11 போயிங் விமானங்களை வாங்கிய பிரபல ஆன்லைன் வர்த்தக நிறுவனம்... விமான சேவைக்காக அல்ல... அப்போ வேறு எதுக்காக?

பிரபல ஆன்லைன் வர்த்தக நிறுவனம் ஒன்று 11 போயிங் 767-300 ரக ஜெட் விமானங்களை வாங்கியிருப்பதாக தகவல்கள் வெளியாகியிருக்கின்றன. ஏ டூ இசட் வரையிலான பொருட்களை விற்பனைச் செய்து வரும் இ-காமர்ஸ் நிறுவனமான அமேசான் நிறுவனம் இத்தனை விமானங்களை வாங்கியிருக்கின்றது.

இந்நிறுவனம் ஒரே அடியாக 11 விமானங்களை வாங்கியிருப்பது ஆச்சரியத்தை ஏற்படுத்தியிருக்கின்றது. விமான சேவையில் ஈடுபடுவதற்காக இத்தனை விமானங்களை அமேசான் வாங்கியிருக்கின்றதா என்ற சந்தேகத்தையும் கிளப்பியிருக்கின்றது. மிக சமீபத்தில் ஓலா கால் டாக்சி நிறுவனம் விரைவில் மின்சார இருசக்கர வாகன விற்பனையில் களமிறங்க இருப்பதாக அறிவித்திருந்தது.

ஓலா கால் டாக்சியின் இந்த செயல் எந்த நிறுவனம் வேண்டுமானாலும் எந்த தொழிலை வேண்டுமானாலும் புதிதாக தொடங்கலாம் என்ற மனநிலையை ஏற்படுத்தியிருக்கின்றது. இம்மாதிரியான சூழ்நிலையிலேயே பிரபல ஆன்லைன் வர்த்தக நிறுவனமான அமேசான் 11 விமானங்களை வாங்கியிருக்கின்றன.

இவையனைத்தையும் தனது வாடிக்கையாளர்களுக்கு துரித நேரத்தில் உரிய பொருட்களை டெலிவரிக் கொண்டு சேர்ப்பதற்காகவே வாங்கியிருக்கின்றது. டெல்டா மற்றும் வெஸ்ட்ஜெட் ஆகிய நிறுவனங்களிடம் இருந்தே விமானங்கள் வாங்கப்பட்டிருக்கின்றன.

இந்த விமானங்கள் விரைவில் அமேசானின் கார்கோ பயன்பாட்டில் களமிறங்க இருக்கின்றன. 2021 மற்றும் 2022 ஆம் ஆண்டுகளில் இது பயன்பாட்டிற்கு வந்துவிடும் என்பது தெரியவந்திருக்கின்றது. அமேசான் ஆன்லைன் வர்த்தக நிறுவனம், தற்போது குறிப்பிட்ட சில பொருட்களை மிக விரைவில் ஒரு நாளுக்கும் குறைவாக டெலிவரி செய்து வருகின்றது.

அதேசமயம், பிரைம் மெம்பர் அல்லாத சில வாடிக்கையாளர்களுக்கு மூன்று முதல் ஐந்து நாட்கள் வரைகூட டெலிவரிக்கான கால தாமதத்தை அது செய்து வருகின்றது. இந்த நிலையைக் குறைக்கும் நோக்கிலேயே புதிய விமானங்கள் கொள்முதல் செய்யப்பட்டிருக்கின்றன.

அவை ஒன்றன் பின் ஒன்றாக கார்கோ பயன்பாட்டில் களமிறக்கப்பட இருக்கின்றன. இந்த விமானங்கள் பயன்பாட்டிற்கு வருவதன் மூலம் தற்போது நீடிக்கும் கால தாமதம் பல மடங்கு குறையும். அனைத்து வாடிக்கையாளர்களாலும் விரைவில் ஆர்டர் செய்த பொருளை டெலிவரி பெற முடியும்.

வெஸ்ட்ஜெட் நிறுவனத்திடம் இருந்து நான்கு விமானங்களையும், டெல்டா நிறுவனத்திடம் இருந்து ஏழு விமானங்களையும் அமேசான் வாங்கியிருக்கின்றது. இதில், வெஸ்ட்ஜெட் நிறுவனத்திடம் இருந்து வாங்கப்பட்ட விமானங்கள் பயணிகள் விமானமாக பயன்படுத்தப்பட்டு வந்தவை ஆகும். இவற்றையே கார்கோ மாற்றி ஷிப்பிங் பணிக்காக பயன்படுத்த இருக்கின்றது.

Image Courtesy: Boeing, Delta and Westjet

இவை 2021ம் ஆண்டில் சேவையில் ஈடுபடுத்தப்பட இருக்கின்றன. இதேபோன்று, டெல்டா நிறுவனத்திடம் இருந்து வாங்கப்பட்டிருக்கும் கார்கோ விமானங்கள் 2022 ஆம் ஆண்டில் பயன்பாட்டிற்கு வர இருக்கின்றது. இந்த விமானங்களுடன் மேலும் சில விமானங்களையும் அமேசான் சேர்க்கலாம் என எதிர்பார்க்கப்படுகின்றது.