அடேங்கப்பா... 50,000 ரூபா ஸ்கூட்டருக்கு 8 லட்சத்தில் பேன்ஸி நம்பர்!!

தொழிலதிபர்

சண்டிகர் நகரை சேர்ந்த கன்வால்ஜித் வாலியா என்பவர் கேட்டரிங் தொழில் செய்து வருகிறார். அதில், நல்ல வருமானம் கிடைப்பதால் அவருக்கு பணம் ஒரு பொருட்டல்ல என்ற நிலைதான். அதனால், அவர் செய்த காரியம்தான் இப்போது பரபரப்புக்கு காரணம்.

புது ஸ்கூட்டர்

சமீபத்தில் கன்வால்ஜித் வாலியா புதிய ஹோண்டா ஆக்டிவா 125சிசி ஸ்கூட்டரை வாங்கினார். அதற்கு பேன்ஸி நம்பரை வாங்க முடிவு செய்தார். அதன்படி, கடந்த சனிக்கிழமை அன்று சண்டிகர் ஆர்டிஓ., அலுவலகத்தில் நடந்த ஏலத்தில் கலந்து கொண்டார். ஆனால், அவர் விரும்பிய பேன்ஸி நம்பருக்கு கடும் நிலவியது.

விடாப்பிடி

கடும் போட்டி நிலவியதை கண்டு அசராத, எவ்வளவு தொகையானாலும் கொடுத்து ஏலம் எடுக்க முடிவு செய்தார். அதன்படி, ரூ.8.10 லட்சத்தை கொடுத்து அவர் விரும்பிய அந்த பேன்ஸி நம்பரை கைப்பற்றினார். அதாவது, அவரது ஸ்கூட்டரின் விலையைவிட 16 மடங்கு கூடுதல் தொகையை கொடுத்து அந்த நம்பரை வாங்கினார்.

பேன்ஸி நம்பர்

கடும் போட்டிக்கு மத்தியில் அவர் வாங்கியிருக்கும் பேன்ஸி நம்பர் CH01BC 0001 என்பதாகும். இதுதவிர, தனது மகனின் புதிய க்ரூஸர் வகை மோட்டார்சைக்கிளுக்கு CH01BC 0011 என்ற பேன்ஸி நம்பரையும், அவர் புதிதாக வாங்கியிருக்கும் எஸ்யூவி வகை காருக்கு CH01BC 0026 என்ற பேன்ஸி நம்பரையும் ரூ.2.6 லட்சம் கொடுத்து அன்றைய தினத்தில் வாங்கியுள்ளார்.

தந்தை வழியில்...

சண்டிகர் டாக்ஸி தொழிற்சங்கத்தை துவங்கிய, தனது தந்தை இதேபோன்று கார்களுக்கு பேன்ஸி நம்பரை வாங்குவதை பழக்கமாக கொண்டிருந்ததாகவும், அதே வழியில் தானும் இந்த பேன்ஸி நம்பர்களை வாங்குவதில் ஆர்வம் காட்டியதாகவும் கூறியுள்ளார் கன்வால்ஜித்.

ஏலத்தொகை

கடந்த சனிக்கிழமை சண்டிகர் ஆர்டிஓ., அலுவலகத்தில் நடந்த பேன்ஸி நம்பர் ஏலத்தின் மூலம் அந்த ஆர்டிஓ., அலுவலகத்துக்கு ரூ.77.71 லட்சம் வருவாய் கிட்டியதாக தெரிவிக்கப்பட்டுள்ளது.