கடந்த மாதம் டிரக் விற்பனை 10.5 % உயர்வு

கடந்த ஆணடு ஆட்டோமொபைல் துறையின் வளர்ச்சியில் டிரக் விற்பனையும் குறிப்பிடத்தக்க பங்களிப்பை வழங்கியது. ஆனால், இந்த ஆண்டு ஆட்டோமொபைல் துறையின் வளர்ச்சி எதிர்பார்த்தபடி அமையவில்லை.

பைனான்ஸ் நிறுவனங்கள் வட்டியை உயர்த்தியதாலும், தொடர்ந்து எகிறி வரும் பெட்ரோல் டீசல் விலை உயர்வாலும் ஆட்டோமொபைல் துறையின் விற்பனை மந்தமாக உள்ளது.

ஆனால், இவற்றையும் தாண்டி டிரக் விற்பனை தொடர்ந்து முன்னேற்ற பாதையில் செல்கிறது. கடந்த மாதம் டிரக் விற்பனை 10.5 சதவீத வளர்ச்சியை பதிவு செய்துள்ளது.

இதில், அதிகபட்சமாக 5 முதல் 7.5 டன் எடை சுமக்கும் திறன் கொண்ட இலகு ரக டிரக் விற்பனை 25.8 சதவீத வளர்ச்சியை பதிவு செய்துள்ளது. இதற்கு அடுத்து, 8 முதல் 12 டன் எடை சுமக்கும் திறன் கொண்ட டிரக் விற்பனை 19.4 சதவீத வளர்ச்சியை பதிவு செய்துள்ளது.

மல்டி ஆக்சில் டிரக் பிரிவு (25.2 முதல் 31 டன் வரை) கடந்த மாதம் 5 சதவீத வளர்ச்சியை பதிவு செய்துள்ளதாக, இந்திய போக்குவரத்து மற்றும் ஆராய்ச்சி பவுண்டேஷன் (ஐஎப்டிஆர்டி) வெளியிட்ட அறிக்கையில் தெரிவிக்கப்பட்டுள்ளது.