார் அறிமுகம்

புகழ்பெற்ற 458 இட்டாலியானா மாடலின் முன்பக்கத்தை ஒத்துள்ளது எப்எப் வடிவமைப்பு. ஹேட்ச்பேக் ரகத்தை சேர்ந்ததாக இருந்தாலும், ஃபெராரி கார்களுக்கே உரிய ஸ்போர்ட்டி லுக் எப்எப் காரில் அப்பட்டமாக தெரிகிறது.

பொதுவாக ஃபெராரி கார்களில் பொருட்கள் வைப்பதற்கான இடம் குறைவாக இருக்கும். ஆனால், இந்த குறையை எப்எப் காரில் போக்கியுள்ளது ஃபெராரி. பொருட்கள் வைப்பதற்கு அதிக இடவசதியை கொடுக்கும் வகையில், பின் இருக்கைக்கு கீழே டிக்கியை நீ்ட்டி வடிவமைக்கப்பட்டுள்ளது.

ஹேட்ச்பேக் கார் என்றவுடன் வேகம் குறைந்த ஃபெராரி காராக இருக்குமோ? என்ற சந்தேகம் எழுவது சகஜம்தான். ஆனால், வி12 எஞ்சின் பொருத்தப்பட்ட எப்எப் பிக்கப்பில் ஃபெராரி கார்களுக்கே உரிய சீறும் குணத்தை காட்டி மிரட்டுகிறது.

வெறும் 3.7 வினாடிகளில் 0-100 கி.மீ., வேகத்தை எட்டிவிடுகிறது என்றால், இது கண்டிப்பாக ஃபெராரியின் வாரிசுதான் என்று யூகித்துக் கொள்ளமுடிகிறது. டியூவல் கிளட்ச், ஆட்டோமேட்டிக் கியர் ஆகிய அம்சங்களும் இதில் இருக்கிறது.