பார்முலா-1 கார் பந்தயங்கள் பற்றிய சுவாரஸ்ய தகவல்கள்

ஒரு நிமிடத்திற்கு அதிகபட்சம் 18,000 முறை சுழலும்(ஆர்பிஎம்) திறன் படைத்த பார்முலா-1 கார் எஞ்சின்கள் ஒரு நொடிக்கு 450 லிட்டர் காற்றை உட்கொள்கின்றன. மேலும், 100 கிமீ செல்வதற்கு 75 லிட்டர் எரிபொருளை உறிஞ்சித்தள்ளுகின்றன.

பார்முலா-1 பந்தயங்களின் விதிமுறைகளின்படி, ஒரு சீசனுக்கு 8 எஞ்சின்களை மட்டுமே ஒரு அணி பயன்படுத்த முடியும். இந்த எண்ணிக்கையை தாண்டினால் அந்த அணியின் டிரைவருக்கு அபராதம் விதிக்கப்படும். இதேபோன்று, காருக்கு ஒரு கியர் பாக்ஸை 4 போட்டிகளுக்கு மட்டுமே பயன்படுத்திக்கொள்ள அணிகளுக்கு அனுமதியுண்டு.

மேலும், சர்வதேச பார்முலா-1 சம்மேளனத்தின்(எப்ஐஏ)வழிகாட்டுதலின்படியே எஞ்சின்கள் தயாரிக்க வேண்டும். இதற்காக, பார்முலா-1 எஞ்சின் தயாரிப்புக்காக பல கடுமையான வழிமுறைகளை எப்ஐஏ கடைபிடித்து வருகிறது.

இதற்கு முன்னர் கூடுதல் பிக்கப் வேண்டும் என்பதற்காக பார்முலா-1 கார்களுக்கான எரிபொருளில் பவர் பூஸ்டர்கள், பென்ஸீன், ஆல்கஹால் மற்றும் விமான பெட்ரோல் ஆகியவை பயன்படுத்தப்பட்டன. ஆனால், தற்போது அதிக சக்திவாய்ந்த பவர் பூஸ்டர்களை பயன்படுத்த தடைவிதிக்கப்பட்டுள்ளது.

மேலும், தட்பவெப்பம், ரேஸ் டிராக்கின் தன்மை ஆகியவற்றை பொறுத்து 50 விதமான கலவைகள் கொண்ட எரிபொருள்கள் தற்போது பயன்படுத்தப்படுகின்றன.

பந்தயம் மற்றும் பயிற்சியின்போது ஒரு அணி சராசரியாக 2,00,000 லிட்டர் எரிபொருளை ஒரு சீசனில் பயன்படுத்துகிறது.

சாதாரணமாக, கார்களில் பொருத்தப்பட்டிருக்கும் டயர்கள் 16,000 கிமீ வரையிலோ அல்லது அதற்கு மேலும் செல்லும் வகையில் இருக்கும். ஆனால், பார்முலா-1 கார்களில் பொருத்தப்படும் டயர்கள் வெறும் 200 கிமீ வரை செல்லும். பின்னர் புதிய டயர் மாற்ற வேண்டும்.

பார்முலா-1 பந்தயங்களில் பங்கேற்கும் அணி ஒரு சீசனில் பயிற்சி மற்றும் பந்தயங்களுக்காக 1,60,000 கிமீ பயணம் செய்கிறது என்பது குறிப்பிடத்தக்கது.