இந்த ஆண்டிலேயே குட்டி காரை அறிமுகப்படுத்த பஜாஜ் தீவிரம்

இருசக்கரம் மற்றும் மூன்று சக்கர வாகன தயாரிப்பில் முன்னிலை வகிக்கும் பஜாஜ் நிறுவனம், பிரான்சை சேர்ந்த ரினால்ட் நிறுவனத்துடன் இணைந்து குட்டி காரை அறிமுகப்படுத்த திட்டமிட்டுள்ளது. கார் வடிவமைப்பு மற்றும் உற்பத்தி பணிகளை பஜாஜ் கவனிக்கும். மார்க்கெட்டிங் மற்றும் விற்பனையை ரினால்ட் நிறுவனம் மேற்கொள்ளும் என்று தெரிவிக்கப்பட்டது.

இந்நிலையில், வடிவமைப்பு, பிராண்டு பெயர் வைப்பது உள்ளிட்டவற்றில் எழுந்த பிரச்னைகளால் குட்டி கார் தயாரிக்கும் பணிகள் தடைபட்டது. இதுதொடர்பாக, பஜாஜ் ஆட்டோ மற்றும் ரினால்ட் நிறுவன அதிகாரிகளிடையே நடந்த பேச்சுவார்த்தைகளில் தற்போது சுமூக முடிவு எட்டப்பட்டுள்ளது.

இதையடுத்து, குட்டி கார் தயாரிக்கும் பணிகளை பஜாஜ் ஆட்டோ முடுக்கிவிட்டுள்ளது. காரின் வடிவமைப்பு குறித்து ரினால்ட் நிறுவனம் திருப்தி தெரிவித்துள்ளதாகவும் தெரிவிக்கப்பட்டுள்ளது. இதனால், எதிர்பார்த்ததற்கு முன்னதாகவே குட்டிகார் அறிமுகப்படுத்தப்படும் என்று தெரிவிக்கப்பட்டுள்ளது.

இதுகுறித்து பஜாஜ் ஆட்டோ மேலாண் இயக்குனர் கூறுகையில்," நடுத்தர மக்களின் எதிர்பார்ப்புகளை மனதில்கொண்டு குட்டி கார் வடிவமைக்கப்பட்டு வருகிறது. மேலும், இந்த குட்டி கார் லிட்டருக்கு 30 கி.மீ., செல்லும் என்பதால், எரிபொருள் சிக்கனத்தில் சிறப்பாக இருக்கும். இந்த ஆண்டிலேயே காரின் மாதிரியை வெளியிட திட்டமிட்டுள்ளோம்," என்றார்.