கஃபே ரேஸர் போன்று மாற்றப்பட்ட ஹோண்டா யூனிகார்ன் 150 பைக்!!

ஆந்திர மாநிலம், மேற்கு கோதாவரி மாவட்டத்தின் அகிவிடு என்ற இடத்தை சேர்ந்த கோஸ்டா மோட்டார்சைக்கிள் கம்பெனி என்ற நிறுவனம்தான் ஹோண்டா யூனிகார்ன் 150 பைக்கை மாற்றங்களை செய்து புதிய தோற்றத்தை கொடுத்துள்ளது.

பழமையான டிசைன் தாத்பரியங்களை கொண்ட கஃபே ரேஸர் போன்ற தோற்றத்திற்கு மாற்றப்பட்டுள்ளது. முன்புறத்தில் வட்ட வடிவ ஹெட்லைட் கொடுக்கப்பட்டு இருக்கிறது. கஃபே ரேஸர்களுக்கு உரித்தான க்ளப்மேன் ஹேண்டில் பாருடன், சிறிய சைடு மிரர்கள் பொருத்தப்பட்டு இருக்கின்றன.

பெட்ரோல் டேங்கிலும் மாறுதல் செய்யப்பட்டு ஹோண்டா சின்னத்தை தெரிவிக்கும் ஸ்டிக்கர் இருக்கிறது. கஃபே ரேஸர்களுக்கு உரிய சைலென்சர் அமைப்புடன் மாற்றம் செய்யப்பட்டு இருப்பதை காணலாம்.

பின்புற ஃப்ரேம் நறுக்கப்பட்டுள்ளது. வழக்கமான இருக்கையை எடுத்துவிட்டு, சிறிய இருக்கையுடன் கஃபே ரேஸர் தோற்றத்திற்கு மாற்றம் செய்துள்ளனர் கோஸ்டா மோட்டார்சைக்கிள் நிறுவனத்தினர்.

குட்டையான மட்கார்டுகளும், அகலமான பெரிய டயர்களும் பொருத்தப்பட்டு இருக்கின்றன. ஒயிட் ரெட் வண்ணத்தில் முற்றிலும் புதிய தோற்றத்திற்கு மாறி இருக்கிறது. இந்த மாற்றம் உங்களுக்கு பிடித்திருக்கிறதா? உங்களது எண்ணங்களையும் கருத்துப் பெட்டியில் தெரிவிக்கலாம்.