ஐ.எஸ்.ஐ முத்திரை மட்டும்தானே நமக்கு தெரியும்! எல்லா ஹெல்மெட்டும் ஒண்ணு கிடையாது! வாங்கும்போது கவனம் தேவை!

மோட்டார்சைக்கிளில் பயணிக்கும் ஒவ்வொருவருக்கும் தலைக்கவசம் (Helmet) மிக மிக அத்தியாவசியமான பாதுகாப்பு அம்சமாகும். விபத்து சமயங்களில் உயிரிழப்பை தடுப்பதுடன், தலையில் ஏற்படும் கடுமையான காயங்களில் இருந்தும் பாதுகாக்கிறது. சரியான தலைக்கவசத்தைத் தேர்ந்தெடுக்காவிட்டால், பாதுகாப்புத் திறன் குறைந்து ஆபத்துகள் அதிகரிக்கக்கூடும். ஆகையால், உரிய அனுமதிப் பெற்ற, கச்சிதமாகப் பொருந்தக்கூடிய தலைக்கவசத்தைத் தேர்ந்தெடுப்பது மிகவும் முக்கியம்.

சான்றிதழ் பெற்ற தலைக்கவசமே அவசியம்: இருசக்கர வாகன ஓட்டிகள் தலைக்கவசம் வாங்கும்போது, எப்போதும் தரச்சான்றிதழ் பெற்றவற்றையே தேர்வு செய்ய வேண்டும். இந்தியாவில் ISI சான்றிதழ் கட்டாயமாகும், இது தலைக்கவசத்தில் கண்டிப்பாக குறிப்பிடப்பட்டு இருக்க வேண்டும். ECE, DOT அல்லது ஸ்னெல் (Snell) போன்ற பிற சான்றிதழ்கள் உயர்ந்த பாதுகாப்புத் தரங்களைக் குறிப்பதால், அவையும் இருப்பது கூடுதல் நன்மை. சில தலைக்கவசங்களில் போலியான சான்றிதழ் ஸ்டிக்கர்கள் இருக்கலாம் என்பதால் எச்சரிக்கையாக இருக்கவும். இதைத் தவிர்க்க, அங்கீகரிக்கப்பட்ட விற்பனையாளர்கள் அல்லது அதிகாரப்பூர்வ கடைகளில் மட்டுமே ஹெல்மெட்டை வாங்கி, முறையான உத்தரவாதத்தை உறுதி செய்யவும்.

சரியான தலைக்கவச வகையைத் தேர்ந்தெடுத்தல்: தலைக்கவசங்கள் வெவ்வேறு வகைகளில் கிடைக்கின்றன. முழு முகக் கவசங்கள் தலையின் முழுப் பகுதியையும், தாடை, கன்னம் பகுதிகளையும் மூடி அதிகபட்ச பாதுகாப்பை வழங்குகின்றன. உயர்ந்த பாதுகாப்புக்காக இவை மிகவும் பரிந்துரைக்கப்படுகின்றன. மாடுலர் அல்லது ஃபிளிப்-அப் (Flip-up) தலைக்கவசங்கள் சௌகரியமான வசதிக்கும், பாதுகாப்பிற்கும் இடையே சமநிலையை வழங்குகின்றன. இவை நகரப் பயணங்களுக்குப் பயனுள்ளதாக இருக்கும். பாதி முகக் கவசங்கள் முகத்தை வெளிப்படையாக விடுவதால் மிகக் குறைந்த பாதுகாப்பையே தருகின்றன. பாதுகாப்புக்கு முதலிடம் எனில், முழு முகக் கவசங்களே சிறந்த தேர்வாகும்.

சரியான வைசரை (Visor) தேர்வு செய்தல்: பகல் மற்றும் இரவு என அனைத்து வெளிச்ச நிலைமைகளிலும் சிறந்த பார்வையை வழங்குவதால், வெளிப்படையான வைசர்களே பொதுவாக பரிந்துரைக்கப்படுகின்றன. வண்ணமயமான வைசர்கள் ஸ்டைலாகத் தோன்றினாலும், குறைந்த வெளிச்சத்தில் பார்வைக் குறைபாட்டை ஏற்படுத்தலாம். சூரிய ஒளியிலிருந்து பாதுகாப்பு தேவைப்பட்டால், சன் வைசர்களைக் கொண்ட தலைக்கவசங்கள் சிறந்த விருப்பமாகும். வைசர்கள் உராய்வு-தடுப்பு (Andi-scratch) மற்றும் நீர் எதிர்ப்புத் திறன் கொண்டவையாக இருக்க வேண்டும். மேலும் அவை சிறந்த புற ஊதா (UV) பாதுகாப்பையும், பரந்த அளவிலான பார்வைக் கோணத்தையும் வழங்க வேண்டும்.

தலைக்கவசத்தை மாற்றுதல்: தலைக்கவசங்கள் நிரந்தரமானவை அல்ல. நல்ல நிலையில் இருப்பதாகத் தோன்றினாலும், ஒவ்வொரு 3 முதல் 5 வருடங்களுக்கும் ஒருமுறை மாற்றப்பட வேண்டும். ஏனெனில், ஹெல்மெட்டின் உட்புற பஞ்சு அல்லது லைனிங் காலப்போக்கில் தரம் குறைந்து, பாதுகாப்புத் திறனைக் குறைக்கிறது. அதேபோல், விபத்துக்குப் பிறகும் தலைக்கவசங்களை உடனடியாக மாற்ற வேண்டும். ஏனெனில் உட்புற பாதிப்புகள் கண்களுக்குத் தெரியாவிட்டாலும், பாதுகாப்பை கணிசமாகப் பாதிக்கலாம். தலைக்கவசங்களை அடிக்கடி கீழே தவற விடுவதைத் தவிர்க்க வேண்டும். ஏனெனில் இது ஹெல்மெட்டினுள் பாதுகாப்பு உறையை பலவீனப்படுத்தலாம்.

மலிவான தலைக்கவசங்களைத் தவிர்த்தல்: பணத்தை மிச்சப்படுத்துவது முக்கியம் என்றாலும், அதற்காக பாதுகாப்பில் ஒருபோதும் சமரசம் செய்யக்கூடாது. இந்தியாவில் நல்ல தலைக்கவசங்கள் பொதுவாக ரூ.2,500 முதல் ரூ.6,000 வரை இருக்கும்; அதேசமயம் ப்ரீமியம் ரகங்கள் ரூ.10,000 முதல் தொடங்குகின்றன. மிக மலிவான தலைக்கவசங்களில் உரிய பாதுகாப்புத் தரங்கள் இல்லாததால், விபத்தின்போது அவை தோல்வியடையக்கூடும். நம்பகமான தலைக்கவசத்தில் முதலீடு செய்வது உங்கள் பாதுகாப்பிற்கான முதலீடாகும்.

சௌகரியமும் வசதியும்: ஒரு தலைக்கவசம் தினசரி பயன்பாட்டிற்கு போதுமான வசதியாக இருக்க வேண்டும். வசதியான தலைக்கவசம் நிலையான அன்றாட பயன்பாட்டை ஊக்குவித்து, பயன்படுத்துபவர்களின் பாதுகாப்பை மேம்படுத்துகிறது. காற்றோட்டத்திற்கான சரியான வென்டிலேஷன் (Ventilation), கழற்றி துவைக்கக்கூடிய உள் பேடிங், பனி படர்வை தடுக்கும் வைசர் ஆப்ஷன்கள் மற்றும் எளிதான பராமரிப்பு போன்ற அம்சங்களை எப்போதும் வாங்கும் ஹெல்மெட்டில் கவனியுங்கள்.

சரியான ஃபிட் (சரியான அளவு)-இன் முக்கியத்துவம்: தலைக்கவசம் வாங்குவதற்கு முன் எப்போதும் அதை அணிந்து பார்க்க வேண்டும். அது அசௌகரியத்தை ஏற்படுத்தாமல் கச்சிதமாகப் பொருந்த வேண்டும். நெடுஞ்சாலை வேகத்தில், காற்று அழுத்தத்தால், நல்ல பொருத்தமான தலைக்கவசம் நிலைத்தன்மையையும் தெளிவான பார்வையையும் உறுதி செய்கிறது.

அணியும் போது அதிக இறுக்கம் அல்லது தளர்வு இருக்கக்கூடாது. சில நிமிடங்கள் அணிந்த பிறகு அழுத்த அச்சுகள் முகத்தில் ஏற்படக்கூடாது. தலையை அசைக்கும்போது குறைந்தபட்ச அசைவே இருக்க வேண்டும். வலுவான, பாதுகாப்பான சின்ஸ்ட்ராப் (chin strap) எளிதில் அணியக் கூடியதாகவும் கழற்றக் கூடியதாகவும் இருக்க வேண்டும்.

டிரைவ்ஸ்பார்க் கருத்து: தலைக்கவசம் என்பது வெறும் துணைக்கருவி மட்டுமல்ல, அது ஒரு முக்கியமான பாதுகாப்பிற்கான முதலீடு. சான்றிதழ் பெற்ற, கச்சிதமாகப் பொருந்தக்கூடிய மற்றும் உயர்தர தலைக்கவசத்தைத் தேர்ந்தெடுப்பது ஆபத்தைக் கணிசமாகக் குறைத்து, உயிர்களைக் காக்கும். ஸ்டைலுக்காகவோ அல்லது விலைக்காகவோ பாதுகாப்பில் ஒருபோதும் சமரசம் செய்யாதீர்கள். உங்கள் தலைக்கவசங்களை எப்போதும் புத்திசாலித்தனமாகவும் பொறுப்புடனும் தேர்ந்தெடுங்கள்.