தண்டவாளங்கள் இல்லாமல் வெள்ளை கோடுகளை பின்பற்றி இயங்கும் சீனாவின் ’ஸ்மார்ட் ரயில்’!

வாகனங்கள் பயணிக்கும் சாலைகள் வழியாகவே வரையப்பட்ட வெள்ளை கோடுகளை பின்பற்றி இயங்கும்உலகின் முதல் ஸ்மார்ட் ரயில் சீனாவில் பயன்பாட்டிற்கு வரவுள்ளது.

சீனாவின் ஜூஜோ நகரில் பொதுமக்கள் முன்பு சோதனை செய்யப்பட்ட போது, ஸ்மார்ட் ரயிலிற்கு மிகப்பெரிய கரகோஷம் அவர்கள் மத்தியில் எழுந்தது.

300 பேர் வரை பயணிக்கும் அளவுக்கொண்ட இந்த ஸ்மார்ட் ரயில், பயணிகளின் எண்ணிக்கைக்கு ஏற்றவாறு மணிக்கு 70கி.மீ அல்லது 43 கி.மீ வேகத்தில் இயங்கும்.

ஸ்மார்ட் ரயில் என்று குறிப்பிட்டாலும், இந்த தொழில்நுட்பத்தை சீனா ’வேகமான தானியங்கி ரயில் சேவை’ என்று தெரிவிக்கிறது.

உலகின் பெரிய ரயில் தயாரிப்பு நிறுவனமான சீனாவின் சிஆர்ஆர்சி கார்ப்பரேஷன் இந்த ஸ்மார்ட் ரயில் கட்டமைப்பை உருவாக்கியுள்ளது.

பெரிய நீளமான பேருந்து மற்றும் பழைய டிராம் போக்குவரத்து ஊர்திகளுக்கு இடையிலான அளவுடன், இந்த ஸ்மார்ட் ரயில் தயாராகியுள்ளது.

12.3 அடி நீளம் கொண்ட இந்த ஸ்மார்ட் ரயில், சாலையில் வரையப்பட்டவரிசையான வெள்ளை நிற கோடுகளை பின்பற்றி இயங்கும். அந்த வெள்ளை கோடுகள் ஸ்மார்ட் ரயிலிற்கான மெய்நிகர் (வெர்ச்சுவல்) தண்டவாளங்களாக இயங்கும்.

இதுப்பற்றி பேசிய ஸ்மார்ட் ரயில் கட்டுமானங்களுக்கான தலைமை பொறியாளர் ஃபெங் ஜியானிங்குவா, சாதரண ரயில் டிராம்களுக்கான தண்டவாளங்களை விட இந்த மெய்நிகர் தொழில்நுட்பம் மிகவும் செலவு குறைவு என்று கூறுகிறார்.

சீனாவை பொறுத்தவரை டிராம்களுக்காக ஒரு கி.மீ நீளத்தில் தண்டவாளங்கள் அமைக்க சுமார் 23 மில்லியன் அமெரிக்க டாலர்கள் செலவாகின்றன.

ஆனால் வெறும் 11.4 மில்லியன் அமெரிக்க டாலர்கள் கொண்டு சீனாவின் ஜூஜோ நகரில் ஸ்மார்ட் ரயிலிற்கான மெய்நிகர் கோடுகள் உருவாக்கப்பட்டுள்ளன.

பயணங்களுக்கான தகவல்களை சென்சார்கள் கொண்டு திரட்டி, செல்லக்கூடிய வழிகளை தானாகவே அறிந்து செயல்படுமாம் இந்த ஸ்மார்ட் ரயில்கள்.

ஜூஜோ நகரில் நடைபெற்று வரும் முதற்கட்ட சோதனையின் மூலம் சீன அரசு மகிழ்ச்சி அடையும் முடிவுகள் கிடைத்திருக்கின்றன.

இருந்தாலும் அவசர மற்றும் ஆபத்து காலங்களில் ஸ்மார்ட் ரயில்கள் இயங்கும் திறனை பற்றி ஆய்வாளர்கள் ஆராய்ந்து வருகின்றனர்.

அனைத்து விதமான சோதனைகள் முடிக்கப்பெற்று, ஸ்மார்ட் ரயில்கள் சீனாவில் அடுத்தாண்டு வசந்த காலம் முதல் மக்கள் பயன்பாட்டிற்காக இயங்கவுள்ளன.

ஸ்மார்ட் ரயில் திட்டத்தில் கிடைக்கும் முடிவுகளை வைத்து, எதிர்காலத்தில் புல்லட் உட்பட அனைத்து ரக ரயில் போக்குவரத்துகளையும் ஆளில்லாமல் இயக்க சீனா அரசு திட்டமிட்டு வருகிறது.