காரில் எரிபொருளை மிச்சப்படுத்துவதற்கான வழிமுறைகள்

காரில் எரிபொருளை மிச்சப்படுத்துவதற்காக செய்ய வேண்டியது என்ன?, அதன்மூலம் எவ்வளவு சதவீதம் எரிபொருள் மிச்சமாகிறது என்பது குறித்த விபரங்களை இங்கே காணலாம்.

ப்ளான் பண்ணி போகணும்:

தினசரி செல்லும் இடங்களை தவிர பிற இடங்களுக்கு செல்லும்போது திட்டமிட்டு சரியான வழியை தேர்ந்தெடுத்து செல்வதன் மூலம் 15 சதவீதம் எரிபொருளை சேமிக்க முடியும். சற்று தொலைவு அதிகமாயினும் நல்ல ரோடாக தேர்ந்தெடுத்து செல்வது முக்கியம்.

கூடுதல் எடை:

காரின் டிக்கியில் அளவுக்கு அதிகமாகவும், தேவையில்லாத பொருட்களையும் ஏற்றுவதை தவிர்க்கவும். இதன்மூலம், 15 சதவீதம் எரிபொருளை மிச்சப்படுத்த முடியும்.

கதவு கண்ணாடி:

கார் கதவு கண்ணாடிகளை திறந்து வைத்து செல்வதை தவிர்க்கவும். இதனால், காரின் முன்னோக்கி செல்லும் திறன் காற்றால் பாதிக்கப்படும். இதேபோன்று, காரின் மேற்கூரையில் அதிக அளவு பொருட்களை ஏற்ற வேண்டாம். இதன்மூலம், 27 சதவீத எரிபொருளை மிச்சப்படுத்த முடியும்.

கிளட்ச், பிரேக்:

கிளட்ச், பிரேக்கை சிலர் பிடித்துக்கொண்டே ஓட்டுவர். இதை தவிர்ப்பதுடன் தேவையான இடங்களில் மட்டும் பயன்படுத்த வேண்டும். இதன்மூலம், 18 சதவீத எரிபொருளை மிச்சப்படுத்தலாம்.

வேகம் விவேகமல்ல:

காரோ, பைக்கோ மிதமான வேகத்தில் ஓட்ட பழகிக்கொள்ளுங்கள். அலுவலகமாயினும், பிற இடங்களுக்கு செல்வதாயினும் 15 நிமிடம் முன்கூட்டியே கிளம்புங்கள். இதன்மூலம், 15 சதவீத எரிபொருள் மிச்சமாவதோடு, தேவையில்லாமல் பதட்டப்பட்டு வாகனத்தை ஓட்ட வேண்டி இருக்காது.

எரிபொருள் தரம்:

எரிபொருளின் தரம் மைலேஜுக்கு அதிக முக்கிய காரணமாக இருக்கிறது. எனவே, தரமும், சரியான அளவு தரும் ஒரே பெட்ரோல் பங்கில் எரிபொருள் நிரப்புங்கள். இதன்மூலம், 10 சதவீதம் வரை எரிபொருள் மிச்சமாகும்.

சிக்னல்:

சிக்னல்களில் நிற்கும்போது 35 வினாடிகளுக்கு மேல் நிறுத்த வேண்டிய அவசியம் இருப்பின், கண்டிப்பாக எஞ்சினை ஆஃப் செய்து விடவும். இதனால், 4 சதவீதம் வரை எரிபொருளை மிச்சப்படுத்தலாம். குறிப்பாக, கார்கள் ஐடிலிங்கில் இருக்கும்போது ஒரு மணி நேரத்துக்கு ஒரு லிட்டர் எரிபொருள் செலவாகும் என்று சமீபத்திய ஆய்வு கூறுகிறது.

ஏசி:

தேவையில்லாதபோது ஏசியை பயன்படுத்தாமல் இருப்பது நல்லது. ஏசியால் எஞ்சினுக்கு கூடுதல் பளு ஏற்படுவதால் அதிக எரிபொருள் செலவாகும். ஏசியை தேவையானபோது மட்டும் பயன்படுத்தினால் 10 சதவீதம் அளவுக்கு எரிபொருளை மிச்சப்படுத்த முடியும்.

பத்திரமா பார்த்துக்குங்க:

கார் நிறுவனத்தின் கையேட்டில் கொடுத்துள்ளவாறு சரியான இடைவெளிகளில் காரை சர்வீஸ் செய்துவிடவும். எஞ்சின் ஆயில் மற்றும் டயர்களில் காற்றின் அழுத்தம் ஆகியவற்றை அவ்வப்போது செக்கப் செய்து விடவேண்டும். இதன்மூலம், 8 சதவீத எரிபொருளை மிச்சப்படுத்தலாம்.