எளிய வாகன கடன்: மஹிந்திரா-ஓரியண்டல் வங்கி ஒப்பந்தம்

மஹிந்திராவின் விற்பனை பிரிவு மூத்த துணைத் தலைவர் அருண் மல்ஹோத்ரா மற்றும் ஓரியண்டல் வங்கியின் பொது மேலாளர் அதுல் கவுதம் ஆகியோர் இந்த ஒப்பந்தத்தில் கையெழுத்திட்டனர்.

இந்த ஒப்பந்ததின் மூலம் நாடு முழுவதும் உள்ள 1808 ஓரியண்டல் வங்கி கிளைகளில் மஹிந்திராவின் 250 டீலர்கள் வாயிலாக கார்கள் மற்றும் வர்த்தக வாகனங்களுக்கு எளிய கடன் வசதியை வாடிக்கையாளர்கள் பெற முடியும்.

இதுகுறித்து ஓரியண்டல் வங்கி தலைவர் கூறுகையில்," வாகன கடன் துறையில் தீவிரமாக கவனம் செலுத்தி வருகிறோம். மஹிந்திராவுடன் இணைந்து பணியாற்றப் போவது மகிழ்ச்சி தருகிறது. வாடிக்கையாளர்களுக்கு சிறந்த சேவையை வழங்குவோம்," என்றார்.

மஹிந்திரா விற்பனைப் பிரிவின் மூத்த துணைத்தலைவர் அருண் மல்ஹோத்ரா கூறுகையில்," வாடிக்கையாளர்களுக்கு பயன்படும் சிறப்பான திட்டங்களை செயல்படுத்த முன்னுரிமை அளித்து வருகிறோம்.

ஓரியண்டல் வங்கி எளிய கடன் திட்டங்களுடன், சிறப்பான சேவையை வழங்கி வருகிறது. எனவே, ஓரியண்டல் வங்கியுடன் இணைந்து வாடிக்கையாளர்களுக்கு சேவை செய்வதில் பெரு மகிழ்ச்சி கொள்கிறோம்.

வர்த்தக வாகனங்களுக்கு ஆன்ரோடு விலையில் 80 சதவீதம் வரை கடன் பெற முடியும். மேலும், அதிகபட்சம் 84 தவணைகளில் திருப்பி செலுத்தும் திட்டங்களும் உள்ளன. இது வாடிக்கையாளர்களிடம் சிறந்த வரவேற்பை பெறும் என்று நம்புகிறோம்," என்று கூறினார்.