50 பிஎச்பி டர்போ எஞ்சினுடன் உருவாக்கப்பட்ட புதிய ராயல் என்ஃபீல்டு ஹிமாலயன்!

ஆஃப்ரோடு அல்லது ஆன்ரோடு என இரண்டு பயன்பாட்டிற்குமான மிகச் சிறந்த தேர்வாக ராயல் என்ஃபீல்டு ஹிமாலயன் வாடிக்கையாளர்கள் மத்தியில் அதிக மதிப்பை பெற்றிருக்கிறது. சிறப்பான வடிவமைப்புடன், சரியான பட்ஜெட்டில் கிடைப்பதால், ராயல் என்ஃபீல்டு ஹிமாலயன் பைக்கிற்கான வரவேற்பு தொடர்ந்து அதிகரித்து வருகிறது.

இந்த நிலையில், அதிக செயல்திறனை வெளிப்படுத்தும் விதத்தில், டர்போசார்ஜ்டு எஞ்சினுடன் கூடிய ஹிமாலயன் பைக்கை ராயல் என்ஃபீல்டு வெளியிட்டுள்ளது.

இங்கிலாந்தில் உள்ள ராயல் என்ஃபீல்டு நிறுவனத்தின் தொழில்நுட்ப மையம் இந்த பைக்கை உருவாக்கி இருக்கிறது. சாதாரண ஹிமாலயன் பைக்கில் பல்வேறு மாற்றங்களை செய்து இந்த புதிய பைக்கை ராயல் என்ஃபீல்டு தொழில்நுட்ப மையத்தின் பொறியியல் துறை வல்லுனர்கள் மாற்றி இருக்கின்றனர்.

மாற்றங்கள் செய்து உருவாக்கப்பட்டு இருக்கும் இந்த ஹிமாலயன் பைக்கிற்கு MJR Roach என்று பெயரிடப்பட்டு இருக்கிறது. சாதாரண பைக்கில் பயன்படுத்தப்படும் அதே 411 சிசி எஞ்சின்தான் இந்த பைக்கிலும் பயன்படுத்தப்பட்டு இருக்கிறது.

ஆனால், கர்ரெட் நிறுவனத்தின் ஜிடி 125 டர்போசார்ஜரை இதன் எஞ்சினுடன் இணைந்து செயல்திறன் அதிகரிக்கப்பட்டு இருக்கிறது. சாதாரண மாடலின் எஞ்சின் அதிகபட்சமாக 24 பிஎச்பி பவரை வெளி்ப்படுத்தும் நிலையில், இந்த எம்ஜேஆர் ரோச் மாடலின் எஞ்சின் 50 பிஎச்பி பவரை அளிக்கும் வல்லமையுடன் மாற்றப்பட்டு இருக்கிறது. அதாவது, இரட்டிப்பு பவரை வெளிப்படுத்தும் திறனை பெற்றிருக்கிறது.

செயல்திறனை கூட்டுவதற்காக டர்போசார்ஜர் மட்டுமின்றி, புகைப்போக்கி அமைப்பும் மாற்றம் செய்யப்பட்டு இருக்கிறது. அத்துடன், முன்புறத்தில் அப்சைடு டவுன் ஃபோர்க்குகள் கொண்ட சஸ்பென்ஷன் அமைப்பும், பின்புறத்தில் மோனோ ஷாக் அப்சார்பரும் பொருத்தப்பட்டுள்ளது.

இந்த பைக்கில் க்வாட் புரொஜெக்டர் ஹெட்லைட் அமைப்பும் முக்கிய அம்சமாக இருக்கிறது. கான்டினென்டல் டிகேசி 80 டயர்கள் பொருத்தப்பட்டுள்ளன. வீடியோ கேம்களில் வரும் பைக்குகளை மனதில் வைத்து இந்த புதிய மாடலை உருவாக்கி இருப்பதாகவும், இங்கிலாந்து தொழில்நுட்ப மையத்தில் இருந்த சில உதிரிபாகங்களை வைத்து இந்த பைக்கை உருவாக்கும் முயற்சிகள் நடந்ததாகவும் ராயல் என்ஃபீல்டு தெரிவித்துள்ளது.