பிஎஸ்-3 இருசக்கர வாகனங்கள் விற்று தீர்ந்தன... வாடிக்கையாளர்கள் ஏமாற்றம்!

ரூ.5,000 முதல் ரூ.25,000 வரை தள்ளுபடி பெறும் வாய்ப்பு ஏற்பட்டது. இதனையடுத்து, நேற்று மாலையில் இருந்து பிஎஸ்-3 எஞ்சின் பொருத்தப்பட்ட இருசக்கர வாகனங்களை வாங்குவதில் வாடிக்கையாளர்கள் ஆர்வம் காட்டினர்.

இருசக்கர வாகன ஷோரூம்களில் கூட்டம் அலை மோதியது. இதனால், சென்னையில் உள்ள பல இருசக்கர வாகன ஷோரூம்கள் இரவு வரை திறந்திருந்தது.

தள்ளுபடி செய்தி காட்டுத் தீயாக பரவியதால், இன்று காலையிலேயே ஷோரூம் திறப்பதற்கு முன்னரே, வாடிக்கையாளர்கள் குவியத் துவங்கினர். முன்பதிவு செய்வதிலும் போட்டா போட்டி நிலவியது.

இந்தநிலையில், இன்று மதிய நிலவரப்படி, சென்னையில் உள்ள பெரும்பாலான இருசக்கர வாகன டீலர்களில் பிஎஸ்-3 எஞ்சின் பொருத்தப்பட்ட இருசக்கர வாகனங்கள் அனைத்தும் விற்று தீர்ந்துவிட்டன.

இந்த தகவலை தாமதமாக கேள்விப்பட்டு, பல வாடிக்கையாளர்கள் ஒவ்வொரு டீலராக ஏறி இறங்கி வருகின்றனர். இருப்பினும், ஸ்டாக் இல்லை என்ற பதிலை கேட்டு அவர்கள் ஏமாற்றம் அடைந்தனர்.

ஹீரோ, ஹோண்டா, பஜாஜ் போன்ற முன்னணி இருசக்கர வாகன ஷோரூம்களில் ஸ்டாக் இல்லை என்று தெரிவிக்கப்பட்டாலும், மஹிந்திரா நிறுவன உள்ளிட்ட நிறுவனங்கள் தொடர்ந்து இருப்பில் உள்ள பிஎஸ்-3 பைக்குகளுக்கு தள்ளுபடியை அதிகரித்து அறிவிப்பு வெளியிட்டுள்ளன.

டீலர்களில் மோஜோ பைக்குகள் தேங்கி இருப்பதாக தெரிகிறது. இதையடுத்து, ரூ.30,000 வரை தள்ளுபடி வழங்குவதாக இன்று பிற்பகலில் அறிவிப்பு வெளியிட்டு இருக்கிறது. இதேபோன்று, சில இருசக்கர வாகன ஷோரூம்களில் இருப்பில் உள்ள பிஎஸ்-3 வாகனங்களுக்கு அதிகபட்ச சலுகைகள் பெறும் வாய்ப்பு இருந்து வருகிறது.

நாளை முதல் பிஎஸ்-4 எஞ்சின் பொருத்தப்பட்ட வாகனங்களை மட்டுமே விற்பனை செய்யவோ, பதிவு செய்யவோ இயலும். அதேநேரத்தில், இன்று வாங்கிய பிஎஸ்-3 வாகனத்தை அடுத்த 60 நாட்களுக்குள் பதிவு செய்து கொள்ளலாம்.

இதனிடையே, பிஎஸ்-3 வாகனங்களுக்கு உச்சநீதிமன்றம் விதித்த தடையானது, முறையானது அல்ல; துரதிருஷ்டவசமானது என்று வாகன உற்பத்தியாளர் கூட்டமைப்பு தெரிவித்தள்ளது.