விலையுயர்ந்த டிரையம்ப் பைக்கில் 50 ஆயிரம் கிமீ பூர்த்தி செய்த பிரபலம்... காரையே பயன்படுத்த மாட்டார் போலிருக்கே

டிரையம்ப் நிறுவனத்தின்கீழ் விற்பனைக்கு வந்த கஃபே ரேஸர் ரக பைக்குகளில் த்ரக்ஸ்டன் மாடல் பைக்கும் ஒன்று. இப்பைக்கைப் பயன்படுத்தியே ஓர் பிரபலம் சுமார் 50 ஆயிரம் கிமீ பயணத்தை நிறைவு செய்திருக்கின்றார். இந்த தகவல் இருசக்கர வாகன பிரியர்கள் மற்றும் அட்வென்சர் பயணத்தை மேற்கொள்ளுவோர் மத்தியில் பெரும் ஆச்சரியத்தை ஏற்படுத்தியுள்ளது.

இதுவரை எந்தவொரு சூப்பர் பைக் பிரியருமே எட்டாத ஓர் இலக்காகவே இது பார்க்கப்படுகின்றது. இதுபோன்று ஓர் தகவல் இதுவரை வெளிவராதநிலையிலேயே இதனை புதிய மைல்கள்ளாக அநேகர் பார்க்கத் தொடங்கியிருக்கின்றனர். இத்தகைய சாதனயை சூப்பர் பைக்கில் செய்தவர் யார் என்ற கேள்வி உங்கள் மனதில் எழும்புவதை எங்களால் அறிய முடிகிறது.

ஃபோக்ஸ்வேகன் நிறுவனத்தின் இந்தியாவிற்கான நிர்வாக இயக்குநர் குர்பர்தாப் போபராய், இவரே சூப்பர் பைக்கில் 50 ஆயிரம் கிமீ தூரத்தைக் கடந்தவர் ஆவார். பைக்கை வாங்கிய நாள் முதல் தற்போது வரை அவர் செய்த பயணத்தின் தூரம் இதுவாகும். இதுகுறித்த தகவலையே ட்ரையம்ப் நிறுவனம் தனது அதிகாரப்பூர்வ இன்ஸ்டாகிராம் பக்கத்தில் வெளியிட்டிருக்கின்றது.

டிரையம்ப் நிறுவனம் தனது பிரீமியம் தர பைக்குகளில் ஒன்றான போனேவில்லே மாடலைத் தழுவியே த்ரக்ஸ்டன் பைக்கை உருவாக்கியிருக்கின்றது. எனவே கவர்ச்சிக்கும், தொழில்நுட்ப வசதிகளுக்கும் எந்தவொரு குறைச்சலுமின்றி இப்பைக் காட்சியளிக்கின்றது. இதனை சற்று கூடுதலாக வழங்கும் நோக்கில் த்ரக்ஸ்டன் ஆர் எனும் தேர்வையும் த்ரக்ஸ்டன் வரிசையில் டிரையம்ப் வழங்கி வருகின்றது.

இந்த மாடல் ஸ்போர்ட்டி மற்றும் கஃபே ரேஸர் ஆகிய இருவிதமான ஸ்டைலைக் கொண்டிருக்கும். எனவேதான், சாகச பயண பிரியர்களின் விருப்பமான பைக்காக இது இருக்கின்றது. ஆனால், ஃபோக்ஸ்வேகன் நிறுவனத்தின் நிர்வாக இயக்குநர் பயன்படுத்தியது வழக்கமான த்ரக்ஸ்டன் மாடலைதான்.

இது 865 சிசி கொண்ட ஏர்-கூல்டு எஞ்ஜினைக் கொண்டு இயங்குகின்றது. இது அதிகபட்சமாக 69 பிஎச்பி மற்றும் 71.8 என்எம் டார்க்கை வெளிப்படுத்தும் திறன் கொண்டது. இத்தகை அதி-திறன் கொண்ட சூப்பர் பைக்கிலேயே சுமார் 50 கிமீ பயணத்தை அவர் கடந்திருக்கின்றார்.

குர்பர்தாப் போபராய் பயணங்கள்மீது அதிகம் ஆர்வம் கொண்டவர் என கூறப்படுகின்றது. குறிப்பாக, இருசக்கர வாகனத்தில் நீண்ட பயணத்தை மேற்கொள்வது அவருக்கு மிகவும் பிடிக்குமாம். இதுவே அவரால் டிரையம்ப் த்ரக்ஸ்டன் சூப்பர் பைக்கில் 50 ஆயிரம் கிமீ பயணிக்க தூண்டியிருக்கின்றது.