குறைந்த வட்டியில் கார் கடன்: ஸ்டேட் வங்கியுடன் நிசான் ஒப்பந்தம்

கார் விற்பனையை அதிகரிக்க நிசான் மோட்டார்ஸ் பல்வேறு முயற்சிகளை மேற்கொண்டுள்ளது. இந்த நிலையில், வாடிக்கையாளர்களுக்கு எளிய முறையில் கார்க் கடன் பெறும் வகையில் நாட்டின் மிகப்பெரிய வங்கியான ஸ்டேட் பேங்க் ஆப் இந்தியாவுடன் ஒப்பந்தம் செய்துகொண்டுள்ளது.

இந்த ஒப்பந்தத்தின் மூலம் நிசான் கார்களை வாங்கும் வாடிக்கையாளர்கள் 11.25% ப்ளோட்டிங் வட்டி வீதத்திலும், 11.75% ஃபிக்ஸ்டு வட்டி வீதத்திலும் கார்க் கடன்களை பெறலாம்.

இந்த ஒப்பந்தத்தின் மூலம் மார்க்கெட்டில் உள்ள மற்ற நிறுவனங்கள் வழங்கும் கார்க்கடன்களை விட குறைந்த வட்டி வீதத்தில் நிசான் கார்களுக்கு கடன் வசதியை வாடிக்கையாளர்கள் பெற்றுக்கொள்ளலாம் என்று தெரிவிக்கப்பட்டுள்ளது.

இதுதவிர, குறைந்த வட்டியில் நிசான் டீலர்களுக்கும் ஸ்டேட் வங்கி கடன் வசதியை வழங்க இருப்பதாகவும் தெரிவிக்கப்ப்டடுள்ளது.

இதுகுறித்து நிசான் மோட்டார்ஸ் தலைமை நிதி நிர்வாக அதிகாரி சுனில் ரேகி கூறுகையில்,"வாடிக்கையாளர்கள் எளிதாக கார் கடன் வசதியை பெறும் வகையில் இந்த ஒப்பந்தம் செய்யப்பட்டுள்ளது.

நாடு முழுவதும் பரந்து விரிந்த வங்கி கிளைகளை பெற்றுள்ள ஸ்டேட் வங்கி வழியாக வாடிக்கையாளர்கள் மிக எளிதாக கடன் வசதியை பெற முடியும் என்பதை பெருமிதத்துடன் தெரிவிக்கிறோம்," என்று கூறினார்.