ஜப்பானில் ஜிஎஸ்எக்ஸ்-ஆர்125 பைக்கிற்கு மோட்டோஜிபி அடையாளத்தை கொடுத்த சுசுகி நிறுவனம்...

சுசுகி நிறுவனம் தற்சமயம் ஜிஎஸ்எக்ஸ்-ஆர்125 பைக்கை ட்ரிட்டோன் ப்ளூ மெட்டாலிக், ப்ரில்லியண்ட் வொய்ட் மற்றும் டைட்டான் ப்ளாக் என்ற மூன்று விதமான நிறத்தேர்வுகளில் விற்பனை செய்து வருகிறது. தற்போது புதியதாக மோட்டோஜிபி தோற்றத்திலும் இந்த பைக் அறிமுகமாகிவிட்டதால் நான்கு நிறங்களில் ஜப்பானில் சந்தைப்படுத்தப்படவுள்ளது.

மோட்டோஜிபி தோற்றத்திலான இந்த புதிய பைக்கின் விலை அங்கு 3,93,800 யென்-ஆக நிர்ணயிக்கப்பட்டுள்ளது. இந்திய ரூபாயில் இதன் மதிப்பு கிட்டத்தட்ட ரூ.2 லட்சத்து 80 ஆயிரம் ஆகும். இதே விலையில் தான் மற்ற மூன்று நிறங்களில் இந்த பைக் விற்பனை செய்யப்படுகிறது.

அடுத்த ஜூலை மாதம் முதல் வாரத்தில் இருந்து ஜப்பானில் விற்பனையை துவங்கவுள்ள இந்த மோட்டோஜிபி லீவரி பைக்கை நிறுவனத்தின் 100வது ஆண்டுவிழாவை முன்னிட்டு சுசுகி நிறுவனம் அறிமுகப்படுத்தியுள்ளது.

சுசுகி எக்ஸ்டார் குழுவின் சமீபத்திய ஜிஎஸ்எக்ஸ்-ஆர்ஆர் மோட்டோஜிபி ரேஸ் பைக்கின் அடிப்படையில் வடிவமைக்கப்பட்டுள்ள இந்த புதிய லீவரி பைக்கில் நீலம் மற்றும் சில்வர் நிறத்தில் பெயிண்ட் அமைப்பு வழங்கப்பட்டுள்ளது.

இந்த புதிய நிறத்தேர்வை தவிர்த்து இந்த பைக்கில் வேறெந்த மாற்றமும் கொண்டுவரப்படவில்லை. சுசுகி ஜிஎஸ்எக்ஸ்-ஆர்125 பைக்கில் 124சிசி சிங்கிள்-சிலிண்டர் லிக்யூடு-கூல்டு என்ஜின், டிஒஎச்சி செட்அப் மற்றும் ஃப்யூல்-இன்ஜெக்‌ஷன் சிஸ்டத்துடன் பொருத்தப்படுகிறது.

6-ஸ்பீடு கியர்பாக்ஸ் உடன் இணைக்கப்படுகின்ற இந்த என்ஜின் அதிகப்பட்சமாக 10,000 ஆர்பிஎம்-ல் 15 பிஎச்பி பவரையும், 8,000 ஆர்பிஎம்-ல் 11 என்எம் டார்க் திறனையும் வெளிப்படுத்துகிறது. 125சிசி-ல் முன்னதாக இந்நிறுவனம் ஸ்விஷ் ஸ்கூட்டர் மாடலை சில தினங்களுக்கு முன் ஜப்பானில் அறிமுகப்படுத்தி இருந்தது.

கேடிஎம் ஆர்சி125 பைக்கிற்கு போட்டியாக விளங்குகின்ற ஜிஎஸ்எக்ஸ்-ஆர்125 பைக்கில் ஜிக்ஸெர் பைக்குகளின் முன்புற பகுதி, எல்இடி டெயில்லேம்ப், க்ளிப்-ஆன் ஹேண்டில்பார்கள் மற்றும் கியர் பொஷிஷன் இண்டிகேட்டர் உடன் முழு-டிஜிட்டல் இன்ஸ்ட்ரூமெண்ட் க்ளஸ்ட்டர் உள்ளிட்ட அம்சங்களை சுசுகி நிறுவனம் வழங்கி வருகிறது.