பேரனுக்காக 3 குட்டி லம்போர்கினி கார்களை உருவாக்கிய சீன விவசாயி!!

மத்திய சீனாவின் ஹெனான் மாகாணத்தில் உள்ள ஸெங்ஸோ என்ற பகுதியை சேர்ந்தவர் குவோ லியான்கியான். இவர்தான் தனது பேரனுக்காக மூன்று லம்போர்கினி கார்களை சொந்தமாக உருவாக்கி கொடுத்துள்ளார்.

தற்போது 55வயதாகும் லியான்கியான் மூன்று ஆண்டுகளுக்கு முன்னரே இந்த கார்களை உருவாக்கிவிட்டார். ஆனால், தற்போதுதான் அவரது பேரன் சற்று பெரியவனாக வளர்ந்து அந்த காரை ஓட்டக் கற்றுக் கொண்டிருக்கிறான்.

அந்த கார்களில் விவசாயி தனது பேரனுடன் சாலைகளில் வலம் வந்ததுதான் இப்போது மீண்டும் செய்தியாகி உள்ளது. இதுகுறித்து சீன மீடியாக்களில் செய்திகள் வெளியிடப்பட்டுள்ளன.

இந்த கார்களை பொது பயன்பாட்டு சாலையில் செலுத்துவதற்கான அம்சங்களுயன் லியான்கியான் உருவாக்கி உள்ளார். முன்புறத்திற்கான விண்ட்ஷீல்டு கண்ணாடி, ஹாரன், பிரேக்குகள் என அனைத்து விஷயங்களும் உள்ளன.

இந்த கார்கள் பேட்டரியில் இயங்கும் மின்சார கார்களாக உருவாக்கப்பட்டுள்ளன. மணிக்கு 40 கிமீ வேகம் வரை செல்லும் என்று லியான்கியான் தெரிவித்துள்ளார்.

இந்த கார்களில் இருக்கும் பேட்டரியை ஒருமுறை முழுமையாக சார்ஜ் செய்தால் 60 கிமீ தூரம் வரை பயணிக்க முடியும். ஒருவர் அமர்ந்து செலுத்தக்கூடிய வகையில் வடிவமைத்துள்ளார்.

தான் உருவாக்கிய காரில் பேரன் ஓட்டத் துவங்கியிருப்பது அவருக்கு மட்டற்ற மகிழ்ச்சியையும், அந்த கார்களை உருவாக்கியதற்கான அர்த்தத்தையும் பெற்றுவிட்ட மகிழ்ச்சியில் உள்ளார் லியான்கியான்.