"பழைய மாடல் ஸ்விப்ட் வாங்கிக்கொள்ளுங்கள்" - மாருதி டீலர் அட்வைஸ்

பெரும் எதிர்பார்ப்புடன் கடந்த மாதம் அறிமுகம் செய்யப்பட்ட புதிய ஸ்விப்ட் கார் புக்கிங்கில் அசத்தியது. 90,000 கார்கள் வரை புக்கிங் செய்யப்பட்டுள்ளதாக மாருதி வட்டாரங்கள் தெரிவித்துள்ளன.

இந்த நிலையில், புதிய ஸ்விப்ட் கார் உற்பத்தி செய்யப்படும் மானேசரிலுள்ள மாருதி ஆலையில் தொழிலாளர்களின் ஸ்ட்ரைக் காரணமாக புதிய ஸ்விப்ட் கார் உற்பத்தி கடுமையாக பாதிக்கப்பட்டுள்ளது.

குறித்த நேரத்தில் வாடிக்கையாளர்களுக்கு புதிய ஸ்விப்ட் காரை டெலிவிரி செய்ய முடியாத நிலையில் மாருதி உள்ளது. மேலும், ஸ்விப்ட் காரின் புக்கிங் செய்து காத்திருக்கும் காலம் 8 மாதங்கள் வரை நீண்டுள்ளது. இதனால், வாடிக்கையாளர் மத்தியில் அதிருப்தி நிலவுகிறது.

இந்த நிலையில், புதிய ஸ்விப்ட் வாங்க முடியாமல் வருந்தும் வாடிக்கையாளர்களை பழைய மாடல் ஸ்விப்ட் காரை வாங்கிக்கொள்ளுமாறு பரிந்துரைத்து வருவதாக மாருதி டீலர் ஒருவர் தெரிவித்தார்.

பழைய ஸ்விப்ட் காரை விட புதிய ஸ்விப்ட் காரின் வடிவமைப்பு மற்றும் வசதிகளில் பல மாற்றங்கள் செய்யப்பட்டுள்ளன. இருந்தாலும், பழைய மற்றும் புதிய ஸ்விப்ட் கார்களில் ஒரே எஞ்சின்தான் என்பதால், பழைய காரை வாங்கிக்கொள்ளுமாறு பரிந்துரைப்பதாக அவர் தெரிவித்தார்.

புதிய ஸ்விப்ட் அறிமுகம் செய்யப்பட்டதால் டீலர்களில் ஏராளமான பழைய ஸ்விப்ட் கார்கள் விற்பனையாகாமல் தங்கி விட்டன. இதனால், டீலர்கள் கவலையில் ஆழ்ந்திருந்தனர். இந்த நிலையில், புதிய ஸ்விப்ட் கார் டெலிவிரி தாமதம் ஆவதை காரணம் காட்டி இருப்பு உள்ள பழைய மாடல் ஸ்விப்ட் கார்களை விற்பனை செய்யும் முயற்சிகளை சில டீலர்கள் துவங்கியுள்ளனர்.

மேலும், இருப்பு உள்ள பழைய ஸ்விப்ட் கார்களை உடனடியாக டெலிவிரி எடுத்துக்கொள்ளலாம் என்றும் வாடிக்கையாளர்களிடம் கூறுவதாகவும் அந்த டீலர் தெரிவித்தார்.