ரூ.10 கோடியில் குண்டு துளைக்காத கார் வாங்கி பயன்படுத்தும் முகேஷ் அம்பானி!!

பாதுகாப்புச் சான்று

2009 பிஆர்வி பாதுகாப்புச் சான்று பெற்ற மாடல் இது. வெளிப்புறத்திலும், உட்புறத்திலும் மிகவும் சிறப்பான பாதுகாப்பு அம்சங்களுடன் பிஎம்டபிள்யூ நிறுவனம் கட்டமைத்து கொடுக்கிறது.

கார் மாடல்

முகேஷ் அம்பானி வாங்கியிருக்கும் மாடல் பிஎம்டபிள்யூ 760ஐ ஹை செக்யூரிட்டி. இதே மாடலைத்தான் பிரதமர் நரேந்திர மோடியும் தனது அதிகாரப்பூர்வ கார் மாடலாக பயன்படுத்தி வருகிறார். இதுதவிர, சில பாலிவுட் நட்சத்திரங்கள் பாதுகாப்பு கருதி இந்த மாடலை பயன்படுத்தி வருகின்றனர்.

பாதுகாப்பு அம்சங்கள்

குண்டு வெடிப்பு மற்றும் துப்பாக்கிக் குண்டுகள் தாக்குதல்களில் சேதமடையாத சேஸி, அடிப்பாகம் மற்றும் கண்ணாடிகள் பொருத்தப்பட்டிருக்கிறது. இதன் பாடியும் அதேபோன்று குண்டு துளைக்காத விசேஷ ஸ்டீலில் கட்டமைக்கப்பட்டுள்ளது. தீப்பிடிக்காத பெட்ரோல் டேங்க், ரன் ஃப்ளாட் டயர்கள் ஆகியவையும் இந்த காரின் கூடுதல் சிறப்பம்சங்களாக இருக்கின்றது.

செயல்திறன்

பிஎம்டபிள்யூ 7 சீரிஸ் ஹை செக்யூரிட்டி எடிசன் காரின் எஞ்சின் அதிகபட்சமாக 439 எச்பி பவரை அளிக்கும் வல்லமை கொண்டது. 0- 100 கிமீ வேகத்தை 7.5 வினாடிகளில் எட்டிவிடும். 6 ஆட்டோமேட்டிக் டிரான்ஸ்மிஷன் பொருத்தப்பட்டிருக்கிறது.

ஓட்டுனர்களுக்கு பயிற்சி

காரை கட்டமைத்து கொடுப்பதும் மட்டுமின்றி, இந்த காரை ஓட்டுவதற்காக ஓட்டுனர்களுக்கு பிஎம்டபிள்யூ நிறுவனம் சிறப்பு பயிற்சியை வழங்குகிறது. அவசர சமயங்களில் காரை எவ்வாறு செலுத்தி, பயணிகளை பாதுகாப்பது குறித்த பிஎம்டபிள்யூவின் நிபுணர் குழு சிறப்பு பயிற்சியை அளிக்கும். தவிர்த்து, காரை பின்னோக்கி செலுத்துவது குறித்தும் சிறப்பு பயிற்சிகள் அந்த ஓட்டுனர்களுக்கு வழங்கப்படும். அவர்கள் மட்டுமே அந்த காரை திறமையாக செலுத்த முடியும்.

சிறப்பு வசதிகள்

வெடிகுண்டுகளை கண்டறியும் வெப்ப சென்சார்கள், செயற்கைகோள் தொடர்பு சாதனம் போன்ற பல வசதிகள் உள்ளன. ஏவுகணை மற்றும் ரசாயனத் தாக்குதலிலிருந்து கூட பாதுகாப்பு தரும்.

விலை

இந்தியாவில் பிஎம்டபிள்யூ 7 சீரிஸ் கார் ரூ.1.9 கோடி ஆன்ரோடு விலையில் விற்பனை செய்யப்படுகிறது. ஆனால், கூடுதல் பாதுகாப்பு வசதிகளுடன் மாறுதல்கள் செய்யப்பட்ட இந்த காருக்கு கூடுதலாக 300 சதவீதம் வரி விதிக்கப்படுகிறது. இதனால், இறக்குமதி வரி உள்பட ரூ.8.5 கோடி அடக்க விலையாகிறது. இதைவிட, இதன் பதிவு கட்டணமும் கோடியில்தான்...

பதிவுக் கட்டணம்

இந்த காருக்கு வட்டாரப் போக்குவரத்து அலுவலகத்தில் காரின் விலையில் 20 சதவீதம் பதிவுக் கட்டணமாக செலுத்தப்பட்டிருக்கிறது. ரூ.1.6 கோடியை பதிவு கட்டணமாக செலுத்தியுள்ளார் முகேஷ் அம்பானி. அதாவது, இதுவரை மும்பை ஆர்டிஓ அலுவலகத்தில், அதிக பதிவுக் கட்டணம் செலுத்தப்பட்ட கார் இதுதான் என்று தெரிவிக்கப்படுகிறது.