ரூ.1.26 கோடி விலையில் புதிய ஆடம்பர கார் :ஆடி அறிமுகம்

ஏற்கனவே பல சொகுசு கார்களை விற்பனை செய்துவந்தாலும், இந்த காரில் ஆடி நிறுவனத்துக்குரிய கூடுதல் சிறப்பு வசதிகளுடன் வந்துள்ளது.

இந்த கார் அதிக வீல்பேஸ் கொண்டிருப்பதால், முன்வரிசை மற்றும் பின்வரிசை இருக்கைகளில் லெக்ரூம் என்று கூறப்படும் கால்களை நீட்டி உட்கார அம்சமாக இருக்கிறது.பின்பக்க இருக்கையின் நடுவில் ஃப்ரிட்ஜுடன் பொருட்கள் வைப்பதற்கான கன்சோல் இருக்கிறது. தலைசாய்த்துக்கொள்ள வசதியான ஹெட்ரெஸ்ட்டும் உண்டு.

முன்வரிசை இருக்கையின் பின்புறம் 10.1 இஞ்ச் அகலம் கொண்ட இரண்டு திரைகள் பொருத்தப்ப்டடுள்ளன. மேலும், எலக்ட்ரிகல் கன்ட்ரோல் மூலம் பின்பக்க இருக்கையை வெதுவெதுப்பாகவும், குளிச்சியாகவும் மாற்றும் வசதியில் ஏ-8 எல் தனது ஆடம்பரத்தனத்தை காட்டுகிறது.

6.3 லிட்டர் டபிள்யூ-12 எஞ்சின் 500 குதிரைசக்தி கொண்ட எஞ்சின் ஆற்றலை வாரி இறைக்கிறது. இது, 100 கிமீ வேகத்தை வெறும் 4.7 வினாடிகளில் தொட்டுவிடும். 8 ஸ்பீடு கொண்ட டிரிப்ட்ரோனிக் கியர் பாக்ஸை கொண்டது. ஸ்டீயரிங் வீல் அடியில் கியர் மாற்றும் ஆப்சனல் லிவரும் கூடுதலாக கொடுக்கப்பட்டுள்ளது.

நவீன தகவல்தொடர்பு, புளூடூத், சன்ரூப், ரன்னிங் ஹெட்லைட்ஸ் என கலக்குகிறது ஆடி ஏ-8 எல். இந்த கார் நேற்றுதான் முறைப்படி அறிமுகம் செய்யப்பட்டாலும், ஏற்கனவே 20 கார்கள் புக்கிங் செய்யப்பட்டு விற்கப்பட்டுவிட்டதாக, ஏ-8எல் காரை அறிமுகம் செய்த ஆடி தலைவர் மைக்கேல் பெர்ஷ்க் தெரிவித்தார்.

மஹாராஷ்டிராவில் இந்த காருக்கு ரூ.1.26 கோடி எக்ஸ்ஷோரூம் விலையில் விற்பனை செய்யப்படும் என்று ஆடி நிறுவனம் தெரிவித்துள்ளது.