இதுவரை 70,000 மாருதி எர்டிகா கார்கள் விற்பனை!

Updated: Monday, April 1, 2013, 13:09 [IST]

அறிமுகம் செய்யப்பட்டு ஓர் ஆண்டு நிறைவடைய இருக்கும் நிலையில் இதுவரை 70,000 க்கும் மேற்பட்ட எர்டிகா எம்பிவி கார்களை மாருதி விற்பனை செய்துள்ளது. ஹேட்ச்பேக் கார் மார்க்கெட்டை தாண்டி வெளியே வர ஆசைப்பட்ட மாருதி இந்தியாவின் முதலாவது காம்பெக்ட் எம்பிவி காராக எர்டிகாவை விற்பனைக்கு கொண்டு வந்தது.

இடவசதி, சிறந்த எஞ்சின்கள் மற்றும் சரியான விலை உள்ளிட்ட காரணங்களால் வாடிக்கையாளர்கள் மத்தியில் அமோக வரவேற்பை பெற்றது. வரும் 12ந் தேதியுடன் எர்டிகா அறிமுகம் செய்யப்பட்டு ஓர் ஆண்டு நிறைவடைய உள்ளது. இந்தநிலையில், இதுவரை 70,000 எர்டிகா கார்களை மாருதி விற்பனை செய்துள்ளது.

எஞ்சின்

கே-14 விவிடி பெட்ரோல் எஞ்சின் மற்றும் 1.3 லிட்டர் டிடிஐஎஸ் சூப்பர் டர்போ எஞ்சினுடன் எர்டிகா கிடைக்கிறது. பெட்ரோல் எஞ்சின் 6,000 ஆர்பிஎம் எஞ்சின் சுழல்வேகத்தில் 93.7 பிஎச்பி ஆற்றலையும், டீசல் எஞ்சின் 6,000 ஆர்பிஎம் எஞ்சின் சுழல் வேகத்தில் 88.7 பிஎச்பி ஆற்றலையும் வெளிப்படுத்தும் ஆற்றல் கொண்டதாக இருக்கும்.

வடிவமைப்பு

4265 மிமீ நீளம், 1,695 மிமீ அகலம் மற்றும் 1,685 மிமீ உயரமும் கொண்ட காம்பெக்ட் காராக வரும் எர்டிகாவில் 7 பேர் அமர்ந்து செல்ல ஏதுவாக சிறப்பாக வடிவமைக்கப்பட்டுள்ளது.. மேலும், எர்டிகா 2,740 மிமீ வீல் பேஸ் கொண்டதாகவும் இருப்பதால் உட்புறத்தில் தாராள இடவசதி இருக்கிறது. 15 இஞ்ச் அலாய் வீல்கள் எர்டிகாவின் எடுப்பை கூட்டுகிறது.

உட்புற வடிவமைப்பு

பிரிமியம் லுக்கை தரும் வகையில் எர்டிகாவின் உட்புறத்தை மிக கவனமாக மெருகேற்றியுள்ளது மாருதி. 3 ஸ்போக்ஸ் டில்ட் எலக்ட்ரிக் பவர் ஸ்டீயரிங், ட்வின் ஏசி, யுஎஸ்பி போர்ட்டுடன் 4+2 ஸ்பீக்கர்களுடன் கூடிய ஆடியோ சிஸ்டம், ஸ்டீயரிங் வீலில் ஆடியோ கன்ட்ரோல் ஸ்விட்சுகள் உள்ளிட்ட அம்சங்கள் உள்ளன.

இதர வசதிகள்

சென்ட்ரல் டோர் லாக்கிங், கீ லெஸ் என்ட்ரி மற்றும் மல்டி இன்பர்மேஷன் டிஸ்ப்ளே, பவர் விண்டோஸ், ஆட்டோமேட்டிக் ரியர் வியூ மிரர்கள் என ஏராளமான நவீன வசதிகளை எர்டிகா கொடுக்கும்.

இருக்கை அமைப்பு

7 பேர் அமர்ந்து செல்லும் வசதிகொண்ட எர்டிகாவில் முதல் வரிசை இருக்கையில் 2 பேரும், இரண்டாவது இருக்கையில் 3 பேரும், கடைசியில் மூன்றாவது வரிசை இருக்கையில் 2 பேரும்(2+3+2) அமர்ந்து செல்லும் வகையில் அமைக்கப்பட்டிருக்கிறது.

பயன்பாடு

அலுவலகம் செல்ல தினசரி பயன்பாடு, வார கடைசியில் வெளியில் செல்லவும், வெளியூர் மற்றும் வர்த்தக பணிகளுக்காக பயன்படுத்தும் வகையில் ஓர் முழுமமையான காராக எர்டிகா எம்பிவி இருக்கிறது.

மைலேஜ்

7 பேர் செல்லும் வசதிகொண்ட எர்டிகாவின் பெட்ரோல் மாடல் லிட்டருக்கு 16.02 கிமீ மைலேஜையும், டீசல் மாடல் லிட்டருக்கு 20.77 கிமீ மைலேஜையும் கொடுக்கும் என மாருதி தெரிவித்துள்ளது. இதனால், பொருளாதார ரீதியிலும் சிக்கனமான காராக எர்டிகா இருப்பதாக மாருதி அடித்து கூறுகிறது.