2011ல் இரட்டிப்பான வோக்ஸ்வேகன் விற்பனை வளர்ச்சி

இந்த நிலையில், கடந்த ஆண்டு வோக்ஸ்வேகன் குழுமத்தின் கீழ் செயல்படும் ஆடி, ஸ்கோடா மற்றும் வோக்ஸ்வேகன் ஆகிய மூன்று நிறுவனங்களின் ஒட்டுமொத்த கார் விற்பனை 109.3 சதவீதம் அதிகரித்துள்ளது.

குறுகிய காலத்தில் அந்த நிறுவனம் வேகமான வளர்ச்சியை பதிவு செய்துள்ளது. கடந்த 2010ம் ஆண்டில் ஒட்டுமொத்தமாக 53,341 கார்களை விற்பனை செய்திருந்த அந்த குழமம் கடந்த ஆண்டில் 1,11,623 கார்களை விற்பனை செய்துள்ளது.

இதில், கடந்த 2010ல் 30,319 கார்களை விற்பனை செய்திருந்த வோக்ஸ்வேகன் கடந்த ஆண்டு 76,107 கார்களை விற்பனை செய்துள்ளது. இதேபோன்று, ஸ்கோடா ஆட்டோ நிறுவனத்தின் விற்பனை 20,019 கார்களிலிருந்து 30,005 கார்களாக அதிகரித்துள்ளது.

வோக்ஸ்வேகன் குழுமத்தின் சொகுசு கார் பிராண்டான ஆடி நிறுவனத்தின் கார் விற்பனை 3,003 கார்களிலிருந்து கடந்த ஆண்டு 5,511 கார்களாக அதிகரித்துள்ளது.

இந்த நிலையில், 21 கார் மாடல்களை இந்தியாவில் விற்பனை செய்து வரும் வோக்ஸ்வேகன் குழுமம் பெரிய அளவிலான வர்த்தக விரிவாக்கத்தை இந்தியாவில் மேற்கொள்ள உள்ளது. இதற்காக, இந்தியாவில் புதிதாக ரூ.2,000 கோடியை முதலீடு செய்ய இருப்பதாக தெரிவித்துள்ளது குறிப்பிடத்தக்கது.