சிறு நகரங்களில் விற்பனை மையங்களை திறக்க ஃபோர்டு திட்டம்

கடந்த ஆண்டு அறிமுகம் செய்யப்பட்ட ஃபிகோ காரின் விற்பனை ஏறுமுகத்தில் இருப்பதால், அந்த உற்சாகத்தில் ஃபோர்டு, தனது வர்த்தகத்தை பெரிய அளவில் விரிவாக்கம் செய்யும் முயற்சிகளை மேற்கொண்டுள்ளது.

அடுத்த சில ஆண்டுகளில் 6 புதிய கார் மாடல்களை ஃபோர்டு அறிமுகம் செய்ய இருக்கிறது. இதில், சின்ன கார்களும் அடங்கும்.

எனவே, புதிய கார்கள் வருவதற்குள் தனது டீலர் நெட்வொர்க்கை பலப்படுத்தி கொள்ள அந்த நிறுவனம் திட்டமிட்டுள்ளது.

சிறு நகரங்களில் புதிய விற்பனை மையங்களை திறக்க திட்டமிட்டுள்ள அந்த நிறுவனம், இந்த ஆண்டு இறுதிக்குள் தனது விற்பனை மையங்களின் எண்ணிக்கையை 200ஆக அதிகரிக்கவும் திட்டமிட்டுள்ளது.

இதுகுறித்து ஃபோர்டு மார்க்கெட்டிங் இயக்குனர் நிகேல் வார்க் கூறியதாவது:

"நாடு முழுவதும் உள்ள 108 நகரங்களில் தற்போது 189 விற்பனை மற்றும் சர்வீஸ் மையங்களை பெற்றிருக்கிறோம். வர்த்தகத்தை விரிவாக்கும் வகையில் இந்த ஆண்டு இறுதிக்குள் மேலும் 20 புதிய விற்பனை மையங்களை திறக்க இருக்கிறோம்.

மாநகரங்களில் போதுமான அளவு டீலர் நெட்வொர்க்கை பெற்றுள்ளோம். எனவே, தற்போது கிராமப்புற சந்தையில் எங்களது சேவை கிடைக்கும் வகையில் வர்த்தக விரிவாக்கத்தை மேற்கொள்ள இருக்கிறோம்," என்றார்.