இந்தியாவிலிருந்து ஏற்றுமதியாகும் மைக்ராவுக்கு நிசான் ரீகால்

ஜப்பானை சேர்ந்த நிசான் நிறுவனம் இந்தியாவை ஏற்றுமதி கேந்திரமாக பயன்படுத்தி வருகிறது. சென்னை அருகே தனது கூட்டணி நிறுவனமான ரினால்ட்டுடன் இணைந்து ரூ.4,500 கோடியில் கட்டியுள்ள கார் ஆலையில் இருந்து மைக்ரா ஹேட்ச்பேக் கார்களை அந்த நிறுவனம் ஏற்றுமதி செய்து வருகிறது.

இந்த நிலையில், தனது சில கார் மாடல்களில் எரிபொருள் அளவீடு சென்சாரில் கோளாறு இருப்பது குறித்து வந்த புகார்களையடுத்து 2.50 லட்சம் கார்களை சர்வதேச அளவில் அந்த நிறுவனம் திரும்ப பெறுவதாக அறிவித்துள்ளது.

இதில், இந்தியாவிலிருந்து ஐரோப்பிய நாடுகளுக்கு ஏற்றுமதி செய்யப்பட்ட மைக்ரா கார்களில் தொழில்நுட்பக் கோளாறு இருப்பது கண்டறியப்பட்டுள்ளது. இதுவரை சென்னை ஆலையில் இருந்து ஐரோப்பிய நாடுகளுக்கு ஏற்றுமதி செய்யப்பட்ட 9,600 மைக்ரா கார்களை நிசான் திரும்ப பெறுகிறது.

அதேவேளை, இந்தியாவில் விற்பனை செய்யப்பட்ட மைக்ரா கார்களுக்கு இந்த அறிவிப்பு பொருந்தாது என்று நிசான் தெரிவித்துள்ளது.