ஹீரோ ஹோண்டாவின் புதிய கிளாமர்- சிறப்பு பார்வை

சிபிசி எக்ஸ்ட்ரீம், ஹங்க் பைக்குகளை தொடர்ந்து கிளாமரை கூட்டும் விதத்தில் கிளாமர் பைக்கின் வடிவமைப்பில் சிற்சில மாற்றங்களை செய்து சந்தையில் இறக்கியுள்ளது ஹீரோ ஹோண்டா.

125 செக்மென்டில் தனி மதிப்பும், மரியாதையையும் ஹீரோ ஹோண்டாவுக்கு கிளாமர் ஏற்படுத்தி கொடுத்துள்ளது. இதை மனதில் கொண்டு, மிகமிக கவனமாக கிளாமரின் வடிவமைப்பில் மாற்றம் செய்துள்ளது ஹீரோ ஹோண்டா.

புதிய கிளாமரில் டிஜிட்டல் டிஸ்பிளே கொண்ட ப்யூல் கேஜ் பொருத்தப்பட்டுள்ளதால் அடுத்த தலைமுறையில் கிளாமர் நுழைந்துவிட்டதை எளிதாக உணர முடிகிறது. பெட்ரோல் டேங்க் சைஸ் சற்று பெரிதாக்கி வடிவமைப்பிலும் மாற்றம் செய்யப்பட்டுள்ளது.

முகப்பு விளக்கு அமைந்துள்ள ஸ்கூப்பின் வடிவமைப்பும் மாறியுள்ளது. முகப்பு விளக்கின் மேல் புதிய வைசர் கண்ணாடி பொருத்தப்பட்டுள்ளது. சைலென்சர் ஹீட் ஷீல்டு வடிவமைப்பிலும் கைவைத்துள்ளது ஹீரோ ஹோண்டா. இவை முன்பைவிட கிளாமரின் அழகை மேம்படுத்துகிறது.

ஸ்டிக்கர் டிசைன்களும் மாற்றம் கண்டுள்ளது. தற்போது 5 விதமான கலர்களில் கிளாமரை களமிறக்கியுள்ளது ஹீரோ ஹோண்டா. எஞ்சினில் மட்டும் கைவைக்காமல் வெளிப்புற வடிவமைப்பில் மட்டும் மாற்றங்களை செய்து தனது புத்திசாலித்தனத்தை வெளிப்படுத்தியுள்ளது ஹீரோ ஹோண்டா.

கையாளுமையிலும் புதிய கிளாமர் சிறப்பாக இருக்கிறது. நகர்ப்புறங்கள், கிராமப்புறங்கள் என அனைத்து சாலை நிலைகளிலும் ஓட்டும்போது கிளாமர் கையாளுமையில் பாஸ் மார்க் பெற்றுவிடுகிறது.

மைலேஜிலும் ஹீரோ ஹோண்டாவின் பெயரை கிளாமர் காப்பாற்றுகிறது. லிட்டருக்கு 50 கி.மீ. குறையாமல் மைலேஜ் தருகிறது.

வாடிக்கையாளர்கள் பார்த்தவுடன் கேட்கும் அளவுக்கு வடிவமைப்பில் சூட்சுமங்கள் செய்துள்ள ஹீரோ ஹோண்டா, விலையிலும் திருப்தியை தரும் அளவுக்கு நிர்ணயித்துள்ளது. டிஸ்க் பிரேக் கொண்ட கிளாமர் ரூ.61,255(தோராய விலை) என்ற விலையில் விற்பனை செய்யப்படுகிறது.