இவங்களா காரை ஓட்டிட்டு வந்தது? நடிகரை அவரது அலுவலகத்திற்கு சென்று மீட் பண்ணியாச்சு!

பாலிவுட் நடிகர் (Bollywood Actor) மற்றும் தயாரிப்பாளர் ஜான் ஆபிரகாம் (John Abraham) ஒரு தீவிர ஆட்டோமொபைல் ஆர்வலர் ஆவார். குறிப்பாக, மோட்டார்சைக்கிள்கள் என்றால் இவருக்கு கொள்ளை பிரியம். பல உயர்ரக மோட்டார் சைக்கிள்கள் மற்றும் சூப்பர் பைக்குகளை வைத்துள்ளார். அதேபோல், எஸ்யூவி கார்கள் மீதும் இவர் மிகுந்த ஆர்வம் கொண்டவர்.

இந்த நிலையில் சமீபத்தில், சர்வதேச ஆண்கள் தினத்தை (நவம்பர் 19) முன்னிட்டு, ஏழு பெண்கள் தங்கள் மஹிந்திரா தார் (Mahindra Thar) எஸ்யூவி வாகனங்களை ஓட்டி, மும்பையில் உள்ள ஜான் ஆபிரகாமின் அலுவலகத்திற்கு நேரில் வந்து அவருக்கு இன்ப அதிர்ச்சி அளித்துள்ளனர். மேலும், மஹிந்திரா தார் மீதான தங்கள் ஆர்வத்தையும் அவர்கள் பகிர்ந்து கொண்டனர்.

இந்தச் சம்பவத்தின் காணொளி பின்னர் மஹிந்திரா தாரின் அதிகாரப்பூர்வ இன்ஸ்டாகிராம் பக்கத்தில் பகிரப்பட்டுள்ளது. காணொளியின் தொடக்கத்தில், தார் வாகனங்களின் பெண் உரிமையாளர்கள் ஜான் ஆபிரகாமின் தார் உள்பட அவரது கார்கள் மற்றும் எஸ்யூவிகள் மீதான ஆர்வத்தைப் பற்றி பேசியுள்ளனர். நடிகர் ஜான் ஆபிரகாம் நீண்ட காலமாக மஹிந்திராவுடன் தொடர்புடையவர் என்பது குறிப்பிடத்தக்கது.

தனக்கென பிரத்யேகமாக உருவாக்கப்பட்ட மஹிந்திரா தார் ராக்ஸ் (ROXX) ஒன்றை இந்த நடிகர் வைத்துள்ளார். 'தார்' பிராண்ட் மற்றும் அதன் தன்மை மீதான தனது ஆர்வத்தை அவர் வெளிப்படையாகப் பலமுறை தெரிவித்துள்ளார். இதில் ஈர்க்கப்பட்ட பெண்கள் தான் தற்போது ஆண்கள் தினத்தில் ஜான் ஆபிரகாமை நேரில் சந்தித்துள்ளனர்.

இந்தப் பெண்கள் தங்கள் தார் வாகனங்களில் மும்பையில் உள்ள அவரது அலுவலகத்திற்கு வந்து, வரவேற்பறையில் அவருக்காகக் காத்திருந்துள்ளனர். நடிகர் வந்ததும், அங்கு கூடியிருந்தவர்கள் மத்தியில் உற்சாகம் பொங்கியுள்ளது. அவர்கள் அவரை அன்புடன் வரவேற்று, 'இனிய ஆண்கள் தின வாழ்த்துக்கள்' எனத் தெரிவிக்கின்றனர். பின்னர், அவர் அறையின் ஒரு மூலையில் அமர்ந்து, பெண்கள் உடன் உரையாடினார்.

ஜான் முதலில் பெண்களின் தார் கார்களின் நிறங்கள் குறித்துக் கேட்டறிந்து, கருப்பு நிறம் தனது விருப்பமான நிறம் என்றார். "நான் ஒரு கருப்பு தார் வாகனத்தை விரும்பும் ஆள்" என்று அவர் கூறினார். ஆச்சரியப்படும் விதமாக, அங்கிருந்த பெரும்பாலான பெண்களும் கருப்பு நிறத்தில் தார் வாகனத்தை வைத்திருப்பதாகத் தெரிவித்தனர்.

அதுமட்டுமின்றி, 'தார்' என்ற பெயரையும் விரும்புவதாகக் கூறிய நடிகர் ஜான் ஆபிரகாம், பின்னர் எஸ்யூவி மீதான தனது ஆர்வத்தைப் பற்றி விரிவாகப் பேசினார். "அதற்கு ஒரு தனித்துவம் இல்லை. அது உங்களோடு வாழும் மற்றொரு உயிர் போன்றது" என்று அவர் குறிப்பிட்டார். இவை ஒரு உண்மையான கார் ஆர்வலரின் வார்த்தைகள் என்றுதான் சொல்ல வேண்டும்.

வந்திருந்தவர்களில் ஒருவர், கார்கள் மீதான இந்த ஆழ்ந்த ஆர்வம் எங்கிருந்து வந்தது என்று ஜானிடம் கேட்டார். அதற்கு பதிலளித்த ஜான், 7- 9 வயது முதல் கார்கள் மற்றும் மோட்டார்சைக்கிள்கள் மீது ஆர்வம் ஏற்பட்டதாகக் கூறினார். 11 வயதிலேயே தனது ஆர்வம் கம்பீரமான எஸ்யூவிகள் மற்றும் ஆஃப்-ரோடர் வாகனங்கள் மீது அதிகமாகி விட்டதாக அவர் தெரிவித்தார்.

இதற்கு, மஹிந்திரா சி.ஜே 340 (CJ340) என்கிற ஆஃப்-ரோடு எஸ்யூவிகள் முக்கிய காரணம் என்றும் அவர் குறிப்பிட்டார். சிஜே340 ஆனது அசல் ஜீப் சி.ஜே வாகனங்களில் இருந்து மஹிந்திராவால் உரிமம் பெற்று தயாரிக்கப்பட்ட ஒரு பதிப்பாகும். இது 80களின் பிற்பகுதி முதல் 90களின் நடுப்பகுதி வரை விற்பனைக்கு கிடைத்தது.

டிரைவ்ஸ்பார்க் கருத்து: சர்வதேச ஆண்கள் தினத்தில் ஒரு ஆண் நபரை 7 பெண்கள், அதுவும் மஹிந்திரா தார் போன்ற ஆஃப்-ரோடு எஸ்யூவி வாகனத்தை ஓட்டும் பெண்கள் நேரில் சந்தித்து வாழ்த்து தெரிவித்து இருப்பது வித்தியாசமாகவும், புதுமையாகவும் உள்ளது. நடிகரைக் கண்டதில் பெண்கள் மகிழ்ச்சியடைந்தாலும், அவரில் உள்ள 'தார் ஆர்வலர்' உடன் உரையாடுவதில் இன்னும் அதிக உற்சாகம் காட்டினர். அந்த தருணத்தில், தார் எஸ்யூவி தான் அவர்களுக்கிடையே மிகப்பெரிய பொதுவான ஆர்வமாகத் இருந்தது.