ஃபாஸ்ட் அண்ட் ஃப்யூரியஸ் திரைப்படங்களில் ரூ.3,400 கோடி கார், கட்டங்கள் நாசம்!

இந்த நிலையில், இதுவரை வெளிவந்துள்ள ஃபாஸ்ட் அண்ட் ஃப்யூரியஸ் திரைப்படங்களின் 7 பாகங்களிலும் படப்பிடிப்பின்போது சேதமடைந்த கார்கள் மற்றும் கட்டடங்களின் மதிப்பு குறித்து இங்கிலாந்தை சேர்ந்த Insurethegap என்ற இன்ஸ்யூரன்ஸ் நிறுவனம் தகவல் வெளியிட்டு இருக்கிறது. இந்த திரைப் படங்களுக்காக சேதமடைந்த கார்கள், கட்டங்கள் மதிப்பு கிறுகிறுக்க வைக்கிறது.

ஆம், இதுவரை வெளியான ஃபாஸ்ட் அண்ட் ஃப்யூரியஸ் திரைப்படங்களின் 7 பாகங்களிலும் நாசமான கார்கள் மற்றும் கட்டடங்களின் மதிப்பு ரூ.3,400 கோடி என்று தெரிவிக்கப்பட்டு இருக்கிறது.

இதுவரை வெளியான திரைப்படங்களின் படப்பிடிப்பின்போது, 142 சாதாரண வகை கார்கள் முற்றிலும் நாசமடைந்துவிட்டதாம். 169 கார்கள் பலத்த சேதமடைந்துள்ளனவாம். கார்கள் மட்டுமின்றி, சொகுசு பஸ், ஹெலிகாப்டர்கள் உள்ளிட்டவையும் இதில் அடக்கம்.

இதுதவிர, நாயகன் மற்றும் வில்லனாக நடித்தவர்கள் பயன்படுத்திய விசேஷ வகையிலான 32 கார்கள் முற்றிலும் சேதமடைந்துவிட்டனவாம். இதுதவிர, 31 கட்டடங்கள் படப்பிடிப்பின்போது முற்றிலும் சேதமடைந்துள்ளன. 53 கட்டடங்கள் பலத்த சேதமடைந்துள்ளன.

இந்த திரைப்படங்களில் கதாநாயகர்களால் 320 மில்லியன் டாலர்களுக்கு சேதமும், வில்லன்களால் 194 மில்லியன் டாலர்கள் சேதமும் ஏற்பட்டுள்ளதாம். வில்லன் கதாபாத்திரத்தில் நடித்த ஜேசன் ஸ்டேட்டம்தான் அதிக கார்களை நாசமாக்கியதாகவும் தெரிவிக்கப்பட்டு இருக்கிறது.

மேலும், கடைசியாக வெளிவந்த ஃபாஸ்ட் அண்ட் ஃப்யூரியஸ் -7 திரைப்படத்தில்தான் சேதமடைந்த கார்களின் மதிப்பு மிக அதிகமாம். இந்த திரைப்படத்தில் மட்டும் கிட்டத்தட்ட 300 மில்லியன் டாலர்கள் அளவுக்கு கார்கள் மற்றும் கட்டடங்கள் சேதமடைந்ததாக தெரிவிக்கப்பட்டு இருக்கிறது.

இந்த படத்தில் சேதமடைந்த லைக்கன் ஹைப்பர்ஸ்போர்ட் காரின் விலை மதிப்பு மட்டும் ரூ.22.06 கோடி என்பது குறிப்பிட்டு சொல்லப்பட்டு இருக்கிறது. இதேபோன்று, விசேஷமாக உருவாக்கப்பட்ட ஏராளமான கார்களும் இந்த திரைப்படத்தில் பலத்த பொருட்சேதத்தை உண்டாக்கியதாக தெரிவிக்கப்பட்டு இருக்கிறது.

ஃபாஸ்ட் அண்ட் ஃப்யூரியஸ் திரை வரிசையின் 8-ஆம் பாகம் The Fate of the Furious என்ற பெயரில் வரும் 14ந் தேதி ரிலீஸ் செய்யப்பட உள்ளது குறிப்பிடத்தக்கது.