சொந்தமாக ஹீரோ உருவாக்கிய புதிய 100சிசி,1100சிசி, 250சிசி எஞ்சின்கள்!

ஹோண்டா தொழில்நுட்பம்

2017ம் ஆண்டு வரை ஹோண்டாவின் தயாரிப்புகளை பயன்படுத்திக் கொள்வதற்கான உரிமத்தை ஹீரோ மோட்டோகார்ப் பெற்றுள்ளது. இருப்பினும், சொந்த தயாரிப்புகளுக்கு அந்த நிறுவனம் அதிக முக்கியத்துவம் கொடுத்து வருகிறது.

புதிய எஞ்சின்கள்

சொந்தமாக உருவாக்கிய புதிய 100சிசி, 110சிசி மற்றும் 250சிசி எஞ்சின்களை அந்த நிறுவனம் உருவாக்கியுள்ளது. அடுத்த ஆண்டு இந்த புதிய எஞ்சின்களை ஹீரோ அறிமுகம் செய்ய திட்டமிட்டுள்ளது. இந்த புதிய எஞ்சின்கள் வெற்றிகரமாக சோதனை செய்யப்பட்டுள்ளதை ஹீரோவின் மார்க்கெட்டிங் பிரிவு மூத்த துணைத் தலைவர் அனில் துவா உறுதிப்படுத்தியுள்ளார்.

சொந்த பைக்

அடுத்த ஆண்டு தனது சொந்த தயாரிப்பில் உருவான புதிய பைக்கையும் ஹீரோ அறிமுகம் செய்ய உள்ளது. இந்த புதிய பைக் மற்றும் எஞ்சின்கள் பொருத்தப்பட் பைக்குகள் 2016ம் ஆண்டு முதல் விற்பனைக்கு வர உள்ளதாக தகவல்கள் தெரிவிக்கின்றன.

புதிய இம்பல்ஸ்

ஆஃப்ரோடு மற்றும் சாதாரண சாலை என இரண்டிற்கும் ஏற்ற ஹீரோ இம்பல்ஸ் விற்பனையில் முக்கிய இடத்தை பெறவில்லை. இந்த நிலையில், அதிக திறன் கொண்ட எஞ்சினுடன் புதிய இம்பல்ஸ் பைக்கை அறிமுகம் செய்ய இருப்பதாக ஹீரோ நிர்வாக இயக்குனர் பவன் முஞ்சால் பேட்டி ஒன்றில் தெரிவித்துள்ளார்.

டிசைன் மாற்றம்

எரிக் புயெல் நிறுவனத்தின் ஒத்துழைப்புடன் இம்பல்ஸ் டிசைனிலும் மாற்றங்கள் செய்யப்பட்டு வருவதாக பவன் முஞ்சால் குறிப்பிட்டுள்ளார். பிப்ரவரியில் நடைபெற உள்ள டெல்லி ஆட்டோ எக்ஸ்போவில் இந்த புதிய பைக் அறிமுகம் செய்யப்பட உள்ளது.

விற்பனை

அதிக திறன் கொண்ட எஞ்சின் பொருத்தப்பட்ட புதிய இம்பல்ஸ் பைக் இந்தியா தவிர, லத்தீன் அமெரிக்க நாடுகளிலும் விற்பனைக்கு விட ஹீரோ முடிவு செய்துள்ளது. ஏனெனில், அந்நாட்டு வாடிக்கையாளர்கள் மத்தியில் செமி ஆஃப்ரோடு பைக்குகளுக்கு அதிக வரவேற்பு இருக்கிறது. அதிக திறன் கொண்ட புதிய இம்பல்ஸ் தற்போது விற்பனை செய்யப்பட்டும் 150சிசி திறன் கொண்ட எஞ்சின் மாடலிலும் தொடர்ந்து விற்பனை செய்யப்படும் என்று தெரிவிக்கப்பட்டுள்ளது.