எஸ்டபிள்யூஎம் மோட்டார்சைக்கிள்களை இந்தியாவில் களமிறக்கும் கைனெட்டிக்!!

அந்த வகையில், இருசக்கர வாகன உற்பத்தி துறையிலும், வாகன உதிரிபாக உற்பத்தியிலும் பிரபலமான கைனெட்டிக் நிறுவனம் இத்தாலியை சேர்ந்த எஸ்டபிள்யூஎம் நிறுவனத்தின் பிரிமியம் மோட்டார்சைக்கிள் மாடல்களை இந்தியாவில் விற்பனைக்கு களமிறக்க திட்டமிட்டுள்ளது.

மோட்டோராயல் என்ற தனது ஷோரூம்கள் மூலமாக எம்வி அகஸ்ட்டா பிரிமியம் மோட்டார்சைக்கிள்களை கைனெட்டிக் நிறுவனம் விற்பனை செய்து வருகிறது. இப்போது அதே மோட்டோராயல் ஷோரூம்கள் வாயிலாக எஸ்டபிள்யூஎம் நிறுவனத்தின் பிரிமியம் பைக்குகளையும் விற்பனை செய்ய திட்டமிட்டு இருக்கிறது.

இத்தாலியை சேர்ந்த எஸ்டபிள்யூஎம் நிறுவனம் 1971ம் ஆண்டு ஸ்தாபிதம் செய்யப்பட்டு, 1980ம் ஆண்டு வரை மோட்டார்சைக்கிள்களை தயாரித்தது. அதன்பின்னர் இருசக்கர வாகன உற்பத்தியை கைவிட்ட அந்த நிறுவனம், கடந்த 2014ம் ஆண்டு பல புதிய மாடல்களுடன் 2104ம் ஆண்டு இத்தாலியின் மிலன் நகரில் நடந்த மோட்டார்சைக்கிள் கண்காட்சி மூலமாக மீண்டும் களமிறங்கியது.

300சிசி முதல் 650சிசி வரையிலான ரக எஞ்சின்கள் பொருத்தப்பட்ட 6 ஸ்ட்ரீட் மோட்டார்சைக்கிள்கள் மற்றும் ஆஃப்ரோடு மோட்டார்சைக்கிள்களை எஸ்டபிள்யூஎம் நிறுவனம் அறிமுகம் செய்தது. இந்த நிலையில், எஸ்டபிள்யூஎம் நிறுவனத்தின் கிரான் மிலானோ மற்றும் சில்வர் வாஸ் மோட்டார்சைக்கிள் மாடல்களை இந்தியாவில் அறிமுகம் செய்ய கைனெட்டிக் திட்டமிட்டுள்ளது.

கிரான் மிலானோ மோட்டார்சைக்கிள் கஃபே ரேஸர் ரகத்தை சேர்ந்தது. இந்த மோட்டார்சைக்கிளில் 445.3சிசி எஞ்சின் பொருத்தப்பட்டு இருக்கிறது. அதிகபட்சமாக 30 பிஎஸ் பவரை வெளிப்படுத்தும். இந்த மோட்டார்சைக்கிளுக்கான சில உதிரிபாகங்களை கைனெட்டிக் நிறுவனம்தான் சப்ளை செய்து வருகிறது என்பது குறிப்பிடத்தக்கது.