ரஃபேல் போர் விமானம் Vs சீனாவின் ஜே-20 போர் விமானம்: எது சிறந்தது?

தேசத்தின் பாதுகாப்பு

இந்த நிலையில், அதிநவீன போர் விமானமாக கருதப்படும் சீனாவின் செங்க்டு ஜே-20 போர் விமானத்துடன் ரஃபேல் போர் விமானங்களின் திறனை ஒப்பிட்டு பார்க்கும்போது நமது தேச பாதுகாப்பு நிச்சயம் அடுத்த கட்டத்திற்கு செல்லும் என்று எதிர்பார்க்கப்படுகிறது.

Image Courtesy: Alert5/Wiki Commons

வல்லுனர்கள் கருத்து

சீனா பயன்படுத்தும் விமானங்களில் மிக அதிநவீன போர் விமானமாக கருதப்படும் ஜே-20 போர் விமானத்தின் திறன் குறித்து, அதனுடன் ரஃபேல் போர் விமானத்தில் இருக்கும் கூடுதல் சிறப்பம்சங்களையும் இந்திய பாதுகாப்பு வல்லுனர்கள் பல முக்கியத் தகவல்களை பகிர்ந்து கொண்டுள்ளனர். அதன் விபரங்களை தொடர்ந்து காணலாம்.

Image Courtesy: Alert5/Wiki Commons

தலைமுறை அம்சங்கள்

போர் விமானங்கள் சிறப்பம்சங்கள், தொழில்நுட்பங்கள், வேகம், வடிவமைப்பு உள்ளிட்டவற்றின் அடிப்படையில் குறிப்பிட்ட தலைமுறையை சேர்ந்ததாக வரையறுக்கப்படுகின்றன. இதில், எதிரி நாட்டு ரேடாரில் சிக்காத வகையில் வடிவமைப்பு மற்றும் தொழில்நுட்ப அம்சங்களை பெற்றிருக்கும் விமானங்கள் ஸ்டீல்த் ரக போர் விமானங்களாக கூறப்படுகிறது.

வரையறை

அதாவது, எதிரி நாட்டு ரேடாரில் சிக்காத அம்சங்கள் இருந்தாலும், ஒரு சில விஷயங்களை வைத்து இந்த விமானத்தை எதிரி நாட்டு விமானங்கள் கண்டறியும் வாய்ப்பு உண்டு. ஆனால், ஐந்தாம் தலைமுறை போர் விமானங்களை எதிரி நாட்டு ரேடார்களால் கண்டுபிடிக்க முடியாது.

ரஃபேல் எந்த தலைமுறை மாடல்?

அந்த வகையில், ரஃபேல் போர் விமானம் 4.5 தலைமுறை மாடலாகவும், சீனாவின் ஜே-20 போர் விமானம் ஐந்தாம் தலைமுறை மாடலாகவும் தெரிவிக்கப்படுகின்றன. ஆனால், வழக்கம்போல் எதிரி நாடுகளை அச்சத்தில் வைக்க ஜே-20 போர் விமானத்தை ஐந்தாம் தலைமுறை விமான மாடலாக சீனா கூறுவதாக பாதுகாப்பு வட்டாரங்களில் ஒரு தகவல் உலவுகிறது.

உண்மை என்ன?

தனது செங்க்டு ஜே-20 போர் விமானத்தை ஐந்தாம் தலைமுறைக்கு இணையான ஸ்டீல்த் ரக போர் விமானமாகவும் சீனா தெரிவித்தாலும், அது சந்தேகத்திற்கு இடமானது என்று இந்திய பாதுகாப்புத் துறை வல்லுனர்கள் கருத்து தெரிவிக்கின்றனர். அது ஸ்டீல்த் ரக போர் விமானம் என்பதே ஒரு மிகைப்படுத்தப்பட்ட விஷயம் என்றும் தெரிவிக்கின்றனர்.

Image Courtesy: Baiweiflight/Wiki Commons

எஞ்சின்

ரஃபேல் மற்றும் ஜே20 ஆகிய இரண்டு போர் விமானங்களுமே இரட்டை எஞ்சின் கொண்டதாக உருவாக்கப்பட்டுள்ளன. எனினும், ஜே-20 விமானம் ஐந்தாம் தலைமுறையாக தெரிவிக்கப்பட்டாலும், அதில் பயன்படுத்தப்படும் எஞ்சின்கள் 3.5 தலைமுறைக்கு இணையான சிறப்பம்சங்களை மட்டுமே கொண்டதாக கூறப்படுகிறது.

Image Courtesy: Bzuk/Wiki Commons

ஜே-20யில் ரஷ்ய எஞ்சின்

ரஷ்யாவின் எஸ்யூ35 விமானத்தின் எஞ்சின்தான் சீனாவின் ஜே-20 விமானத்தில் பயன்படுத்தப்படுகிறது. அந்த எஞ்சினைவிட ரஃபேல் போர் விமானங்களில் பயன்படுத்தப்படும் இரட்டை எஞ்சின் பல விதத்திலும் செம்மை வாய்ந்ததாகவும் ரஃபேல் போர் விமானங்களை பரிசோதித்த ஓய்வுபெற்ற இந்திய விமானப் படை அதிகாரி ஏர் மார்ஷல் நம்பியார் தெரிவித்துள்ளார்.

Image Courtesy: emperornie/Wiki Commons

பன்முனை செயல்திறன்

ஒரே நேரத்தில் கண்காணிப்பு, தாக்குதல், தற்காப்பு, எதிரி விமானங்களை இடைமறித்தல் என நான்கு விதமான பணிகளை ரஃபேல் போர் விமானங்களால் செய்ய முடியும். இதனால், ஆம்னி ரோல் போர் விமானம் என்று ரஃபேல் குறிப்பிடப்படுகிறது. ஆனால், ஜே-20 விமானத்தால் இதுபோன்று பன்முனை செயல்பாடுகளை ஒரே நேரத்தில் செய்ய இயலாது என்றும் அவர் கூறுகிறார்.

ஏவுகணைகள்

ஜே-20 விமானத்தில் இருக்கும் ஏவுகணையை வைத்து 200 கிமீ தூரத்தில் உள்ள இலக்குகளை தாக்க முடியும். ரஃபேலில் தரை இலக்கை தாக்கும் ஏவுகணை 150 கிமீ தூரம் வரையிலும், வான் இலக்குகளை தாக்குதவதற்கான ஏவுகணை 200 கிமீ தூரம் வரையிலும் பாய்ந்து செல்லும் திறன் கொண்டவை.

ரஃபேல் இதுல பெஸ்ட்

அதேநேரத்தில், எரிபொருள், ஆயுதங்களை சுமந்து கொண்டு எளிதாக பறக்கும் திறனில் ரஃபேலுடன் ஜே-20 விமானத்தை ஒப்பிட இயலாது. அது அந்தளவுக்கு திறன் கொண்டதாக இருக்காது. ரஃபேல் போர் விமானம் தனது எடையைவிட 1.5 மடங்கு அதிக எடையை சுமந்து கொண்டு பறக்கும். அதுவும் க்ரூஸ் செய்து செல்வதிலும் சிறப்பான திறனை வெளிப்படுத்தும் என்று தெரிவிக்கின்றனர்.

அதிகபட்ச வேகம்

ரஃபேல் போர் விாமனம் மேக் 1.8 என்ற வேகத்தில் பறக்கும் திறன் வாய்ந்தது. சீனாவின் ஜே-20 போர் விமானம் மேக் 2.0 வேகத்தில் பறக்கும். அதேபோன்று, விமானத்தின் மேல் எழும்பும் திறனும் முக்கியமானது. அதேநேரத்தில், ரஃபேர் போர் விமானத்தில் முழுமையாக எரிபொருள் நிரப்பும்போது 3,700 கிமீ தூரம் வரை பறக்கும்.

வெற்றிக்கு இதுதான் முக்கியம்

ரஃபேல் மற்றும் ஜே-20 ஆகிய விமானங்களில் இருக்கும் ரேடார்கள் கிட்டத்தட்ட இணையான திறன் பெற்றவையாக தெரிவிக்கப்படுகிறது. விமானியின் சாதுர்யம், எதிரிகளை வீழ்த்துவதற்கு அல்லது தாக்குவதற்கு விமானப் படையின் திட்டமிடல் ஆகியவை முக்கிய பங்கு வகிக்கும்.

Image Source:emperornie/Wiki Commons

News Source: ANI