டிரெயின் 19... படுக்கை வசதியுடன் உருவாகும் இந்தியாவின் அதிவேக ரயில்!

தற்போது டெல்லி- வாரணாசி இடையில் இயக்கப்படும் இந்த ரயில் வணிக ரீதியில் பாதுகாப்பு காரணங்களுக்காக குறிப்பிட்ட பகுதிகளில் மணிக்கு 160 கிமீ வேகம் வரை இயக்கப்படுகிறது. இரு நகரங்களுக்கும் இடையிலான 758 கிமீ தூரத்தை 8 மணிநேரத்தில் கடக்கிறது.

மேக் இன் இந்தியா திட்டத்தின் கீழ் வெறும் 18 மாதங்களில் இந்த ரயில் வடிவமைக்கப்பட்டு பயன்பாட்டுக்கு தயார் நிலைக்கு கொண்டு வரப்பட்டது. இந்த ரயில் ரூ.100 கோடி மதிப்பில் தயாரிக்கப்படுகிறது. இந்த ரயிலில் இரண்டு வகுப்பு கட்டணத்துடன் இருக்கைகள் கொண்டுள்ளது.

இந்த நிலையில், டிரெயின் 18 ரயிலின் அடிப்படையில் புதிய டிரெயின் 19 என்ற குறியீட்டுப் பெயரில் புதிய ரயில் தயாரிக்கப்பட இருக்கிறது. இது படுக்கை வசதி கொண்டதாக வடிவமைக்கப்பட இருக்கிறது. இதனை, ரயில்வே துறை அதிகாரி ஒருவர் உறுதிப்படுத்தி இருக்கிறார்.

படுக்கை வசதியுடன் கூடிய டிரெயின் 19 ரயில் ராஜ்தானி எக்ஸ்பிரஸ் ரயிலுக்கு மாற்றாக, பயன்பாட்டுக்கு கொண்டு வரப்பட இருக்கிறது. டிரெயின் 19 ரயிலிலும் ரயில் பெட்டியிலேயே கேபின் மற்றும் ரயில் பெட்டிகளிலேயே மின் மோட்டார்கள் பொருத்தப்பட்டு இருக்கும். அதாவது, தனி எஞ்சின் தேவைப்படாது.

இதனால், மிக விரைவான பிக்கப்பையும், பிற ரயில்களை விட துரிதமாகவும், குறைந்த தூரத்தில் நிறுத்துவதற்கான வாய்ப்பையும் இந்த ரயில் வழங்கும். இதனால், தனி எஞ்சின் பொருத்தப்பட்ட ரயில்களைவிட இந்த ரயிலின் பயண நேரம் 15 சதவீதம் வரை குறையும்.

தனி மின்சார எஞ்சின் பொருத்தப்பட்ட இந்த ரயில் மின் சேமிப்பிலும் சிறப்பானதாக இருக்கும். மேலும், நவீன தொழில்நுட்ப வசதிகளும், அதிக பாதுகாப்பு அம்சங்களையும் கொண்டிருக்கும். இந்த ரயிலில் சவுகரியமான படுக்கைகள், சிசிடிவி கேமரா, தானியங்கி கதவுகள் உள்ளிட்ட வசதிகளை பெற்றிருக்கும்.

ராஜ்தானி ரயில்களின் சவுகரியத்தை இந்த ரயில்கள் ஒருபடி மேலே கொண்டு செல்லும் அம்சங்களுடன் வடிவமைக்கப்பட இருக்கிறது. டிரெயின்- 18 ரயில் போன்றே, டிரெயின் 19 ரயில் மூலமாக பயண நேரம் வெகுவாக குறையும் வாய்ப்பு இருக்கிறது.